Jon 6:42-64

⁴²Augwaligo te po wai, “E bidi da, te Josep aga ogwa dao. Dago aga aya ida dali koneai dao. Magi baso agai te po megi wabowe, ‘Ena dagalu tagalama, e tǫba duali dao,’ wabowe? Agai po usubeo,” augwaligo te po wai.

⁴³Te Jisasgo augwalibolo po wei ponoyu, te po wai, “Dage duga hasi tomode te hagelabo po wabo tagaliąo.

⁴⁴Bidi me deli ena pageba olo me asogobeo. Menio. Ayago ena tagala palobaso, ena asai dao. Tibaso, agai bidi me deli kegali da, tiali da, te bidi ena pageba asagameo. Tama te bidi eno aga nosali tǫ dali dagalu dali silibo side ma hodolaibao, aga ma bidimainogo tama yaibao.

⁴⁵Te Godigo nosali yabo sę po pusa mani profet bidi dabe augwaligo te po asęani, ‘Godigo tigidali we bidi ola mawaibao.’ Mena bidi me Ayago po odolama, tama koneama, te bidi ena pageba asobo dao.

⁴⁶Tiali goli, bidi me deligo Aya me gedugo subeo. Te bidi God dali bidilama, asali, te bidigo naga Aya gedugo suai dao.

⁴⁷Eno mu po dagebolo obao. Bidigo enabolo aga homu dąų olama, enaba tialubo bidi, aga bidada peyu, bidada pabo bomo selama, mu bidaibao.

⁴⁸Ena digi ena te mu bidabo bomo elalubo tubo diluai nai bret dao.

⁴⁹Polobadu duga nǫų dabe augwali te bidi meni yai bulude bididubadi, te ili isiąwai nai nogi mana tuali goli, augwali nosali isali.

⁵⁰Tialima, te dagalu tagalama dulali bret, te tedali gasagi yai. Tama tibaso, bidigo te bret tuali da, te aga te mu bidabo bomo munu me tagalogobeo.

⁵¹Ena digi ena da, te bidabo bomo elalubo bret da, te ena dagalu tagalama, e tǫba dulai dao. E bret bidigo tuyu da, te bidi aga bidada paibao, mu gamonaibao. Tama eno te bret agabolo mawaibao, te eno tigi dao. E tǫde bidibo we bidi augwali mu bidimainogo, eno ena tigi mawaibao,” Jisasgo te po wai.

⁵²Te Jisasgo te wali pode te Juda bage augwa hasi bomo elama, konila yali. Augwali me badugo te po hanalu wali, “Mena tama tibaso, te bidi aga tigi da menama, tama dago tueibawe? Te sę ebo usu egobeo,” Juda bage augwaligo te po wai.

⁵³Tama Jisasgo augwalibolo te po wai, “Eno mu po dagebolo obao, dagego Godigo Bidi Mu agai tigi tusiąwani da, agai kaneme tusiąwani da, tiali da, dagego te bidabo bomo elalugobeo.

⁵⁴Bidigo eno tigi tuyu, tama eno kaneme tuali bidi da, aga bidada pabo bomo elaluaibao, tama eno aga te tǫ dali, dagalu dali silibo side aga ma hodolaibao.

⁵⁵Magi basowe? Eno tigi te tubo nai mu dao, tama eno kaneme te mu tubo ąį dao,” Jisasgo te Juda bage dali wai.

⁵⁶“Bidigo eno tigi dali eno kaneme dali tubo bidi da, aga enade bidiyu, tama ena agade bidiyu, te bidi dadi si mu kęą pai elalueibao.

⁵⁷Bidada pabo bidi Aya agai ena tagala palai. Te tiwai gilama, ena me bidada pabo dao. Te tiwai gilama, mena bidi eno mi tuali bidi da, te bidi mu bidabo bomo te ena bomode saibao.

⁵⁸E bret, eno dagebolo po wabo bret da, te dagalu tagalama e tǫba dulai bret dao. Duga nǫų dabego bret tuali goli, augwali isali. Eno dagebolo wabo bret te tiwai menio. Bidigo e bret tuyu da, te bidi aga mu bidabo bomo selama, bidada peyu, bidada paibao,” Jisasgo te po wai.

⁵⁹Jisasgo augwali te bomo yai po ola mabo be tomode te po ola mawai, te Kaperneam be nanide.

⁶⁰Te bidi Jisas agai te bret dagaludu dulali po olama, tama aga wali pabo we bidi hauwa augwaligo te po odolama, augwa hasi tomode te po wai, “Te pogo dabolo sęgę mabo, dago te po magi elama, wali pogowe? Mena bidigo te po odolama, wali pabo usu egowe?” augwaligo te po wali.

⁶¹Bidi mego agabolo te po wasiąbadi, Jisas aga digi koneai, aga wali pabo bage hauwa augwa hasi tomode te hagelabo po wai. Tama tibaso, agai augwalibolo te po wai, “Eno wali pode dage sębę elama, dagego ena tagalaibawe?

⁶²Tialima, dagego suali ma te Godigo Bidi Mu aga polobadu bidali buluba hodobo suyu da, magi yaibawe?” Jisasgo te po wai.

⁶³“Te mu bidabo bomo mabo bidi da, te God agai Mobo Bidi naga dao. Bidigo bomogo dwasianu me tau sogobeo, usu egobeo. Te po eno dagebolo polo wai dao, te pogo dagebolo God agai Mobo Bidi mabo dao, agai dagebolo te mu bidabo bomo momainogo.

⁶⁴Tiali digi, me badu bidi dage tomode augwaligo enade bomo yai homu dąų olama, mube,” Jisasgo te po wai. Polobadu digi, aga sę ebo gagalali sogode, Jisas aga koneai agade bomo yai homu dąų olama, musiąbo bage. Tama aga koneai me, te aga te boi bidigo nogoba sela maiabo bidi, te me agai polobadu koneai.