Jon 6:58-64

⁵⁸Nene ölŋi Suepnöhök eröhi, mi nöŋön akzal. Eŋgö ambösakonurupŋinan Anutugö nene nemba mala kömugetmö, nalö kewöŋe eŋgöreŋök kunŋan beret ki nemba malmawi, yaŋön mönö teteköŋi qahö köhöiba malma.”

⁵⁹Jisösnöŋ Kaperneam taongö köuluk miriŋe kinda keu mi jim kusum eŋgiyök. Mewö.

⁶⁰Jisösgö gwarekurupŋi yeŋgöreŋök gwötpukŋan keu mi möta jiget, “Keu jit jizawi, miaŋön mönö keu köt ewö lömbötŋambuk akza. Mi möringa uruninan lömböriba bölim teköza. Miaŋgöra mi kunbuk mötpingö ölan neŋgöhöiga i mönö mosötpin.”

⁶¹Gwarek yeŋön Jisösgö keugöra möt böliba uruŋinan ihururuk jiba jim waŋgigetka Jisösnöŋ mi uruŋan eŋguaŋgita möta kewö jii mötket, “Keu jizali, mi möt bölize me qahö?

⁶²Keu miaŋgöra möt bölize ewö, könaŋgep mönö denöwö asuhubawak? Suep gölmegö Azi ölŋan mutuk miri mala koröhi, euyaŋgöreŋ kunbuk liliŋgöba öŋgöi ekŋe ewö, nalö miaŋgöreŋ mönö denöwö mötme?

⁶³“Uŋa Töröŋi yaŋön ambazip mem gulim eŋgimakza. Iŋini gölme ambinöhök ahuba busuŋinambuk akzemö, ahuahu dölökŋe qahö ahuba nanŋini ösumŋinan öne letota Suepkö buŋa ahak mi qahöpmahöp. Uŋa Töröŋan malmal köhöikŋi eŋgizawi, nöŋön keu kötŋi mi jim tuaribi möta malget.

⁶⁴Mewö möta malgetmö, eŋgöreŋök tosatŋan töndup ni qahö möt narim niŋgiba malje.” Denike yeŋön qahö möt narim waŋgigeri aka daŋön könaŋgep mamalolo mem waŋgimawi, Jisösnöŋ mi könakönahiŋeyök möta korök. Miaŋgöra mewö jiyök.