Jon 6:7-25

⁷Mewö jiiga kewö meleŋnök, “Nene beret silim 200:kö töwaŋi (Kina 1000,-) miaŋön bohonŋi memba mendeŋninga körek yeŋön kitipŋanöhök nembeak aka töndup qahö dop köl eŋgibawak.”

⁸Mewö jiiga gwarekurupŋi yeŋgöreŋök kun qetŋi Andru, Saimon Pitögö munŋan kewö jii mörök,

⁹“Azi moröŋi kun kiaŋgöreŋ malja. Yaŋgöreŋ bali beret 5 aka söra yahöt ahözapmö, ambazip sehisehiŋi kewö kagetka yeŋgöra mi qahö dop kölma.”

¹⁰Jisösnöŋ jiyök, “Iŋini mönö ambazip kambu ki jiba mendeŋ eŋgigetka nene nembingö eta tatme.” Gölme miaŋgöreŋ kegwaŋ luplup gwötpuk ahöyök. Miaŋgöra azi jaŋgöŋini 5000:gö dop yeŋön gölmenöŋ eta tatket.

¹¹Eta tatketka Jisösnöŋ beret mi memba saiwap jiba ambazip tatkeri, mendeŋda eŋgiyök aka söra mi mewöyök mendeŋda sihimŋinan jigeraŋgö dop eŋgiyök.

¹²Mendeŋda eŋgiiga nemba nem timbireŋ aketka Jisösnöŋ gwarekurupŋi kewö jii mötket, “Nene kitipŋi ayuhubapuköra mi mönö qezaköget.”

¹³Mewö jiiga möta bali beret 5 miaŋgöreŋök nemba kitipŋi kitipŋi mosötket taröhi, mi qezakögetka sakap 12 miaŋgöreŋ geba kokolak qeyök.

¹⁴Jisösnöŋ aŋgöletot mewö mei asuhuiga ambazipnöŋ eka welipköba jiget, “Kezapqetok azi gölmenöŋ asuhumapkö jigeri, yaŋön mönö ölŋa mia akza.”

¹⁵Mewö jiba Jisösgöra köiraŋ ala kiŋ kembuŋini akŋapkö mötmöriget. Mötmöriba kaba liliköm waŋgiba walimgöba kiŋ kuŋgum waŋgibingö aket. Mewö möt kutuba eŋgek tököba eŋgömosöta kunbuk kunduŋe öŋgöba nanŋök malök. Mewö.

¹⁶Neget teköiga mare aiga Jisösgö gwarekurupŋi yeŋön o aŋgögö jitŋe geget.

¹⁷Geba waŋgenöŋ öŋgöba gölme mi mosöta o aŋgö kutuba likepŋe Kaperneam mire göröken anget. Angetka miri söŋaum teköiga Jisösnöŋ töndup yeŋgöreŋ qahö asuhuyök.

¹⁸Angetka luhut köhöikŋanök giliga o aŋgönöŋ könöpuk kunduta öŋgöba erök.

¹⁹Öŋgöba eriga lökuatnöŋ qeba naŋgöba 5 me 6 kilomita miaŋgö dop angetka Jisösnöŋ o aŋgö qakŋe tiba tiba waŋge kösutŋe kaiga eka auruba keŋgötporiŋ aket.

²⁰Mewö mötketka kewö jii mötket, “Nanak kazal. Keŋgötŋini kude mötme.”

²¹Mewö jii möta Jisösnöŋ waŋgenöŋ öŋgömapkö jigetka öŋgöyök. Öŋgöiga waŋgeŋinan miaŋgöreŋök ösumok eŋguaŋgita gölme göraŋe anbingö akeri, miaŋgöreŋ aŋgotket. Mewö.

²²Miaŋgöreŋ aŋgotketka miri giaŋiiga ambazip kambu ketaŋi yeŋön o aŋgö likepŋe toroqeba mala kewö mötmöriget, “Uran waŋge mohotŋan tari ehinga Jisösnöŋ gwarekurupŋi yembuk waŋgenöŋ qahö öŋgöba anök. Jisös umbula nanŋinök anget. Waŋge murutŋi kun qahö ehin. Miaŋgöra Jisösnöŋ kunbuk ki malja.”

²³Mewö mötmöriba tosatŋan kewö jiget, “Waŋge mohotnöŋ angetmö, ölŋa, Taiberias taonök waŋge tosatŋi kaget. Waŋge mi Kembunöŋ beretköra saiwap jiiga nemba tarini, mönö gölme miaŋgö kösutŋe kagera Jisösnöŋ waŋge mieŋgöreŋök kunöŋ öŋgöba anök me denöwö?”

²⁴Ambazip kambu yeŋön mewö jiba Jisös aka gwarekurupŋi miaŋgöreŋ qahö miwikŋaim eŋgiget. Mewö eka möta mewöŋanök waŋgenöŋ öŋgöba Kaperneam taonöŋ anda Jisös jaruget. Mewö.

²⁵Ambazipnöŋ Jisös jaruba o aŋgö likepŋe yuke göröken miwikŋaiba eka kewö jiget mörök, “O Ketaŋamnini, gi mönö wani nalönöŋ ki kazan?”