Jon 8:2-59

²Öŋgöba ahöba miri giaŋiiga söŋanök kunbuk liliŋgöba jöwöwöl jikenöŋ öŋgöiga ambazip kambu pakpak kaba liliköm waŋgigetka eta tata kusum eŋgiyök.

³Kusum eŋgiiga Köna keugö böhi aka Farisi (Köna keugö kapaŋkölköl) yeŋön ambi kun waŋgita yaŋgöreŋ kaget. Ambi miaŋön sero yoŋgorö ahiga miaŋgöra memba jöhögeri, mi waŋgita kambu jeŋine alget.

⁴Jeŋine ala Jisösgöra jiget, “Böhi, ambi kiaŋön qesabulum ahiga mönö miaŋgöreŋök miwikŋaiba memba kazin.

⁵Mosesnöŋ Köna keu ala miaŋgöreŋ ambi mewöŋi mi kötnöŋ gila qeinga kömumapköra jim kutum neŋgiyöha ahöza. Mewö ahözapmö, göŋön yaŋgöra denöwö jiman?”

⁶Mewö jiba miaŋgöreŋ möndöba Jisös keugö bötaknöŋ öröi qaköiga qebingö könaŋi ahui keu jakeŋe albingöra jiget. Mewö jigetka sipköba eta böröŋan kulem kun gölmenöŋ ohoyök.

⁷Ohoyökmö, toroqeba kapaŋ köla qesim waŋgigetka hök ala wahöta diŋdiŋi kinda kewö jii mötket, “Eŋgöreŋök kunŋan siŋgisöndok kun qahö aka maljawi, yaŋön mönö ölöp köt mutukŋi memba gila qema.”

⁸Mewö jii mötketka kunbuk sipköba eta kulem kunbuk gölmenöŋ ohoyök.

⁹Jisösnöŋ keu jiyöhi, miaŋön eŋgömemba jöhöiga nanŋini siŋgisöndokŋini gamuŋambuk akeri, mi Anutunöŋ kondeliga nanŋini uruŋinan naŋgöba jiiga isikusukŋini qahöwahök. Miaŋön qahöwahiga keu göröŋ kingetka bohonŋinan mutuk eŋgömosöta aniga yaŋgö nemböŋan andöŋe aniga tosatŋi mohot mohot yeŋön mömölaköba körek an teköget. Qöndökŋan aniga Jisösnöŋ zoŋ kuŋguba tari ambinöŋ nanŋök yambuk kinök.

¹⁰Jisösnöŋ hök ala wahöta diŋdiŋi kinda ambi eka kewö jii mörök, “Ambi, keu jakeŋe al gihibingö jizei, yeŋön mönö denike gi sök ni sök anjeye? Yeŋgöreŋök kunöŋ kinda gi kömumangö keuŋi qahö jim teköza me?”

¹¹Jii möta meleŋnök, “O Kembu, kunöŋ qahö jim teköm niŋgiza!” Mewö meleŋniga jii mörök, “Nöŋön mewöyök gi qahö jim teköm gihizal. Gi mönö dölki könahiba siŋgisöndok kunbuk kude aka malman.” Mewö.

¹²Jisösnöŋ keu kunbuk suariba kewö jii mötket, “Nöŋön ambazip gölmeŋi gölmeŋi tat anjei, eŋgö asakŋini akzal. Kunŋan ni nuataŋgöba kamawi, yaŋön mönö söŋaupnöŋ jipjap qahö qeba malmapmö, malmal köhöikŋaŋgö asakŋi miaŋgö uruŋe malma.”

¹³Mewö jiiga Farisi (Köna keugö kapaŋkölköl) yeŋön kewö jiget mörök, “Nanganök könaŋamgi naŋgöba jim asarimakzani, miaŋön mi qahö dop köl köhöiza. Qahö!”

¹⁴Mewö jiget möta kewö jii mötket, “Nöŋön denikeyök eta kayali aka denike anda öŋgömami, mi möt teközal. Miaŋgöra nanak könaŋamni naŋgöba jim asarimakzali, keu mi mönö ölöp dop köl köhöiza. Mi köhöizapmö, iŋini nöŋgö könani mi ölŋa qahö möt kutuze.

¹⁵Eŋön ambazip sileŋini miyöhök eka mewö miaŋön bahösapsap kewöt eŋgiba keuŋini laŋ jim tekömakzemö, nöŋön ambazip kungö keuŋi qahö jim tekömakzal.

¹⁶“Ni nanök qahö maljalmö, Iwi melaim niŋgiyöhi, yaŋön mönö nömbuk kini maljit. Miaŋgöra kungö keuŋi jim teköbileŋak ewö, mi mönö diŋdiŋanök kewöta dopŋe jim teköbileŋak.

¹⁷Yahötŋan keu kun urumohot aka naŋgöba jiyohotka dop köl köhöimakza. Keu mi eŋgö Köna keuŋine mewöyök ohoget ahöza.

¹⁸“Nöŋön nani könaŋamni naŋgöba jimakzal aka Iwi melaim niŋgiyöhi, yaŋön mewöyök nöŋgö könaŋamni naŋgöba jimakza. Miaŋgöra yahöt akziga miaŋön ölöp dop köla köhöim teköza.”

¹⁹Jisösnöŋ mewö jii möta kewö qesim waŋgiget, “Göhö Iwigi mi denike malja?” Qesim waŋgigetka meleŋnök, “Iŋini ni aka Iwini netkö könaŋamniri qahö möta malje. Iŋini nöŋgö könaŋamni möt kutubeak ewö, mönö nöŋgö Iwini mewöyök möt waŋgibeak.”

²⁰Jisösnöŋ jöwöwöl jikegö naluk dum kösutŋe kinda ambazip kusum eŋgiba keu mi jiyök. Mi jiyökmö, nalöŋan qahö kam kuŋguyöhaŋgöra aka kunŋan i qahö memba jöhöyök. Mewö.

²¹Jisösnöŋ keu kun kewö toroqeba jii mötket, “Nöŋön eŋgömosöta anda malbiga iŋini ni göraim niŋgiba malme aka siŋgisöndok akeri, miaŋgöreŋ qekötahöba kinda kömum köhöime. Miaŋgöra denike öŋgömami, iŋini miaŋgöreŋ öŋgöbingö osime.”

²²Juda jitŋememe yeŋön mi möta jiget, “Kewö jiza, ‘Denike öŋgömami, iŋini miaŋgöreŋ öŋgöbingö osime.’ Keu mi denöwö? Imbi aumamgöra jiza me?”

²³Mewö jigetka jii mötket, “Iŋini gölme kiaŋgö toŋi aka maljemö, nöŋön miri gölme euyaŋgö buŋaya akzal. Eŋön gölmenöŋ ahuba gölme kiaŋgö buŋaya aka maljemö, nöŋön mutuhök gölme kiaŋgöreŋ qahö ahuyal.

²⁴Qahö ahuba malmalgö könaŋi nalö dop mala korali, nöŋön mönö mia akzal. Nöŋgöra mewö qahö möt narize ewö, mönö siŋgisöndok akeri, mi qahö mosötpiga miaŋgöreŋ qekötahöba kinda kömum köhöime. Könaŋi miaŋgöra aka kewö jibi mötze, ‘Iŋini siŋgisöndok akeri, mönö miaŋgöreŋ qekötahöba kinda kömum köhöime’. Keu mi ölŋa.”

²⁵Keu mi möta kewö qesim waŋgiget, “Gi mönö niŋia akzan?” Qesim waŋgigetka meleŋnök, “Könaŋamni lök indelbiga mötzei, nöŋön mönö mia akzal.

²⁶Nöŋön eŋgöra keu gwötpuk ölöp toroqeba jibileŋak aka siŋgisöndok gwötpuk akeri, miaŋgö keuŋi ölöp jim teköbileŋakmö, melaim niŋgiyöhi, yaŋön mönö nöŋgö melaimelai Toni ölŋi akza. Yaŋön keu jiiga yaŋgöreŋök möta kota maljali, nöŋön mönö keu mi aukŋe jibiga gölmeŋi gölmeŋi yeŋön mörakŋe.”

²⁷Mewö meleŋnökmö, Iwigöra keu suariba jiyöhi, yeŋön mi qahö möt asariget.

²⁸Jisösnöŋ toroqeba kewö jii mötket, “Nöŋön malmalgö könaŋi nalö dop mala korali, mönö mia akzal. Miaŋgö könaŋi mi könaŋgep ölöp möt asarime. Nöŋön yuai kun nani ösumnan me nani imbinaŋgö dop qahö ahakzalmö, Iwinan keu kusum niŋgiba malöhi, mönö miaŋgö dop keu jitni ki jimakzal. Keu kötŋi yahöt miaŋgö könaŋi mi könaŋgep möt asarime. Iŋini Suep gölmegö Azi Ölŋi kösökögetka eu öŋgöba kömumawi, nalö miaŋgöreŋ mi ölöp möt asarime.

²⁹Melaim niŋgiyöhi, yaŋön mönö nömbuk kini maljit. Ahakmeme möri dop köl waŋgimakzawi, nöŋön mönö sundan mia ahakzal. Miaŋgöra yaŋön qahö nömosöriga nanök qahö maljal.”

³⁰Keu mewö jiyöhaŋgöra aka ambazip gwötpukŋan uruŋini meleŋda Jisös möt narim waŋgiget. Mewö.

³¹Jisösnöŋ Juda ambazip tosatŋan möt narim waŋgigeri, yeŋgöra keu kewö jii mötket, “Nöŋgö Buŋa keunan uruŋine geiga miaŋgöreŋ qekötahöba kinje ewö, mönö ölŋa nöŋgö gwarekurupni akze.

³²Mewö mala keu ölŋaŋgö könaŋi möt kutugetka Buŋa keu ölŋan iŋini bölöŋaŋgö kösönöhök pösat eŋgiiga solanŋi (fri) aka malme.”

³³Mewö jii möta meleŋda kewö jiget, “Nini Abrahamgö gwölönarökurupŋi mala könagesö walŋi akzin. Mewögöra azi kunöŋ kösö gwarö mem neŋgiiga maljinaŋgö jizani, mi qahö. Nini mönö nalö kunöŋ etqeqeŋi mewö qahö aka malin. Aiga gi denöwögöra aka kewö jizan, ‘Kösönöhök pösat eŋgiiga solanŋi aka malme?’ Keu mi qahö dop kölja.”

³⁴Mewö jigetka kewö meleŋ eŋgiyök, “Nöŋön keu öl töhönŋi kun kewö jibi mötket: Siŋgisöndok akzei, körek yeŋön siŋgisöndokö welenqeqe omaŋi töwa qahö aketka miaŋgö kösöŋan köpeim eŋgimakza.

³⁵Köpeim eŋgimakzapmö, welenqeqenöŋ toŋaŋgö miri uruŋe nalö dop qahö mal öŋgöma. Nanŋi Nahönŋan ölöp miriŋe nalö teteköŋi qahö malma.

³⁶“Nahönŋan bölöŋaŋgö kösönöhök pösat eŋgiiga solanime ewö, eŋön mönö ölŋa kösö gwarö qahö solanŋi (fri) aka malme.

³⁷Iŋini Abrahamgö gwölönarökurupŋi maljei, mötzalmö, bölöŋan uruŋini gwözöŋjawaŋgöra nöŋgö Buŋa keunan mösösönihim eŋgiba kondondoŋgöba erakza. Könaŋi miaŋgöra mönö kapaŋ köla ni nuŋgubingö mötze.

³⁸Nöŋön Iwinaŋgö qöhöröŋe mala yuai eka mala korali, miaŋgö keuŋa jimakzal. Eŋön mewöyök iwiŋinan keu jii mötkeri, miaŋgö dop ahakze.”

³⁹Jisösnöŋ mewö meleŋ eŋgiiga kewö jiget mörök, “Abrahamnöŋ mönö nanine iwiambönini akza.” Mewö jiget möta jiyök, “Iŋini Abrahamgö gwölönarökurupŋi akeak ewö, mönö yaŋgö ahakmemeŋi wuataŋgögetka dop kölbawak.

⁴⁰Miaŋgö tandökŋi kewö akza: Nöŋön Anutugö jitŋeyök keu möta miaŋgö dop keu ölbölŋi mi jibi mörakze. Nalö kewöŋe iŋini kapaŋ köla azi ni nuŋgubingö mötzemö, Abrahamnöŋ mewö qahö ahök.

⁴¹Nanŋini iwiurupŋinaŋgö ahakmeme miyök wuataŋgöba malje.” Mewö jiiga jiget mörök, “Serowilinöŋ qahö ahuba iwi qahö (bastet) mi qahö akzinmö, Iwininambuk maljin. Anutunöŋ mohok-kun nanŋak iwi ak neŋgiza.” Mewö.

⁴²Jisösnöŋ kewö jii mötket, “Anutunöŋ nanŋak iwi ak eŋgibawak ewö, nöŋön yaŋgöreŋök eta asuhuyalaŋgöra mönö ölöp ni uru jöpaköm niŋgibeak. Nani ösumnöŋ nam köliga qahö asuhuyalmö, Anutunöŋ melaim niŋgiiga eta maljal.

⁴³Keu jimakzali, mi wuanöŋgöra möt asaribingö lömbörimakze? Nöŋgö keunan uruŋini undeŋjawaŋgöra mi möt kutubingö ölan qeba zikzik tökömakze. Mewögöra mi möt asaribingö osimakze?

⁴⁴“Mönö iwiŋini Bölöŋi Toŋaŋgö buŋaya akze. Sihim kömbönaŋinan mönö iwiŋinaŋgö sihimŋi bölöŋi wuataŋgöbingöra ahöza. Yaŋön könakönahiŋeyök ambazip eŋguget kömukömu azia aka kota malja. Keu ölŋan uruŋe qahö kinjawaŋgöra aka keu ölŋi oŋgita loloŋqaloloŋ kinja. Muneŋ jiji azia aka muneŋ jijigö iwiŋi akzawaŋgöra muneŋ jimakzawi, mi mönö nanŋi uruŋaŋgöra jimakza.

⁴⁵“Yaŋön muneŋ jimakzapmö, nöŋön keu ölŋi jimakzal aigun iŋini ni qahö möt narim niŋgimakze.

⁴⁶Iŋini körekŋan nöŋgö könani kewö kondelbingö osize: Yaŋön siŋgisöndok aka keuŋambuk malja. Könaŋamni mewö jaruzemö, nöŋön keu ölŋi jimakzali, mi mönö wuanöŋgöra qahö möt narim niŋgize?

⁴⁷“Kunŋan Anutugö buŋa akzawi, yaŋön mönö Anutugöreŋ keu kezap ala mörakza. Iŋini Anutugö buŋa qahö akzeaŋgöra aka keu mi qahö möta möt asarimakze.” Mewö.

⁴⁸Jisösnöŋ Juda ambazip yeŋgö könaŋini indeliga likepŋi meleŋda kewö jiget mörök, “Gi Samaria prowinsgö loloŋqaloŋ azia aknöŋga ömewörömenöŋ uruge geiga maljan. Mewö jiba dopŋe jizin me qahöwi, mi ölöp nangak jinöŋ mörin.”

⁴⁹Mewö möta kewö meleŋnök, “Ömenöŋ urune qahö geiga maljal. Ni Iwinanök göda qem waŋgiba maljal aigun töndup eŋön gamu qem niŋgimakze.

⁵⁰Mewö ahakzemö, nanak qetbuŋanambuk akŋamgö jaram qahö timakzal. Mohot kunŋan mewö akŋamgö bimŋi qeba malja. Azi yaŋön mohot kewöt niŋgiba ‘Dop köljan,’ jiba jim teköm niŋgimakza.

⁵¹Nöŋön keu öl töhönŋi kun kewö jibi mötket: Kunŋan nöŋgö Buŋa keuni tem köla wuataŋgömakzawi, yaŋön mönö nalö kunöŋ kömup köhöikŋaŋgö buŋaya qahö akŋa.”

⁵²Mewö meleŋniga Juda jitŋememe yeŋön Jisös kewö jiget mörök, “Abraham aka kezapqetok ambazip yeŋön kömuget aigun göŋön töndup kewö jinöŋga siksauk akza, ‘Kunŋan nöŋgö Buŋa keuni tem köla wuataŋgömakzawi, yaŋön nalö kunöŋ kömup köhöikŋaŋgö buŋaya qahö akŋa.’ Mewö jizanaŋgöra gi öme kunöŋ uruge geiga maljan. Mi dölki ölöp möt asarizin.

⁵³Neŋgö bömönini Abraham kömuyöhi, göŋön mönö i oŋgita yaŋgö ketaŋamŋi akzan me? Kezapqetok yeŋön mewöyök kömuget. Gi nangahöra mötnöŋ öŋgöiga ‘Ketaŋi niŋia akzal?’ jiba mötzan?”

⁵⁴Mewö jiget möta kewö meleŋnök, “Nanaŋgöra mötpi öŋgöiga Anutugö aködamunŋi mi nana buŋa qem aŋgubileŋak ewö, qetbuŋani mi mönö nesak akawak. Iwinan nanŋi aködamunŋi niŋgiyöhaŋgöra aka qetbuŋanambuk aka maljal. Eŋön yaŋgöra ‘Neŋgö bem Anutunini akza,’ jize.

⁵⁵Eŋön könaŋi mi ölöp qahö möt kutumakzemö, nöŋön i ölöp möt waŋgizal. ‘I qahö möt waŋgizal,’ jibileŋak ewö, mönö iŋini ewö tilipqilip azi akileŋak. Ni azi mewöŋi qahö akzalmö, i ölöp möt waŋgizal aka yaŋgö keuŋi tem kölakzal.

⁵⁶Eŋgö bömönŋini Abrahamnöŋ ni gölmenöŋ eta malmamgöra mamböta nalö mi ekŋamgöra uru sösöŋgai aka malök. Nalö kewöŋe Suepnöŋ mal köhöiiga nöŋön asuhubiga nöŋgö nalöni eka miaŋgöra söŋgaiyök.”

⁵⁷Mewö meleŋniga Juda jitŋememe yeŋön kewö jiget mörök, “Yambugi (yara) 50 qahö oŋgita miaŋgö bapŋe maljan aka ‘Abraham ehal,’ jinöŋga qahö dop kölja.”

⁵⁸Mi möta jii mötket, “Nöŋön keu öl töhönŋi kun kewö jibi mötket: Abrahamnöŋ qahö asuhuiga nöŋön lök nalö miaŋgöreŋ malal.”

⁵⁹Mewö jii möta kötnöŋ gila qebingöra köt umburaŋgöba megetmö, Jisösnöŋ tölapköba jöwöwöl jikegö tohoŋi mosöta ölöŋ köla anök. Mewö.