Jon 6:53-71

⁵³Iesu ka fas ri aragii, “Tekentu kanaka, ia fas gam, male biil gam ien pununfon Kalalik ken Kaltu ke biil gam umin dawu, biil in mel e liu tekentu sing gam.

⁵⁴Seh sau i ien pununfong ma ka umin daung, i mel e liu fitliu, ma ian faptih fafis u na farfarop na biing.

⁵⁵Ia use u aragii, wara le, pununfong i e inen tekentu ma daung i e dan tekentu.

⁵⁶Seh sau i ien pununfong ma ka umin daung, i patep lo iau ma ia ka patep lo.

⁵⁷Tata ae i liu, i wuun ta iau. Ma ia liu i wara lo Tata i liu. Arae sabin ulo seh ae i ien lo iau in liu, wara lo iau.

⁵⁸Igii e beret ae i puh tah tinbae na kukulii. Foron tubutamat gam, ri ien ta mana ke ri ka met tah, isau le seh ae i ien na beret igii, in liu fitliu.”

⁵⁹Foron tier igii, i use u aunbiing i tel fafausum na felun lotu na Kapernaum.

⁶⁰Na wongwong una foron tier igii, ifuun e berberat na fafausum ke Iesu ri ka tara le, “Fafausum igii i ngangaten kanaka. Seh i fasih in kep u?”

⁶¹Iesu ka usum tah na sanih berberat na fafausum kia ri ususe u la, pesu ka tara sing ri aragii, “Foron fafausum igii i faluut gam?

⁶²Gamen wol arafah male gamen par Kalalik ken Kaltu in tatkau fis una falifuh ae i puh tinlo pakanini?

⁶³Tanwa Kalkaluu i ta u la e liu. Rakrakai ken fanu biil in ta liu. Foron orek ae ia ka fas ta gam ini, ri ta liu na tanwa.

⁶⁴Isau le fal lo gam, biil gam unune.” I use u arae, wara le Iesu ka usum tah tina tanwara lon fanseh lo ri ae biil ri unune, ke seh ae in ta ufu una liman foron tuui.

⁶⁵Ke ka tara sabin aragii, “Igii sau e wara ia ka fas gam le, biil tikas i fasih in la usuf iau, male Tata biil i ta rakrakai sing i isi in la usuf iau.”

⁶⁶Tipes u na aunbiing ae, ifuun e berberat na fafausum kia ri ka la koseng u ma biil mang ri mi lo.

⁶⁷Iesu ka diik nenge sangful ini iu e kalalik na fafausum kia aragii, “Ke gam sabin, gam ka ier le gamek la koseng iau?”

⁶⁸Saimon Pita ka kiliis u aragii, “Kumguui, kemen la usuf seh? I mel e orek na liu fitliu ae sing o.

⁶⁹Kemem unune ma kemem usum le, wo e Kaltu Kalkaluu ke God.”

⁷⁰Ke Iesu ka fas u aragii, “Ia tom ia tim pes ta gam nenge sangful ini iu. Isau le neng lo gam i mel e tanwa laulau lo.”

⁷¹I use Iudas, kalalik ke Saimon Iskariot. I tekentu le i neng lon sangful ini iu e kalalik na fafausum, isau le namih in ta ufu Iesu.