Jon 8:35-54

³⁵Ana nigl kongun yoko orkwa yomba ye yagl kande yungumugl ta engenge moglkrambuka, ba yene wam yungugl aimande morambuka.

³⁶Ana Yomba Wam ene kane poko endinan, ene yoko kaima moraglkwa.

³⁷Na pirkan erika ene Abraham gawama meglkwa, ba na ka beke teinga i, ene nomano mina suna yeikrukwa pre ene na sigoramnedi erikwa.

³⁸Na Nina ombuno dumere mere dimoglka, ba ene neno eriyo dumere mere erikwa.”

³⁹Yomba ikra yegl di Yesus teingwa, “No neno Abraham moglkwa.” Ana Yesus yegl di ikine endungwa, “Ene Abraham nangiglma meglmbi kade, ana ye mambuno ormere yegl eraglkwa.

⁴⁰Na Godna ka kaima dungo pirmere mere ene diteinga, ba ene na sigoramnedi erikwa. Abraham taragl yegl mere okuna ta erekrukwa.

⁴¹Ene taragl erikwa i enene neno ta ormere mere erikwa.” Ba ye di ikine endingwa, “No mano yagl guagua ta pindre no kugl yeikrukwa. Tamanga. God suwara no Neno moglkwa. No ye nangiglma kaima mounga.”

⁴²Yesus yegl di ye tongwa, “Ene Neno kaima God moran kade ana ene na wakai kanaglkwa. Sraglpre, na God mina undre ana erme igle moglka. Na pirmere ta wu erekrika, ba ye na diendungo wingwa.

⁴³Ana sragl mambuno pango na ka dinga i ene pirpogl sikrime? Yeglpre na ka dinga i ene pir inaglkwa mere manga.

⁴⁴Ene yagl kinde nangiglma, neno Satan, ene neno prumere i ere-ere erikwa. Okuna imbo ye yomba sigoglkwa yagle, ye ka kaima ta ake moglkruko, te ka kaima nomano mina suna yeikrukwa. Ye kakimbi dungwa i ye mambunomo kaima pangwa. Ye kakimbi dungwa yagle, ana kakimbi dingwa yomba prapra ye neno.

⁴⁵Yeglpre na ka kaima ene diteinga, ba ene ta pirngi dikrikwa.

⁴⁶Ene pirmbi na tandaglme ta erika pamo? Na ka kaima dinga panan ana sraglpre ene na pirngi dikrime?

⁴⁷Yomba ta God mina ungwa i ye God sragl ka dungwa i prukwa. Ba ene God nangiglma ta moglkrikwa pre ene ye kamo ta pirkraglkwa.”

⁴⁸Juda yomba di ikine ende Yesus teingwa, “Ene Samaria yomba motnga, ana ene mina spirit kinde suna moglme dumga ikra no aglau ere dumun kana?”

⁴⁹Ana Yesus yegl di ikine endungwa, “Na mina spirit kinde ta suna moglkrukwa, na Nina kangiye di mitna endinga ba ene na kangina ake atne endingwa.

⁵⁰Na nana kangina akeple dinagledi ta dikrika ba yomba ta na akeple dindre ana ye yumbu sinambuka.

⁵¹Na ka kaima di ene teinga, yomba ta na ka dimere pinande eran ye ta goglkrambuka.”

⁵²Ye di Yesus teingwa, “Ana erme no kaima pirkan ounga, spirit kinde ta ene mina moglkwa. Abraham goglko, te propet wagle geglkwa, ba ene yegl dinga. Yomba ta na ka dimere pinande erambuka ye ta goglkrambuka.

⁵³Ana ene mogl-mitna ende no neno Abraham engitno? Ye goglko te propet wagle geglkwa ana ene ira moledi pitne?”

⁵⁴Yesus yegl di ikine endungwa, “Ana na, nana kangina ta akeple dinagledi erimbo na kangina ta paikrambuka. Yomba ta na kangina akeple dungwa i na Nina. Ye suwara i ene Godno we dingwa.