Text copied!
CopyCompare
Buk Baibel long tokples Kandas - Jon - Jon 8

Jon 8:22-49

Help us?
Click on verse(s) to share them!
22A ramano kum te Juda det lena, “Pepetlai, in um doko i? Pepetlai, iri a kibino ra i watungi lena, ‘A tamon ra an nan suri, ka mot in nan lar pas iai?’”
23O Iesu i balu det lena, “Mot taginin ut mot upiso, ma iau, a wan ut tagisapat netes. Mot tagun a rakrakon bual, iau awu sur tagun a rakrakon bual.
24Iri a kibino ra a watungi tamot lena, mot in mat nam anumot a kum sakino petutna. Ra ka mot nurnur un iau lena iau ut ri iau, mot in mat nam anumot a kum sakino petutna.”
25Ma det tingi lena, “Osi ui?” O Iesu i balu det, “A sa inanos tar mot turpasi una turturkibin ina nung a pinapam, tuk uniri.
26A susut na utna an watungi un mot ra an warkurai mot uni, uni i ra i tulu ru iau i lingmulus, ma iau, a inanosi kut a taro una rakrakon bual una kum utna ra a longoro i tano.”
27Ka det tasmani lena, o Iesu i wasiso torom det un o Tamano.
28Ma o Iesu i watungi lena, “Ra mot in utur toto a Nutun a Musano usapat netes, mot in tasmani lena iau ut ri iau, ma mot in tasmani kai lena awu sur iau sot kut a papam, o Tita i ususer iau un asau ra a watungi.
29I ra i tulu ru iau, i kis tomo nam iau, ma ke ser wan gusun iau, uni a ser pam a kum utna ra i gas nami.”
30A susut ra det longoro a kum wasiso ri, det nurnur un o Iesu.
31O Iesu i watungi torom a kum te Juda ra det nurnur uni lena, “Ra mot in mur anung a etowo, mot anung a taro na ususer mulus.
32Ma mot in tasman a lingmulus, ma a lingmulus in ulangolango mot.”
33Det balu o Iesu lena, “Met a kum nutnutun o Abaram, tuk uniri ka met tene ititula anun taio. Sur asau ra u watungi lena a lingmulus in ulangolango met?”
34O Iesu i balu det lena, “A inanos mot nama lingmulus, a taro rop ra det pam a sakino, det a kum tene ititula anun a sakino petutna.
35A musano ra i tene ititula kut anun tu kabo tamano, ken kis tukum torom det, ikut a nat ra o tamano ma o nano der usus pasi, i ra tagun der mulus.
36Ra a Nutun o God in ulangolango mot, mot in langolango mulus.
37A tasmani ut lena, mot a kum nutnutun o Abaram, ikut uniri mot lari sur mot in um doko iau, uni anung a wasiso ke kis un mot.
38A wasiso un asau ra a tama i tan o Tita, ma mot kai, mot pam asau ra mot longoro i tan a tamamot.”
39Det balu i lena, “Met, met tamano nam o Abaram.” O Iesu i balu det lena, “Ra mot tamano mulus nam o Abaram, mot in pam a kum utna ra o Abaram i pami.
40Iau a musano ra a inanos mot nama lingmulusino ra a longoro i tan o God, ikut mot nem na um doko iau. O Abaram ke pam tu utna lenri.
41Mot, mot pami ut a kum pinapam ra a tamamot i pami.” Det watungi tan o Iesu lena, “Awu sur di usus oros tar met kut, a tamamet ut ra o God.”
42O Iesu i watungi tandet lena, “Ra gunuk mot tamano mulus nam o God, mot in nem iau, uni a wan tagisapat tan o God, ra uniri a kis nin. Ka wanpat urin una nung a nemnem, i ut i tulu ru iau.
43Sur asau ra ka mot tasman lele anung a wasiso? Uni ka mot longoro lar pasi.
44A tamamot ra o Satan, ma mot nemi ut lena mot in mur anun a nemnem. Tagun numugu utmakai, i a tene um doko a taro, ma ke tasman a lingmulus, uni katu lingmulus i kis uni. Ra i watung a torotoro, i wasiso nam anun a wasiso mulus, uni i ut a tene torotoro ma a taman a torotoro.
45A watung a lingmulus, iri a kibino ra ka mot nurnur un iau.
46Osi tagun mot in takun sot pas iau un tu sakino petutna? A watung a lingmulus, ra ilai ra ka mot nurnur un iau?
47Osi ra anun o God, i ser longoro a kum wasiso anun o God. Ikut mot, ka mot longoro i, uni awu sur mot anun o God.”
48A ramano kum te Juda det watungi tan o Iesu lena, “Met tasman mulusi lena ui a te Samaria, ma a laulau na nion kura un ui.”
49Ra o Iesu i balu det lena, “Katu laulau na nion kuri un iau. A urur torom o Tita, ma mot, ka mot urur torom iau.

Read Jon 8Jon 8
Compare Jon 8:22-49Jon 8:22-49