Jon 7:8-41

⁸Gam la una tel inen. Iau tom biil ian tatkau una tel inen ae, wara le aunbiing tutus kiak, biil biitom i tapiek.”

⁹Ka use ta u arae, ma ka melmel fis tom na Galili.

¹⁰Isau le, namih sau lon foron tualik ri ka la tah una tel inen, Iesu ka la sabin, isau le biil i la na malal, i la mumun sau.

¹¹Ke foron famfamu ken fan Iudaia ri ka famam parpar isi awii na tel inen ae, ma ri ka diik aragii le, “Fiawah mang e kaltu ae?”

¹²Ma gur na fanu ae ri ka famam ngurke Iesu na fatpoto ri. Fal ri ka tara le, “I rokap na kaltu.” Ma fal ri ka tara le, “I famam lame fager fanu.”

¹³Isau le biil tikas ik use ti tier ulo na matan fanu tikii, wara le ri sokeh foron famfamu ken fan Iudaia.

¹⁴Na fatpoton foron biing na tel inen ae, Iesu ka tatkau una Felun Sising ma ka tanwaran fausum fanu.

¹⁵Foron famfamu ken fan Iudaia ri ka lala bitit, ma ri ka diik le, “Kaltu igii, arafah i kep u arae e tasum igii ma biil i fafausum tah?”

¹⁶Iesu ka kiliis ri aragii, “Sanih ia tel fafausum ini, biil e fafausum kiak tom. Biil. I la tom sing seh ae i wuun ta iau.

¹⁷Le tikas i ier le in tel tier God i ier isi, ke in par failiim u le foron fafausum kiak, i la tom sing God, le ia use u ini wolwol kiak tom.

¹⁸Seh i orek ini wolwol kia tom, i tel u isi fanu tikii rik sik asa. Isau le seh i tel foim una sik asa ier ae i wuun ta u, i e kaltu na orek tekentu. Ma biil ti famfabal lo.

¹⁹Tekentu kanaka, ia fas gam, Moses i ta ta u e nagogon sing gam. Isau le, biil tom tikas lo gam i misuut na nagogon. Isi sanih gam ka totof isi siimete iau?”

²⁰Gur na fanu ae ri ka kiliis u aragii, “Imel e tanwa laulau i susuef o. Seh i totof isi siimete wo?”

²¹Iesu ka kiliis ri aragii, “Ia tel ta nenge rakrakai na fakileng na Biingen Mangeh, ma gam tikii gam ka lala bitit.

²²Isau le, fal e aunbiing gam kiit fal e kalalik la na Biingen Mangeh, wara Moses i ta ta nagogon na fakiit ae usuf gam. Isau le biil i la tah sing Moses, i la tom sing foron tubutamat gam.

²³Ke, male nenge kalalik, ri kiit u na Biingen Mangeh, isi le nagogon ke Moses gong ri lek u, isi sanih gam ka ngaliaf ulo iau i wara le ia faliu tikii u e kaltu ae na Biingen Mangeh?

²⁴Gong gam fule foron tier na parpar kimi sau. Gamen fule foron tier ini tortores na wolwol.”

²⁵Wara na foron tier ae Iesu i use ta u, pesu fal e fanu na Ierusalem ri ka tipes diik le, “I sau e kaltu igii ae ri famam totof le rin siimete u?

²⁶Par u, i ororek malal na matan fanu, ma foron famfamu biil ri use ti tier ulo. Arafah, ri usum ngan le, i e Mesaia?

²⁷Isau le, kere usum sau le kaltu igii tingah, ma na aunbiing ae Mesaia in tapiek, biil tikas in usum le i tingah.”

²⁸Na aunbiing Iesu i famam tel fafausum kia biitom na palgan ubiif kale Felun Sising, ke ka perek aragii, “I tekentu le gam usum lo iau ma ia tingah. Biil ia la uga ini wolwol kiak tom. Biil. Isau le seh ae i wuun ta iau i tekentu kanaka. Biil gam usum lo.

²⁹Isau le ia usum lo, wara le ia la tinbae sing i, ma i wuun ta iau.”

³⁰Aunbiing ka use ta u aragii, ri ka totof le rik luse u, isau le biil tikas i luun lima lo, wara le aunbiing kia biil biitom i tapiek.

³¹Isau le ifuun e fanu na palgan gur ae ri unune lo. Ke ri ka tara aragii, “Aunbiing Mesaia in tapiek, in fatapiek in fuun e rakrakai na fakileng sabin lo kaltu igii, le biil? Awii biil. Ier sangan igii e Mesaia?”

³²Foron Farasi ri ka ongen gur na fanu ae ri famam ngurke foron orek igii lo Iesu. Ke foron famfamu ken foron pris turan foron Farasi ri ka wuun foron tom parpar kale Felun Sising isi rin luse u.

³³Pesu Iesu ka fas ri le, “Ian kiis tura gam na fatuklin aunbiing sau, ma namih ian la usuf seh ae i wuun ta iau.

³⁴Gamen im isi iau, isau le biil gamen tafe iau, ma falifuh ae ia kiis lo, biil i fasih gamen la ulo.”

³⁵Fan Iudaia ri ka orek fis tom na fatpoto ri le, “Kaltu igii i ier le in la uwah, ae biil i fasih keren tafe u? Arafah, in la usuf foron fanu kirer ae ri kiis sararah na foron maleh tikii na Grik, ma ik fausum fan Grik?

³⁶Sanih e kamtinan orek kia aunbiing i tara le, ‘Gamen im isi iau, isau le biil gamen tafe iau,’ ke ‘Falifuh ae ia kiis wah, biil i fasih gamen la ulo’?”

³⁷Na farfarop na biing na tel inen, i arae tara na biing, ma Iesu ka tih ma ka perek aragii, “Male seh i metdan, ke ik la usuf iau isi ik in.

³⁸Seh i unune lo iau, foron dan na liu in ring suuh tinawii sing i, arae Buk na Gogoh i use ta u.”

³⁹Ma Iesu i use u arae isi Tanwa Kalkaluu, ae fanseh ri unune lo, rin kep u. Aunbiing ae, God biil biitom i ta ufu Tanwa Kalkaluu, wara le memeh ke Iesu biil biitom i tapiek malal.

⁴⁰Aunbiing fal e fanu ri ka ongen u ka orek arae, ke ri ka tarah, “Tekentu kanaka, kaltu igii i e poropet ae Buk na Gogoh i fafas ta ini.”

⁴¹Fal ri ka tara le, “I e Mesaia.” Isau le fal ri ka tarah, “Mesaia biil in la tina Galili.