Jon 6:48-70

⁴⁸Mi na det daga weya gibit laif.

⁴⁹Nomeda yumob grengrenfatha olabat bin dagat det speshalwan daga deya langa det deset kantri, bat stil deibin ol dai.

⁵⁰Bat wen enibodi dagat det brabliwan daga weya bin kamdan brom hebin, im garra jidan laibala olagijawan.

⁵¹“Wal mi na det brabliwan daga weya bin kamdan brom hebin blanga gibit laif, en wen enibodi dagat det daga, im garra jidan laibala olagijawan. “Wal ai garra gibit det bodipat blanga main bodi blanga meigim ola pipul jidan laibala olagijawan, dumaji main bodipat im na det daga.”

⁵²Wal wen Jisas bin tok lagijat, detlot pipul bin stat agamin gija, “Hau im garra gibit wi det bodipat blanga im bodi blanga dagat?”

⁵³Wal Jisas bin dalim olabat, “Trubala ai dalim yumob. Mi na det Speshalwan Men, en if enibodi nomo dagat det bodipat blanga main bodi en dringgim main blad, wal im kaan abum det brabliwan laif.

⁵⁴Bat detlot pipul hu dagat main bodipat en dringgim main blad, olabat garram det olagijawan laif,

⁵⁵en ai garra meigim olabat gidap laibala olagijawan langa det laswan dei, dumaji main bodipat na det brabliwan daga, en main blad na det brabliwan dringk,

⁵⁶en wen enibodi dagat main bodipat en dringgim main blad, im jidan langa mi en mi jidan langa im.

⁵⁷“Yumob sabi na? Main Dedi hubin jandim mi garram det pawa blanga gibit laif. En mi jidan laibala dumaji main Dedi jidan laibala. En im seimwei du langa detlot pipul hu dagat main bodipat. Olabat jidan laibala dumaji mi jidan laibala.

⁵⁸“Wal dijan na det brabliwan daga weya bin kamdan brom hebin. Im nomo wulijim det daga weya yumob grengrenfatha olabat bin dagat langa det deset kantri. Nomeda deibin oldei dagat det daga, bat stil deibin oldei dai. Bat wen enibodi dagat dijan brabliwan daga, im garra jidan laibala olagijawan.”

⁵⁹Lagijat na Jisas bin dalimbat detlot pipul wen imbin lenimbat olabat deya langa det Juwish Miting Pleis langa det taun gulum Kapeniyam.

⁶⁰Wal wen ol detlot pipul hubin oldei bulurrumbat Jisas bin irrim im tok det wed lagijat, sambala pipul bin tok, “Dijan wed weya imbin tok im brabli adwan, en nobodi kaan gajimap wanim im toktok.”

⁶¹Wal nobodi bin dalim Jisas detlot pipul bin toktokbat blanga det wed. Bat imbin sabi, en imbin dalim olabat, “Maitbi det wed weya aibin tok garra meigim yumob wandi gowei brom mi.

⁶²Bat mi na det Speshalwan Men. En if det wed weya aibin tok garra meigim yumob wandi gowei brom mi, wal wanim yumob garra dum wen yumob luk mi gobek langa top weya aibin jidan basdam?

⁶³“Yumob irrim mi na. Nomo enijing kaan gibit yumob laif. Oni det Holi Spirit gin gibit yumob laif. En wen aibin dalim yumob blanga dagat det bodipat blanga main bodi, ai nomo bin tok blanga dagadagat daga. Aibin tok blanga duwit langa detlot wed weya aibin dalimbat yumob, dumaji wen yumob bilib langa detlot wed main, det Holi Spirit im gibit yumob laif.

⁶⁴Bat stil sambala pipul brom yumob kaan bilib langa mi.” Lagijat na Jisas bin tok langa detlot pipul, dumaji brom longtaim imbin sabi ol detlot pipul hu kaan bilib langa im, en imbin sabi du wanbala men deya garra hendimoba im langa detlot pipul hu garra kilim im ded bambai.

⁶⁵Wal Jisas bin kipgon tok langa detlot pipul, “Trubala ai dalim yumob. Sambala pipul brom yumob kaan bilib langa mi. En blanga tharran na aibin dalim yumob nobodi kaan kaman langa mi. Oni detlot pipul weya main Dedi bin gibit olabat det pawa garra kaman langa mi.”

⁶⁶Wal wen Jisas bin tok lagijat, loda pipul hubin oldei bulurrum im bin gowei brom im, en dei nomo bin bulurrum im na.

⁶⁷Wal Jisas bin askim detlot twelbala wekinmen blanga im na, “Wotabat yumob? Yumob wandi gowei du?”

⁶⁸Wal Saiman Pida bin dalim im, “Bos, langa hu melabat garra go? Oni yu na garram detlot wed weya gibit melabat det olagijawan laif.

⁶⁹En melabat bilib langa yu, en melabat sabi yu na det Holiwan hubin kaman brom God.”

⁷⁰Wal Jisas bin dalim detlot wekinmen blanga im, “Mi na bin pikimat yumob twelbala. Bat wanbala deya langa yumob im bulurrum det boswan dibuldibul.”