Jon 7:21-51

²¹Jises tiye i tiri i buku doh, “Jo bwidi lahou tinan ari, eme mani aha atur ta aliy.

²²Moses mene tiye i taha ta sani ku-i nadu aha iri. (Kandriyen doh basahan ta Moses bwe. Kandriyen doh udu ndra bada tubu aha iri.) Arile aha asan ku-i nadu aha iri udu bolo len ta amunyau.

²³Buku sani ku-i nah mwan udu bolo len ta amunyau, taha tanan, kandriyen malen ta Moses bandra-i bwe. Taha kede-eh an hamon le ta kandriyen handru ta Moses. Ya buku sah ja aha abolosen eme tek ta jo bwidi ndramak ari amwenen ja udu bolo len ta amunyau?

²⁴Aha ka-iy seleya lakou na mada aha le. Aha kaseleya iri lakou marakon ki-in san ta kandriyen mwasin.”

²⁵Lau rayah badu Jerusalem lelen, “Sebwe iy ndramak kede-eh iri anya kadi iy kimek a nadeh?

²⁶Iy ales, iri ndranyolom iy, ma iri ndranuhun iy leheya iri lau. Ma iri kabin tiri Juwis basehek ari sahou bala tan bwe. Kora-on iri kabin ndratanan iy ndramwenen, ma iri anya, iy ndramak kede-eh Mesaya handru.

²⁷Arile bwe, ahi tanan iy badu heh handru. Arile, len ta Mesaya handru ta eme hamon kameh ari ndramak winiya bala tanan, iy udu heh eme, bwe.”

²⁸Jises leheya iri kahis le udu ndra bolo asiu tinan ta Kindrei. Iy asehek sahou bohon a tinan i loken, “Ya, aha tanan jo ma aha tanan jo badu heh handru. Jo bame dah na boto-on tek amwenen bwe. Tama suni jo eme, ma iy badeh, handru. Aha tanan tama bwe,

²⁹arile jo tanan iy, tasah jo badu hawen. Iy le adeh suni jo eme.”

³⁰Jises asehek sahou le badeh, eme iri lau rayah ame anya kateu iy. Arile ari ndramak batehei minen bala badan bwe, tasah idoh bamwenen ta len tan bwe le.

³¹Arile, iri lau solo-an labai atehei budon tiri ili ta Jises. Iri suburuk i buku doh, “Buku Mesaya keme, iy kameh amekes iri lahou tinan ma kalem solo-an. Arile, iy Jises kede-eh ja, iy amekes iri lahou tinan ma kalem solo-an labai ja. Sebwe iy Jises kede-eh, iy Mesaya nadeh?”

³²Iri Parasi ndranuhun iri lau rayah nane suburuk ta nyala Jises. Eme iri ala hawe iri tinan tiri pris, suni iri lau ta atondrok asiu tinan ta Kindrei kala katawi Jises.

³³Jises eme asehek i tiri i buku doh, “Jo kameh bado hawe aha luluwen bwe. Jo kameh iu ili hawe are lau iy nane suni jo eme.

³⁴Aha kameh asilah jo, arile aha winiyan basilahei jo bwe. Ma aha kameh winiyan bame kon kameh jo ilih aliy bwe.”

³⁵Iri Juwis rayah asehek amunum le ili tiri ari ari i buku doh, “Iy ndramak kede-eh anya iy kameh ili kon rakon doh, kameh taha winiyan basilahei iy bwe. Iy kameh ilih saba kon handru? Kora-on iy ki-iu kili bolo kon tinan tiri Grik, iri lau tataha rayah ado aliy? Kora-on iy kili kaleheya iri nadeh?

³⁶Iy ndramak kede-eh asehek i buku doh: Taha kameh asilah iy, arile taha winiyan basilahei iy bwe. Ma taha kameh winiyan bala kon iy ilih aliy doh bwe. Kati sahou tan kede-eh, tasah handru?”

³⁷Mirihik ta len tinan tiri Juwis ta nyamon tinan tiri anya kano. Jises eme suri iy ere loken, ma iy asehek sahou i tinan i buku doh, “Buku are lau balen asamar, iy keme hawek ka-un gwa.

³⁸Buku are lau iy atehei budon tan mara-ei eme tek, idah kameh gwa kaloh udu bolon amou eme len. Idah i buku buk ndrabun ndrasehek.”

³⁹Jises asehek nyala Malawin Ndrabun. Buku are lau iri atehei budon tiri in tan, hamon kameh iri akohok Malawin Ndrabun. Udu ndra bada len doh Jises bala hamon bala kandrah, ta Kindrei leheya lomadan i tan bwe le. Eme ma Malawin Ndrabun bame andri bwe.

⁴⁰Iri lau anuhun sahou badu bohon eme ma iri rayah asehek, “Handru labai, iy ndramak kede-eh badeh, propet.”

⁴¹Iri lau anya, “Iy ndramak kede-eh Mesaya.” Iri rayah ndremenya ja, “I buku sah handru Mesaya udu Galili eme?

⁴²Buk ndrabun ndrasehek, Mesaya kameh asahan boho kamen ta Debit. Ma buk ndrabun asehek ale ta Mesaya kameh asahan Betlehem kon tinan ta Debit bwena mene udu aliy.”

⁴³Eme ta Jises le badeh, bwidi iri lau apou iri.

⁴⁴Iri lau rayah badeh anya kateu iy, arile mine iri bala se badan bwe.

⁴⁵Iri lau ta atondrok asiu tinan ta Kindrei ala hamon hawe iri pris ma iri Parasi. Iri ame ndremenya oro, “Buku sah handru ado batawi Jises bame bwe?”

⁴⁶Oro lau ta atondrok asiu tinan ta Kindrei anya, “Ei, ari ndramak basehek sahou bala buku iy ndramak doh asehek bwe!”

⁴⁷Iri Parasi tiye ili toro i buku doh, “Sebwe iy ndrawendreya ado ale nadeh?

⁴⁸Ya, ado ndranyolom, iri Parasi ma iri pris badeh, batehei budon tiri handru bala tan bwe.

⁴⁹Arile, iri lau laleyah badeh, tanan kandriyen malen ta Moses mene bwe. Idah kameh losen ta Kindrei udu bwele-e iri.”

⁵⁰Nikodemus badeh, ndrala bwena ndratou Jises. Iy badu hawe iri ale. Iy eme ndremenya iri i buku doh,

⁵¹“Buku sah, kandriyen malen tataha kede-eh winiyan atehei ari ndramak i ta mada sahou, buku taha banuhun iy bwe, ma taha bala tana taha ta saba lakou handru, iy bwidiy andra-i?”