Jon 7:36-48

³⁶I atongi mang dalar tai suri pa bel dalar oroi teteki, pa bel dalar han otleng ana hanua ning ir kes ia. Asa kamkamna warwara ne?”

³⁷Ana ararop a pukakiar tagun a Lotu na Palturturup, a pukakiar ning i ngangaten, e Iesu i tur pa i warwara kol mange, “Ning tik ir mos, i wakak sur ir han tetek iau pa ar agangi.

³⁸Esining ir tortorot hok, ‘a malum na lalaun lar dun ot tagun anuna lalaun,’ larning di ka tumus tari ting na Buk Tabu.”

³⁹E Iesu i warwara ana Talngan Tabu, ning dir tabar la ono ning la tortorot onoi. Belot di saran a Talngan Tabu, anasa e Iesu belot i kibas anuna matatar.

⁴⁰Dingla na taraila tagun a kunum ning la longor a warwara ne, la atongi mange, “A momolna ot, a barsan ne a propet ning e God i sune i ute.”

⁴¹Dingla na tarai otleng la atongi mange, “Ai a Karisito.” Pa dingla otleng la atongi mange, “A Karisito bel ir hanot mitimo e Galili.

⁴²A Buk Tabu i atongi mange, Karisito ir hanot ana mangis a tarai ane Dewit. Ir hanot tumo e Betlihem, a hanua ning nating e Dewit i kes ia.”

⁴³Pa la taptapagal anasa o e Iesu.

⁴⁴Dingla na tarai la mang sur lar tong akesi, ika bel ta halinla i tol asoti.

⁴⁵Ning na tena tai alar tagun a rumai a artabar la ulak, a leklek a tena artabarla tetek e God pa Parisaiola la deken la mange, “Sur asa ning bel mulo dat pas e Iesu ute?”

⁴⁶A tena tai alarla tagun a rumai a artabar la keles la mange, “Bel tik i sira warwara lar a barsan ne!”

⁴⁷A Parisaiola la deken la mange, “Mangmangasa, mulo otleng i ka ben rongon pas mulo?

⁴⁸Mangmangasa mulo nuki mang ta halimila a ningnigola pa a Parisaiola i ka tortorot onoi? Belal!