Jon 6:35-53

³⁵Jisösnöŋ mi möta jiyök, “Nöŋön malmal köhöikŋaŋgö neneŋi akzal. Kunŋan nöŋgöreŋ kazawi, yaŋön nem timbireŋ aka wösöŋi nalö kunöŋ qahö alma. Kunŋan ni möt narim niŋgimakzawi, yaŋön ogöra qahö kömuma.

³⁶Mewö aigun iŋini ni nek teköba töndup qahö möt narim niŋgize. Mi mönö lök jibi mötze.

³⁷Aka töndup Iwinöŋ ambazip tosatŋi niŋgimakzawi, yeŋön mönö körek nöŋgöreŋ kame. Kunŋan nöŋgöreŋ kamawi, nöŋön mönö i qahö yakörimam.

³⁸“Nöŋön Suepnöhök eta nani imbinaŋgö dop yuai laŋ aka memba malmamgöra qahö asuhuyal. Mewö qahö. Melaim niŋgiyöhi, mönö yaŋgö jitkö dop nup memba malmamgöra eral.

³⁹“Melaim niŋgiyöhi, yaŋgö jitsihitŋan kewö ahöza: Yaŋön ambazip nöŋgö böröne al eŋgiiga maljei, nöŋön mi pakpak köyan köl eŋgiba malbiga yeŋgöreŋök kunŋan kun qahö sohoba ayuhuma. Qahö ayuhugetka nöŋön i nalö ketaŋe eŋgömindiba mem gulim eŋgimam.

⁴⁰“Iwinaŋgö jitsihitŋan kewö ahöza: Tosatŋan Nahönŋi eka möt narim waŋgizei, yeŋön körek nalö kewöŋe letota malmal köhöikŋi buŋa qem aŋguba malme. Mewö mal kömugetka nöŋön i nalö ketaŋi miaŋgöreŋ eŋgömindiba mem gulim eŋgimam.”

⁴¹Jisösnöŋ mewö jiiga keu kötŋi kun kewö ahök, “Nöŋön malmalgö nene ölŋi aka Suepnöhök eta asuhuyal.” Mewö jiyöhaŋgöra aka Juda jitŋememe yeŋön möt böliba uruŋinan ihururuk jiba jim waŋgiget.

⁴²Jim waŋgiba jiget, “Azi ki Jisös, Josefkö nahönŋa. Yaŋgö iwinamŋi mi ölöp möt etkizinmö, mönö denöwögöra ‘Suepnöhök eta asuhuyal,’ jiza?”

⁴³Mewö jigetka möta kewö meleŋnök, “Uruŋinan mönö kude ihururuk jiba jim niŋgime.

⁴⁴Iwi ni melaim niŋgiyöhi, yaŋön ambazip qahö öröm eŋgiza ewö, eŋgöreŋök kunŋan nöŋgöreŋ kamamgö osima. Öröi kabawak ewö, nöŋön i mönö nalö ketaŋe eŋgömindiba mem gulim waŋgimam.

⁴⁵“Kezapqetok yeŋgöreŋ kimbinöŋ keu kewö ohoget ahöza, ‘Anutunöŋ i körek pakpak kusum eŋgii mötme.’ Iwinöŋ ambazip kusum eŋgii keu möta urukönömŋine ala maljei, yeŋön mönö körekŋanök nöŋgöreŋ kame.

⁴⁶Ambazip kunŋan Iwi qahö eka malja. Iwigöreŋök eröhi, yaŋön mohot kun mönö i eka malja.

⁴⁷Nöŋön keu öl töhönŋi kun kewö jibi mötket: Kunŋan ni möt narim niŋgizawi, yaŋön mönö malmal köhöikŋi buŋa qem aŋguba mal öŋgöma.

⁴⁸“Nöŋön malmal köhöikŋaŋgö nene ölŋi akzal.

⁴⁹Mötket! Eŋgö ambösakonuruŋinan gölme qararaŋkölkölŋe anda mala nene qetŋi mana nemba malgetmö, töndup kömumba gisahöget.

⁵⁰Yeŋön kömugetmö, nene beret nalö kewöŋe Suepnöhök eta maljawi, kunŋan mi nemba mala qahö kömum köhöima.

⁵¹“Nene beret malmalŋambuk Suepnöhök eröhi, mi nöŋön akzal. Kunŋan nene mi nemba malmawi, yaŋön mönö teteköŋi qahö köhöiba malma. Nene waŋgiba malmami, mi nöŋgö busuni. Gölmeŋi gölmeŋi yeŋön köhöiba malmegöra mi al eŋgimam.”

⁵²Jisösnöŋ mewö meleŋniga Juda jitŋememe yeŋön sutŋine urukönöpnöŋ jim qesim aŋguba jiget, “Yei! Azi kiaŋön mönö denöwö aka busuŋi neŋgiiga nembinak?”

⁵³Mi möta jigetka kewö jii mötket, “Nöŋön keu öl töhönŋi kun kewö jibi mötket: Iŋini Suep gölmegö Azi ölŋaŋgö sepŋi aka busuŋi qahö neme ewö, malmal köhöikŋi miaŋön mönö eŋgö uruŋine qahö ahöma.