Jon 6:59-71

⁵⁹Ru an, saen Jesus Kaperniam na ubou ab ilon lo imado dugo, ipiteŋanai a.

⁶⁰Ganurek tamol adi wei mi ru an duloŋ go igo dubol, “Ru en muruan kasik a, enti ru an ka iŋane wak i?”

⁶¹Gug Jesus iŋ iloŋ ak, iŋsan ganurek tamol adi ru an niŋen o duŋurŋur se ya. Ago tag irupudaig ibol, “Ru an ilom muruan ipani ak i?

⁶²Ak dugo, mitep aŋ Tamol Nanun ale dop, lak na aben gubak mi imado ante isuda yau dop, an niŋen o dugo abol ak i?

⁶³Urgun mi iŋ tamol kumaen ipani da, tinid man iŋ kitek ibinawad san tia ya. Ru e ŋai ŋurupaiaŋ den, iŋ ur agod iŋ kumaen a.

⁶⁴Ago gug aŋ luluŋam lo tamolpein aenta iŋ ilod lo ta rumok na ya.” Ago ibol san fun man, iŋ imug mi talpein dugon ilod lo ta rumok na dop, tamol enti iŋ ager banid lo igane man, iŋ iloŋ uyanan a.

⁶⁵Iŋ ru ibateg ibol, “Nek fun amaiak niŋen o, ŋai imug mi aŋ igo ŋurupaiaŋ; Talpein sen ilon nam ŋaisag na ipalu san tia ya, tia, ŋaineg Bai tamol an idaisuda mi igane ilasa gup ka ipalu wa.”

⁶⁶Jesus ru en ifulale itout go, iŋsan ganurek tamol adi wei mi iŋ dibiseig dumul diaug, iŋ afon ŋien aban ta diri na ya.

⁶⁷Ago tag Jesus iŋanen megeloum 12 an isumianai, “Tag aŋ dam ŋai abisawag pe au wo ilom yen di?”

⁶⁸Saimon Pita awan yabig ibol, “O Tubun ak, maŋ enti san na mau wo ubol di? Oŋane ru mi iŋ kumaen pempem san aman da ya.

⁶⁹Maŋ maloŋ uyan go iloma lo rumok ak, oŋ mi Anut anen Tamol Gun a.”

⁷⁰Jesus ru naon irupidaig ibol, “Ŋai aŋ 12 ŋitarpasaŋ a, ago gug aŋ luluŋam lo ta kisaek man iŋ Satan san.”

⁷¹Iŋsan ru lo, Judas, Saimon Iskeriot nanun an isue ya. Tamol an Jesus san megeloum 12 an luluŋad lo yak gug, mitep iŋ Jesus ager banid lo igane wa.