Jon 6:51-69

⁵¹Ne bredi me evedni wakeiviwa sira kwimin apa aig onnewa. Bira da bredi mame nape ipewa, me wakepe yaibobot tunano. Sira bredi me wantnawa ne kwapunwa, me piyu mame inaiinaiba oya.”

⁵²Meve Ju igiyawa mumbovit garagara diguragut eme waya, “Aninin oma ane apan mame kwapiwa numpe nata?”

⁵³Iesu mu gumbo wane, “Ne gae natawa diruieni. Ye Apan Usiwa me kwapiwa ge diyawa meuma den nayawa, ye matai inaiinai den auya.

⁵⁴Da bira ne kwapunwa ge diyanwa napewa me inaiinai yaibobot aupe. Sira kum oieba apa ne matai me enagatna wan yoipe.

⁵⁵Kuiyawa kwapunwa me nakwai natawa di, ne diyanwa me mina yoi natawa di.

⁵⁶Da bira kwapunwa ge diyanwa napewa me ne gunap wakepe, sira ne me gumbe wakeigimpna.

⁵⁷Maman wakeiviwa ne baraunedne onedna, sira Maman gumbe ne wakena. Ebu me mina di. Da bira ne nanekpewa me matai ne gunap wakeigimpe.

⁵⁸Mame me bredi kwimin apa aig onne. Mame ye isimureiwa manna naya sira boriruwayawa me mina onan. Da bira bredi mame napewa me matai wakeigimpe yaibobot tunano.”

⁵⁹Kapenaum apa sinagogu danave, me toyau munivi kumiwa apa gae mame wane.

⁶⁰Aigowawa obiren me anog waya, “Gae mame me yaigiwa. Bira oma ane anog aupe?”

⁶¹Iesu yaug anone me aigowawa me gumbe kwavieme, mu gumbo wane, “Mame ye anopipanum ag vene?

⁶²Apan Usiwa namu wakenewa arawa dog aipe me ye yauyawa ye aninin anomon?

⁶³Inaiinai waniviwa me Guwawa. Kwapiwa oma den ane divi da ape. Gae ne ye guniyap wanawa me Guwawa, sira me inaiinai.

⁶⁴Megara ye upeba anotumat den ene.” Kuiyawa Iesu wait namuiren apa yaug anone, bira bira anotumat den eme sira bira matai me ominawa tepe.

⁶⁵Sira wane, “Meoya ne ye diruina, ‘Mamawa bainda den wapewa, bira da oma den ane ne gunap ompe.’”

⁶⁶Kum mame apa, aigowawa obiren me gumbe yankweg taigiya, me amave sira den amiya.

⁶⁷Iesu me aigowawa 12 gumbo wane, “Ye mina imuyep yankweg aisetan anoene?”

⁶⁸Saimon Pita me gumbe gara wane, “Ayapan, nu bira oya anta? Inaiinai yaibobot gaiyawa me ge gungap.

⁶⁹Nu anotumat ag yaug anotu, ge me iyakaisi abnawa God meuma.”