Jon 7:1-13

¹Lamako Jisas i esu esa a pen elonga ako a Galili, na ini plong ve aro i es ol a epee a Judia, eneke Judare oa pompomere nge pen aken, o sis ve aro o so rin i.

²Na Judare oa aning ako o an i a valvalere lemi i toth me lale.

³Mako Jisas ititeinre o ria i ve, “Aro ong los lelpot nge pen ake mo ong es a epee a Judia la, mo aro lom wainlangaere aro o thopol pathepolong areko aro ong oma ir.

⁴Aro ve ong sis ve iom i kima, ong mothong tova parong kinealo lom omaing. Na ong pavurvur nge pathepolong omanga na i sivenga ako aro ong oma i a lalanga a tokokoere otheki mo aro olemi mire nge wong.”

⁵Na ititeinre mun kene olemio nge i avele.

⁶Mako Jisas i ria or ve, “Aveto lek nang kene i velpol rongan. Aveto nang elonga ako ini lomu nang.

⁷Na tokokoe areko o panes vothung ulue anga o pavurvur ako aro oni silal thomu avele, aveto oni silal tho, eneke tho ripolal or nge ole vothung kerenga.

⁸Engomu o es nge aning aken, aro tho es nge aning aken avele, eneke lek nang i velpol rongan.”

⁹I ria or nge riong areken, na i voth a epee a Galili.

¹⁰Lamako Jisas ititeinre o es ol nge aning aken la, ma i mun i plosa ma i es, aveto i es patat avele, i es kinine inga nge la.

¹¹Na Judare oa pompomere o kath i nge aning aken. Ma o nina ve, “Toko aton i kala?”

¹²Lamako toko na seng pom ako o pakosil pel nge i, ma pelie o ri ve, “Aken ini toko sivenga.” Ave pelie o ri ve, “Avele, ile apaltet tokokoere.”

¹³Aveto toko e avele i ri pat ol nge i, eneke o ngange nge Judare oa pompomere.