Text copied!
CopyCompare
Buk Baibel long tokples Kandas - Jon - Jon 7

Jon 7:4-41

Help us?
Click on verse(s) to share them!
4Kataio i ser pam eno a kum utna, ra i nemi sur a taro det in tasmani. U ser pam a kum utna ri, in wakak ra un pam puaso i sur a taro una rakrakon bual rop det in tasman ui!”
5A kum tistisino det wasiso lenri, uni det kai ka det nurnur uni.
6I mo ra o Iesu i watungi tandet lena, “Anung a du bung ke sot utmakai, sur an nan una kum lamlabino bung na lotu, ikut torom mot, anumot a kum du bung i langolango kut.
7A taro tagun a rakrakon bual ka det in nget mot, ikut det nget iau, uni a inanos det una nundet a kum sakino petutna.
8Mot, mot in nan usapat una kum lamlabino bung na lotu. Ikut iau, kan nan lakit sur a kum lamlabino bung na lotu ri, uni anung a du bung ke sot utmakai.”
9Ra i sa wasiso taru, i kis sikot tong o Galili.
10Ra a kum tistisin o Iesu det sa wan sur a kum lamlabino bung na lotu, numur o Iesu i mur det, ikut ke upuaso i torom a taro. I wan eno nanan kut.
11A ramano kum te Juda det sisio sur o Iesu una kum lamlabino bung na lotu, det iting lena, “A musano ri awai i?”
12A susut na taro det wasiso eno un o Iesu. Ara taro det watungi uni lena, “I ara wakak na musano,” ma ara taro kai det watungi lena, “Awu, i ben raro a taro.”
13Ikut kataio i wasiso puaso uni, uni det ngaran a ramano kum taro Juda.
14Ra det sa kis epotor una kum lamlabino bung na lotu, o Iesu i turpasi sur in ususer a taro ubalan in noworo ina rumu na etabor.
15A ramano kum te Juda det kisin doko ra det watungi lena, “A musano ri ke etowo pas. Ikut i tasman petlan a kum utna ri?”
16O Iesu i balu det lena, “Anung a kum etowo, ra a ususer a taro nami, awu sur anung, anun o naro ra i tulu ru iau urin.
17Osi ra i nem na mur a nemnem anun o God, in tasmani lena anung a kum etowo i wan tagai. I wan tagisapat tan o God, o a nuknuking kut.
18Osi ra i wasiso kut nama nuknukino, i nemi kut sur din ulabo pasi. Ikut iau, a nemi sur din ulabo pas o God ra i tulu ru iau urin. A wasiso nama lingmulus, ma katu torotoro i kis un iau.
19O Moses i sa pitar tar a Warkurai tamot, ikut kataio tagun mot i muri. Sur asau ra mot nem na um doko iau?”
20A kunur na taro det balu i lena, “A laulau na nion kura un ui. Osi i nem na um doko ui?”
21O Iesu i balu det lena, “A pam ara utna na ukisin, ma mot rop mot kisin uni.
22O Moses i pitar tar a warkurai tamot sur mot in tok talilis a kum nat musano. Ikut a warkurai ri, awu sur anun o Moses, a taro ut tagun numugu det turpasi. Ma a ramano kum du bung utkai mot tok talilis a natlik una Bung na Sabat.
23Mot ser tok talilis una Bung na Sabat, sur gong di lakai a warkurai anun o Moses. Ra mot pami lenra, sur asau ra mot kankan torom iau ra a ulangolango pas a kudulano musano una Bung na Sabat?
24Gong mot warkurai kut nama matmata mot, mot in warkurai nama warkurai ra i tokodos.”
25Ara taro tagisapat o Jerusalem det iting lena, “I mo ri a musano ra det nem na um doko i?
26Tama i, iri i tur ma i wasiso umatan a taro, ma ka det wasiso balu i. Pepetlai, kutiro a kum mugumugu det sa tasmani lena i a Karisito?
27Ra a Karisito in nanpat, ka din tasmani lena in nanpat tagai. Ikut a musano ri dat tasmani kut anun a tamon.”
28O Iesu i ususer utmakai ubalan in noworo ina rumu na etabor, i wasiso namin labino walngano ma i watungi lena, “Pepetlai, mot tasman mulus iau ut, ma a tamon kai ra a wan taguni? Ka wanpat urin una nuknuking. O naro ra i tulu ru iau, i watung a lingmulusino. Ma mot, ka mot tasman o naro ra.
29Ikut iau, a tasmani, uni a wan ut tagisapat tano, ma i ut i tulu ru iau.”
30I mo ra a kum te Juda det nemi sur det in pam ukai pasi, ikut kataio i pami, uni anun a du bung ke sot utmakai.
31A susut tagun a kunur na taro det nurnur uni, ra det watungi lena, “A musano ri i pam tar a susut na utna na ukisin. Pepetlai, kutiro a Karisito ut ri?”
32A kum Parisi det longoro a taro det waswasiso eno lenri un o Iesu, ra a kum lamlabino tene etabor torom o God, ma a kum Parisi, det tulu ru a kum tene tamtamabat tagun a rumu na etabor, sur det in pam ukai pasi.
33Ra o Iesu i watungi tandet lena, “Iau kan kis suano i nin nisamot, an milet melet torom o naro ra i tulu ru iau urin.
34Mot in sisio sur iau, ikut ka mot in sio pas iau, ma ka mot in nan lar pas kai una tamon ra an kis iai.”
35A ramano kum te Juda det ting etetalai det lena, “A musano ri in nan mo urai, ra ka dat in sio lar pasi? Pepetlai, in nan sur a kum tamon anun a taro Grik ra anundat a taro det kis iai? Kutiro in ususeri mo a taro Grik?
36Uni i watungi lena dat in sisio suri ikut ka dat in sio pasi, ma ka dat in nan lar pas kai una tamon ra in kis iai. Asau a kukurai ina nun a wasiso ri?”
37A ururop na bung ina kum lamlabino bung na lotu, i a labino bung sakit. Una bung ra, o Iesu i tur ma i wasiso namin labino walngano, i watungi lena, “Osi ra i muruk, i wakak sur in nan torom iau ma in inum.
38Osi ra i nurnur un iau, ‘a kum danim na nilaun det in sal pat tagun anun a nilaun,’ elar nami ra di sa tumus tari una Buk Tabu.”
39Una wasiso ri, o Iesu i wasiso una Tokodos na Nion. Ka di pitari utmakai a Tokodos na Nion, uni o Iesu ke losi utmakai anun a minamar. Numur, det ra det nurnur un o Iesu, din tabor det nami.
40Ara taro tagun a kunur na taro ra det longoro a wasiso ri, det watungi lena, “A lingmulus ut, a musano ri, i a poropet ra o God i tulu ru i urin.”
41Ara taro kai det watungi lena, “I a Karisito.” Ma ara taro kai det watungi lena, “Awu. A Karisito ken nanpat tagitong o Galili.

Read Jon 7Jon 7
Compare Jon 7:4-41Jon 7:4-41