Jon 7:1-33

¹Lamur e Iesu i taltal ana hanhanuala tumo e Galili. Bel i mang sur ir taltal saot ana papar Judia, anasa dingla na Juda la sang sur lar umkoli.

²Ning a Lotu na Palturturup anuna tarai Judala ka milau,

³na tastasna e Iesu la atai i mange, “I wakak sur ur kamtur mite pa ur han usaot e Judia sur anuma kakak a asaer lar oroi a ututna na kulkulan ning ur toli.

⁴Ning tik i mang sur a tarai lar tasmani, bel i sira tol kumnan a ututnala. Ning u sira tol a ututnala ne, i wakak ning ur tol talapori sur a taraila ana rakrakan hanua rop lar tasman u!”

⁵Na tastasna la warwara larne, anasa la otleng bel la tortorot onoi.

⁶E Iesu i atai la mange, “Anuk a taem belot i sot sur ar han, ika tetek mulo, a pukakiarla i langolango ka sur mulor han.

⁷A taraila ana rakrakan hanua bel lar nget mulo, ika la nget iau, anasa a atai la ana nunla na toltol laulaula.

⁸Mulo, mulor han usaot ana Lotu na Palturturup. Iau bel ar han kapit, anasa anuka taem belot i sot.”

⁹Ning ka warwara tar, i kes suai tumo e Galili.

¹⁰Ning na tastasna e Iesu la ka han sur a Lotu na Palturturup, e Iesu i mur la, ika bel i asangan talapori tetek a taraila. I han kumna ka.

¹¹Dingla na Juda la tai sur e Iesu tingia na lotu, la deke mang, “A barsan ne kanahaia?”

¹²A galis a tarai la wasisik o e Iesu. Dingla na tarai la atongi mang, “I a wakak a barsan,” pa dingla otleng la atongi mang, “Belal, i sira asongo a taraila ka.”

¹³Pa bel tik i warwara talapor onoi, anasa la matatan dingla na tarai Juda.

¹⁴Ning la ka kes potor ana pukakiarla na Lotu na Palturturup, e Iesu i kas uting ui ana rumai a artabar, pa i turpas a asaer a taraila.

¹⁵Dingla na Juda la kulkulan kol pa la deke mange, “A barsan ne bel i asasaer pas. I tasman mangmangasa a tastasmanla ne?”

¹⁶E Iesu i keles la mange, “A asasaerla ne a asaer ono, bel anuki, anun esaning i sune iau ute.

¹⁷Ning tik i mang sur ir mur a nuknukna e God, ir tasman lalani, mang anuka asasaer ne ta e God, o tagun a nuknukik ka.

¹⁸Esining i warwara ka ana nuknukna, i mang ka sur dir aleklek pasi. Ika esining i mang sur dir aleklek pas e God ning i sune i ute, i atong a momolna, pa bel ta asasongo tingia.

¹⁹E Moses ka saran tar a Warkuraila ta mulo, ika bel tik ta halimulo i muri. Sur asa ning mulo mang sur mulor umkol iau?”

²⁰A kunum a tarai la kelesi mange, “A mot ka solong tar u. Esi i mang sur ir umkol u?”

²¹E Iesu i keles la mange, “A tol ning a utna na kulkulan, pa mulo kulkulan rop onoi.

²²E Moses i saran tar a warkurai ta mulo sur mulor kot a palaona kakak barsanla. Ika a warkurai ne, bel ane Moses, a taraila ot nating la turpasi. Pa dingla na Pukakiar Sabat otleng mulo kot a palaona kakak barsanla.

²³Mulo sira kot a palaona kakak barsanla ana Pukakiar Sabat, sur gong di lakai a warkurai ane Moses. Ning mulo toli larne, sur asa mulo balakut tetek iau ning a alangolango pas a barsan ana Pukakiar Sabat?

²⁴Gong mulo warkurai ana numulo na tatatai ka, mulor warkurai ana warkurai ning i tostos.”

²⁵Dingla na tarai misaot e Jerusalem la deke mange, “I ka a barsan ning la mang sur lar umkoli, gepi?

²⁶Oroi, onone i tur pa i warwara namatana taraila, pa bel la kelesi. Ngandek a ningnigo la ka tasmani mang i a Karisito?

²⁷Ning a Karisito ir hanot, bel tik ir tasmani mang ir hanot mitaha. Ika a barsan ne dala tasman a hanua ngasna ka.”

²⁸Kaning ot e Iesu i asasaer ana rumai a artabar, i warwara kol mange, “Mangmangasa mulo tasman momol iau ot, pa a hanua otleng ning a han kusuni? Bel a hanot ute ana nuknukik. Esaning i sune iau i atong a momolna. Pa mulo, bel mulo tasman esaning i sune iau.

²⁹Ika iau, a tasmani, anasa a han miting tana pa i ot i sune iau.”

³⁰Pa Judala la mang sur lar tong akes pasi, ika bel tik i toli, anasa anuna taem belot i sot.

³¹A galis tagun a kunum a tarai la tortorot o e Iesu pa la atongi mange, “A barsan ne i tol tar a galis a akinalangla. Ngandek e Karisito ot ne?”

³²Ning a Parisaiola la longor a kunum a tarai la wasisik larne o e Iesu, io, a leklek a tena artabarla pa a Parisaiola, la sune sen a tena tai alarla tagun a rumai a artabar, sur lar tong akes pasi.

³³Pa e Iesu i atai la mange, “Bel ar kes bongnan iau napirimulo, ar han ulak tetek esaning i sune iau ute.