Jon 6:38-59

³⁸Wara le, ia puh tah tinbae na kukulii, biil isi ian mi na wolwol kiak tom, isau le ia puh tinbae isi ian mi na wolwol ke seh ae i wuun ta iau.

³⁹Ma igii e wolwol ke seh ae i wuun ta iau ugapiek, le gong ia sok ufu tikas lo ri ae ka ta ta u usuf iau, isau le ian faptih fafis ri na farfarop na biing.

⁴⁰Wara le, wolwol ke Tata le, fanseh ri par usuf Kalalik ma ri ka unune lo, rin kep liu fitliu, ma ian faptih fafis u na farfarop na biing.”

⁴¹I use u arae, pesu foron famfamu ken fan Iudaia ri ka tanwaran belbel orek lo, wara le i tarah, ‘Iau tom e beret ae i puh tah tinbae na kukulii.’

⁴²Ri ka tarah, “I sau e kalalik ke Iosep ae tama ru e tina kere usum lo ruh. Arafah ke igii ka tara le, ‘Ia puh tina kukulii’?”

⁴³Iesu ka kiliis ri aragii, “Gong gam belbel orek na fatpoto gam tom.

⁴⁴Biil tikas in la usuf iau, male Tata ae i wuun ta iau, biil i dat u usuf iau, ma ian faptih fafis u na farfarop na biing.

⁴⁵Ri siit ta u na sisiit ken foron poropet le, ‘God tom in fausum ri tikii.’ Aisaia 54:13 Ma fanu tikii ae ri ongen Tata ma ri ka kep usum sing i, rin la usuf iau.

⁴⁶Biil tikas i par ta Tata, isau le ier sau ae tinbae sing God, i sau ka par ta Tata.

⁴⁷Tekentu kanaka, ia fas gam, seh sau i unune, i mel e liu fitliu.

⁴⁸Iau tom e beret na liu.

⁴⁹Foron tubutamat gam, ri ien ta mana na falifuh foes, isau le ri ka met tom.

⁵⁰Isau le, igii e beret ae i puh tinbae na kukulii ae le seh i ien lo, ke biil in to met.

⁵¹Iau tom e beret ae i liu, ae i puh tah tinbae na kukulii. Male tikas i ien lo e beret igii, in liu fitliu. Beret igii, i e pununfong tom ae ian ta u, isi fanu na piklinbat rik liu.”

⁵²Namih fan Iudaia ri ka lala fakep ini orek na fatpoto ri tom le, “Kaltu igii in ta pununfo arafah usuf kerer isi kerek ien u?”

⁵³Iesu ka fas ri aragii, “Tekentu kanaka, ia fas gam, male biil gam ien pununfon Kalalik ken Kaltu ke biil gam umin dawu, biil in mel e liu tekentu sing gam.

⁵⁴Seh sau i ien pununfong ma ka umin daung, i mel e liu fitliu, ma ian faptih fafis u na farfarop na biing.

⁵⁵Ia use u aragii, wara le, pununfong i e inen tekentu ma daung i e dan tekentu.

⁵⁶Seh sau i ien pununfong ma ka umin daung, i patep lo iau ma ia ka patep lo.

⁵⁷Tata ae i liu, i wuun ta iau. Ma ia liu i wara lo Tata i liu. Arae sabin ulo seh ae i ien lo iau in liu, wara lo iau.

⁵⁸Igii e beret ae i puh tah tinbae na kukulii. Foron tubutamat gam, ri ien ta mana ke ri ka met tah, isau le seh ae i ien na beret igii, in liu fitliu.”

⁵⁹Foron tier igii, i use u aunbiing i tel fafausum na felun lotu na Kapernaum.