Jon 8:32-43

³²en yumob garra sabi det trubalawei, en det trubalawei na garra meigim yumob fri.”

³³Wal detlot pipul bin tok, “Melabat olredi fri, dumaji melabat grengrensan blanga Eibrahem, en melabat nomo jidan prisana blanga enibodi. En melabat grengrenfatha olabat nomo bin jidan prisana blanga enibodi du. Wal wotfo yubin tok blanga meigim melabat fri?”

³⁴Wal Jisas bin dalim olabat, “Trubala ai dalim yumob. Enibodi hu oldei dumbat nogudbala ting jidan jis laiga prisana blanga det nogudbalawei, en im kaan meigim miselp fri brom det nogudbalawei.

³⁵“Wal yumob jinggabat detkain prisana hu jidan garram im bos en dumbat ola wek blanga im. Im jidan jis laiga femili blanga im bos. Bat im nomo jidan femili blanga im olagijawan. Oni det brabliwan san blanga det bos jidan femili blanga im olagijawan.

³⁶En wen det San larramgo det prisana fri, wal det prisana jidan fri brabliwei.

³⁷“Wal ai sabi yumob grengrensan blanga Eibrahem. Bat yumob nomo bulurrum det wei blanga im, dumaji yumob nomo wandi teiknodis langa main wed, en yumob wandi kilim mi ded.

³⁸Yu si? Mi oldei dalim yumob wanim main Dedi bin shoum mi. En yumob oldei dum wanim yumob dedi dalim yumob blanga dum.” Lagijat na Jisas bin tok langa detlot pipul.

³⁹Wal detlot pipul bin dalim Jisas, “Melabat grengrenfatha Eibrahem.” Wal Jisas bin tok, “If trubala yumob grengrensan blanga Eibrahem, wal yumob bina dum detlot ting weya imbin dum.

⁴⁰Bat yumob wandi kilim mi ded, dumaji mi oldei dalimbat yumob det trubala wed weya aibin irrim brom God. Wal Eibrahem nomo bin wandi kilim enibodi ded seimwei laik yumob.

⁴¹Bat yumob dumbat wanim yumob dedi dumbat.” Wal detlot pipul bin tok, “Melabat nomo garram dedi. Oni God na Dedi blanga melabat, en melabat na brabliwan biginini blanga im.”

⁴²Wal Jisas bin tok, “If God im yumob Dedi brabliwan, wal yumob bina laigim mi, dumaji aibin kaman brom im, en mi iya na. Bat ai nomo bin kaman miselp. God na bin jandim mi.

⁴³Bat yumob kaan sabi wanim mi dalimbat yumob, dumaji yumob nomo wandi irrim detlot wed weya mi toktok.