Jon 7:9-47

⁹Keu mewö jii mötketka Galili prowins uruŋe toroqeba malök. Mewö.

¹⁰Jisösgö munurupŋan koumkoum kendongöra angetmö, nanŋak mire tata könaŋgep aukŋe qahöpmö, tölapköba anda Jerusalem öŋgöyök.

¹¹Juda yeŋgö jitŋememeurupŋinan sösöŋgai nalöŋe Jisösgö jeŋi jaruba qesiqesi aka kewö jiget, “Azi mi denike?”

¹²Ambazip kambu yeŋön sutŋine Jisösgöra saŋep keu gwötpuk jiget. Tosatŋan “Azi mi ölöp sorokŋi,” jigetmö, tosatŋan kewö jiget, “Qahö! Yaŋön mönö ambazip kambu eŋololoŋ ak eŋgiiga kahapmahap ahakze.”

¹³Mewö mewö laŋ jigetmö, Juda jitŋememe yeŋgöra keŋgötŋini möta malgeraŋgöra kunŋan yaŋgö keuŋi aukŋe qahö jiyök. Mewö.

¹⁴Kendon sösöŋgai bibiŋe malgetka Jisösnöŋ jöwöwöl jike tohoŋ uruŋe öŋgöba könahiba ambazip kusum eŋgiyök.

¹⁵Kusum eŋgiiga Juda yeŋön welipköba kewö jiget, “Azi ki mötmöt jake öŋgöŋgöŋe qahö öŋgöba töndup Buŋa Kimbigö könaŋi denöwö möt soroköza?” Mewö jiba welipköget.

¹⁶Welipkögetka kewö jii mötket, “Mötmöt Buŋa jimakzali, nöŋön miaŋgö Toŋi qahö akzal. Nanak qahöpmö, melaim niŋgiyöhi, nöŋön mönö yaŋgö mötmötŋi memba kaba jimakzal.

¹⁷Ambazip kunŋan Anutugö jitsihitŋaŋgö dop aka memamgö mötzawi, yaŋön mötmöt jibiga miaŋgö Toŋi daŋön akza, mi möt kutuma. Anutunöŋ Buŋaŋi nöŋgö urune ali asuhuza me nani imbinaŋgö keu laŋ jimakzal?

¹⁸“Kunŋan nanŋi imbiŋe mötmöriba keu jimakzawi, yaŋön nanŋak qetbuŋaŋambuk akŋamgö mötza. Mewö mötzapmö, melaimelai azi kun toŋan qetbuŋaŋambuk akŋapköra kapaŋ köljawi, yaŋön mönö jitŋememe ölbölŋi geŋmoŋi qahö akza.

¹⁹Mosesnöŋ Köna keu al eŋgii mi ahöza me qahö? Mi ahözapmö, eŋgöreŋök kunŋan mi qahö tem köla wuataŋgömakza. Iŋini mönö wuanöŋgöra kapaŋ köla ni nuŋgubingö mötmörize?”

²⁰Mewö jii möta ambazip kambu yeŋön kewö meleŋget, “Ömewörömenöŋ mönö uruge geba kinja. Daŋön kapaŋ köla gi guhumamgö mötmöriza?”

²¹Mewö meleŋgetka jii mötket, “Nöŋön aŋgöletot mohot membiga iŋini körek pakpak auruba köŋkuŋ akze.

²²Mosesnöŋ sileŋine Anutugö aiwesök yandibingöra jim kutum eŋgiyöhi, o Mosesnöŋ mi mutuk qahö jim kutuyökmö, ambösakonurupninan mi könahiba memba malgetka silik mi neŋgöreŋ kaiga Sabat kendonöŋ mewöyök azi sileŋini yandimakze.

²³“Nini Mosesgö Köna keu walöŋnin siŋgisöndok ahubapuköra köhöikŋi mötzin. Mi mötzinmö, keu mi qetala Sabat kendonöŋ mewöyök azi sileŋini yandiba töndup nanŋini qahö jim aŋguba silebile malje. Mewö maljemö, nöŋön azi jömukŋi Sabat kendonöŋ mem ölöwak waŋgiali, miaŋgöra mönö wuanöŋgöra mi yom jim niŋgize?

²⁴Iŋini ambazip sileŋini miyöhök eka mewö miaŋön bahösöhamök kewöta keu laŋ jim tekömakzei, mi mönö mosötme. Mi mosöta uruŋini törörök möt kewöta keu ölŋanök jim teköme.” Mewö.

²⁵Jerusalem toŋi yeŋgöreŋök tosatŋan kewö jiget, “Azi kapaŋ köla qebingö mötmörizei, yaŋön mönö mia me?

²⁶Eket, yaŋön ambazip jeŋine aukŋe keu jiiga qahö jim waŋgize. Mewögöra azi kiaŋön Amötqeqe Toŋi Kraist akzawi, keu mi ölŋa galömkölköl azi yeŋgö kezapŋine geiga mötze me qahö?

²⁷Amötqeqe Toŋi Kraistnöŋ kamapköra jiba kota malgeri, yaŋön ‘Denikeyök asuhumawi, mi kunöŋ kun qahö mötma,’ jizemö, azi kiaŋön denikeyök asuhuyöhi, mi mönö ölöp mötzin.”

²⁸Mewö eraum mötketka Jisösnöŋ jöwöwöl jikegö tohoŋ uruŋe kinda imbiŋi memba wahöta kusum eŋgiba keu kewö jiyök, “Iŋini nöŋgöra kewö jize, ‘Azi mi möt waŋgiba miriŋi denikegö mi ölöp mötzin.’ Nani kukösum qakŋe qahö asuhuba kinjal. Melaim niŋgiyöhi, yaŋön melaimelai Toŋi ölŋi aiga i qahö möt kutum waŋgiba malje.

²⁹Yaŋön melaim niŋgiiga yaŋgöreŋök eralaŋgöra i ölöp möt waŋgizal.”

³⁰Mewö jiiga i memba jöhöbingö mötketmö, nalöŋan qahö kam kuŋguyöhaŋgöra aka kunŋan sileŋe qahö meyök.

³¹Mewö mötketmö, ambazip kambu yeŋgöreŋök gwötpukŋan möt narim waŋgiba kewö jiget, “Kraistnöŋ kamawi, yaŋön mönö azi ki oŋgita aŋgöletot memba malma me denöwö? Mewö tandök akza.” Mewö.

³²Ambazip kambu yeŋön Jisösgöra mewö goranora jiba jitnakölik akeri, mi Farisi (Köna keugö kapaŋkölköl) yeŋön mötket. Mi möta jike nup galöm yembuk kinda naŋgu galöm (sikiriti) tosatŋi melaim eŋgigetka memba jöhöbingö kaget.

³³Kagetka Jisösnöŋ kewö jiyök, “Nöŋön embuk nalö töröptökŋi toroqeba malmam. Mi malagun eŋgömosöta melaim niŋgiiga erali, mönö yaŋgöreŋ liliŋgöba öŋgömam.

³⁴Öŋgöbiga göraim niŋgiba malmemö, ni qahö miwikŋaim niŋgime. Nöŋön miri malmami, iŋini miaŋgöreŋ kabingö osime.”

³⁵Mewö jiiga Juda jitŋememe yeŋön sutŋine kewö erauget, “‘Nini miwikŋaim waŋgibingö osibin,’ jiza. Miaŋgöra mönö denikeaŋgöreŋ öŋgömamgöra jiza? Juda ambazip tosatŋan deŋda kantri tosatŋe anda Grik yeŋgö sutŋine maljei, mönö yeŋgöreŋ anda Grik ambazip kusum eŋgimamgö möta jiza me?

³⁶Keu kewö jiza, ‘Göraim niŋgiba malmemö, ni qahö miwikŋaim niŋgime,’ aka keu kun kewö jiza, ‘Nöŋön miri malmami, iŋini miaŋgöreŋ kabingö osime.’ Keu yahöt mietkö könaŋiri denöwö?”

³⁷Mewö eraugetmö, kendon söŋgaigeri, miaŋgö wehön qöndökŋi ketaŋi miaŋön kam kuŋguiga Jisösnöŋ kinda köhöikŋanök qeta kewö jiyök, “Kunŋan ogöra kömuzawi, yaŋön mönö nöŋgöreŋ kaba nema.

³⁸Buŋa Kimbigö keu kun kewö ohoget ahöza, ‘Kunŋan ni möt narim niŋgizawi, yaŋgö uruŋeyök malmal köhöikŋaŋgö oŋan mönö tohoba saksaköba kaŋgorakŋa.’”

³⁹Mewö jiyökmö, keu mi Uŋa Töröŋaŋgöra aka kewö jiyök, “Denike eŋön ni möt narim niŋgizei, iŋini mönö Uŋa Töröŋi buŋa qem aŋguba malme.” Anutunöŋ Jisös gölmenöŋ malöhaŋgö dop Suepkö asakmararaŋi qahö al waŋgiiga malök. Miaŋgöra Uŋa Töröŋi qahö melaiiga eta uruŋine geiga öne malget. Mewö.

⁴⁰Jisösnöŋ mewö jiiga ambazip kambu yeŋgöreŋök tosatŋan keu mi möta kewö jiget, “Azi kiaŋön mönö ölŋa kezapqetok azi asuhumapkö jigeri, mönö mia akza.”

⁴¹Tosatŋan jiget, “Yaŋön Amötqeqe Toŋi Kraist akza.” Mewö jigetmö, tosatŋan qetala jiget, “Kraistnöŋ mönö denöwö Galili prowinsnöhök kabawak? Mi qahö dop kölja.

⁴²Buŋa Kimbinöŋ kewö jiza, ‘Kiŋ Deiwidnöŋ Judia prowinsgö taon moröŋi Betlehem miaŋgöreŋ malöhi, Kraistnöŋ miaŋgöreŋök asuhuba Deiwidkö gwölönarökurupŋi yeŋgöreŋök kunŋan akŋa.’”

⁴³Mewö mewö laŋ jigetka ambazip kambu yeŋön Jisösgöra aka jula deŋget.

⁴⁴Yeŋgöreŋök tosatŋan memba jöhöbingö mötketmö, kunŋan sileŋe qahö meyök. Mewö.

⁴⁵Jöwöwöl jikegö kiripo galöm (sikiriti) yeŋön liliŋgöba jike nup galöm aka Farisi (Köna keugö kapaŋkölköl) yeŋgöreŋ kagetka kewö jim eŋgiget, “Iŋini wuanöŋgöra i qahö memba kaze?”

⁴⁶Jim eŋgigetka kewö meleŋget, “Azi miaŋön keu jimakzawi, kunŋan nalö kunöŋ keu tandökŋi mewöŋi qahö jiyök.”

⁴⁷Mewö meleŋgetka Farisi (Köna keugö kapaŋkölköl) yeŋön qesiba jim eŋgiget, “Iŋini tok eŋololoŋ ak eŋgii malje me?