Jon 7:6-33

⁶I mo ra o Iesu i watungi tandet lena, “Anung a du bung ke sot utmakai, sur an nan una kum lamlabino bung na lotu, ikut torom mot, anumot a kum du bung i langolango kut.

⁷A taro tagun a rakrakon bual ka det in nget mot, ikut det nget iau, uni a inanos det una nundet a kum sakino petutna.

⁸Mot, mot in nan usapat una kum lamlabino bung na lotu. Ikut iau, kan nan lakit sur a kum lamlabino bung na lotu ri, uni anung a du bung ke sot utmakai.”

⁹Ra i sa wasiso taru, i kis sikot tong o Galili.

¹⁰Ra a kum tistisin o Iesu det sa wan sur a kum lamlabino bung na lotu, numur o Iesu i mur det, ikut ke upuaso i torom a taro. I wan eno nanan kut.

¹¹A ramano kum te Juda det sisio sur o Iesu una kum lamlabino bung na lotu, det iting lena, “A musano ri awai i?”

¹²A susut na taro det wasiso eno un o Iesu. Ara taro det watungi uni lena, “I ara wakak na musano,” ma ara taro kai det watungi lena, “Awu, i ben raro a taro.”

¹³Ikut kataio i wasiso puaso uni, uni det ngaran a ramano kum taro Juda.

¹⁴Ra det sa kis epotor una kum lamlabino bung na lotu, o Iesu i turpasi sur in ususer a taro ubalan in noworo ina rumu na etabor.

¹⁵A ramano kum te Juda det kisin doko ra det watungi lena, “A musano ri ke etowo pas. Ikut i tasman petlan a kum utna ri?”

¹⁶O Iesu i balu det lena, “Anung a kum etowo, ra a ususer a taro nami, awu sur anung, anun o naro ra i tulu ru iau urin.

¹⁷Osi ra i nem na mur a nemnem anun o God, in tasmani lena anung a kum etowo i wan tagai. I wan tagisapat tan o God, o a nuknuking kut.

¹⁸Osi ra i wasiso kut nama nuknukino, i nemi kut sur din ulabo pasi. Ikut iau, a nemi sur din ulabo pas o God ra i tulu ru iau urin. A wasiso nama lingmulus, ma katu torotoro i kis un iau.

¹⁹O Moses i sa pitar tar a Warkurai tamot, ikut kataio tagun mot i muri. Sur asau ra mot nem na um doko iau?”

²⁰A kunur na taro det balu i lena, “A laulau na nion kura un ui. Osi i nem na um doko ui?”

²¹O Iesu i balu det lena, “A pam ara utna na ukisin, ma mot rop mot kisin uni.

²²O Moses i pitar tar a warkurai tamot sur mot in tok talilis a kum nat musano. Ikut a warkurai ri, awu sur anun o Moses, a taro ut tagun numugu det turpasi. Ma a ramano kum du bung utkai mot tok talilis a natlik una Bung na Sabat.

²³Mot ser tok talilis una Bung na Sabat, sur gong di lakai a warkurai anun o Moses. Ra mot pami lenra, sur asau ra mot kankan torom iau ra a ulangolango pas a kudulano musano una Bung na Sabat?

²⁴Gong mot warkurai kut nama matmata mot, mot in warkurai nama warkurai ra i tokodos.”

²⁵Ara taro tagisapat o Jerusalem det iting lena, “I mo ri a musano ra det nem na um doko i?

²⁶Tama i, iri i tur ma i wasiso umatan a taro, ma ka det wasiso balu i. Pepetlai, kutiro a kum mugumugu det sa tasmani lena i a Karisito?

²⁷Ra a Karisito in nanpat, ka din tasmani lena in nanpat tagai. Ikut a musano ri dat tasmani kut anun a tamon.”

²⁸O Iesu i ususer utmakai ubalan in noworo ina rumu na etabor, i wasiso namin labino walngano ma i watungi lena, “Pepetlai, mot tasman mulus iau ut, ma a tamon kai ra a wan taguni? Ka wanpat urin una nuknuking. O naro ra i tulu ru iau, i watung a lingmulusino. Ma mot, ka mot tasman o naro ra.

²⁹Ikut iau, a tasmani, uni a wan ut tagisapat tano, ma i ut i tulu ru iau.”

³⁰I mo ra a kum te Juda det nemi sur det in pam ukai pasi, ikut kataio i pami, uni anun a du bung ke sot utmakai.

³¹A susut tagun a kunur na taro det nurnur uni, ra det watungi lena, “A musano ri i pam tar a susut na utna na ukisin. Pepetlai, kutiro a Karisito ut ri?”

³²A kum Parisi det longoro a taro det waswasiso eno lenri un o Iesu, ra a kum lamlabino tene etabor torom o God, ma a kum Parisi, det tulu ru a kum tene tamtamabat tagun a rumu na etabor, sur det in pam ukai pasi.

³³Ra o Iesu i watungi tandet lena, “Iau kan kis suano i nin nisamot, an milet melet torom o naro ra i tulu ru iau urin.