Jon 7:1-20

¹Numur o Iesu i wan tuptupukus una kum tamon tong una papor Galili. Ke nem na wan tuptupukus una papor Judia, uni a ramano kum te Juda det epak sur det in um doko i.

²A kum bung na lotu anun a taro Juda, ra di watungi nama kum lamlabino bung na lotu na turturup, i sa milau.

³Ra a kum tistisin o Iesu det watungi tano lena, “I wakak sur un nan taginin ma un nan usapat o Judia sur anum a taro na ususer det in tama a kum pinapam ra un pami.

⁴Kataio i ser pam eno a kum utna, ra i nemi sur a taro det in tasmani. U ser pam a kum utna ri, in wakak ra un pam puaso i sur a taro una rakrakon bual rop det in tasman ui!”

⁵A kum tistisino det wasiso lenri, uni det kai ka det nurnur uni.

⁶I mo ra o Iesu i watungi tandet lena, “Anung a du bung ke sot utmakai, sur an nan una kum lamlabino bung na lotu, ikut torom mot, anumot a kum du bung i langolango kut.

⁷A taro tagun a rakrakon bual ka det in nget mot, ikut det nget iau, uni a inanos det una nundet a kum sakino petutna.

⁸Mot, mot in nan usapat una kum lamlabino bung na lotu. Ikut iau, kan nan lakit sur a kum lamlabino bung na lotu ri, uni anung a du bung ke sot utmakai.”

⁹Ra i sa wasiso taru, i kis sikot tong o Galili.

¹⁰Ra a kum tistisin o Iesu det sa wan sur a kum lamlabino bung na lotu, numur o Iesu i mur det, ikut ke upuaso i torom a taro. I wan eno nanan kut.

¹¹A ramano kum te Juda det sisio sur o Iesu una kum lamlabino bung na lotu, det iting lena, “A musano ri awai i?”

¹²A susut na taro det wasiso eno un o Iesu. Ara taro det watungi uni lena, “I ara wakak na musano,” ma ara taro kai det watungi lena, “Awu, i ben raro a taro.”

¹³Ikut kataio i wasiso puaso uni, uni det ngaran a ramano kum taro Juda.

¹⁴Ra det sa kis epotor una kum lamlabino bung na lotu, o Iesu i turpasi sur in ususer a taro ubalan in noworo ina rumu na etabor.

¹⁵A ramano kum te Juda det kisin doko ra det watungi lena, “A musano ri ke etowo pas. Ikut i tasman petlan a kum utna ri?”

¹⁶O Iesu i balu det lena, “Anung a kum etowo, ra a ususer a taro nami, awu sur anung, anun o naro ra i tulu ru iau urin.

¹⁷Osi ra i nem na mur a nemnem anun o God, in tasmani lena anung a kum etowo i wan tagai. I wan tagisapat tan o God, o a nuknuking kut.

¹⁸Osi ra i wasiso kut nama nuknukino, i nemi kut sur din ulabo pasi. Ikut iau, a nemi sur din ulabo pas o God ra i tulu ru iau urin. A wasiso nama lingmulus, ma katu torotoro i kis un iau.

¹⁹O Moses i sa pitar tar a Warkurai tamot, ikut kataio tagun mot i muri. Sur asau ra mot nem na um doko iau?”

²⁰A kunur na taro det balu i lena, “A laulau na nion kura un ui. Osi i nem na um doko ui?”