Jon 6:3-32

³Namih, Iesu ka tatkau na baban nenge pungpung ma ka kiis turan berberat na fafausum kia.

⁴Aunbiing ka fatat isi inen na Liuliu Kulef ken fan Iudaia.

⁵Aunbiing Iesu i sake mata, ka par gur na fanu ri ka la isi tafe u, ke ka diik Pilip le, “Fiah keren fiil ti beret wah an fanu igii?”

⁶I diik sau aragii isi in tof u, wara le i tom ka usum tah na sanih in tel u.

⁷Pilip ka kiliis u aragii, “Fifiil ken i tikii e kaltu na iwal e funiil biil in fasih una fiil beret isi temtem tikii na kaltu ik ien ituul.”

⁸Neng lon berberat na fafausum kia, Enru, tualik e Saimon Pita, ka fas u le,

⁹“Nenge kalalik igii, i mel i lim e fabiro beret ri tel u ini bali, ke iu sabin e kok sing i. Isau le biil tom in fasih lo ri tikii.”

¹⁰Ke, Iesu ka tara le, “Fas fanu tikii rik kiis.” Ifuun e rokap na fifih una kiis aiwa. Ma wewes lon fanu tamat tikii i fasih ini ilim e arip.

¹¹Iesu ka kep beret, ka fot rokap lo usuf God, ma ka tulus fanu ae ri kiis tah. Ka tel u sabin arae na iwu e kok, ma fanu tikii ri ka ien ke ri ka mas.

¹²Aunbiing ri ka ien mas tah, Iesu ka fas berberat na fafausum kia le, “Kep turim foron tigan inen i kiis, tarama ka laulau foes.”

¹³Ke, ri ka kep turim foron tigan inen tina i lim e beret ae foron fanu ri ien tiga tah. Ke ri ka siing u na nenge sangful ini wu e tara sara.

¹⁴Namih na aunbiing fanu ri ka par ta rakrakai na fakileng Iesu i fatapiek ta u na matri, ri ka tara aragii, “Tekentu kanaka, igii i e poropet ae ri use ta u le in la uga na piklinbat.”

¹⁵Iesu ka usum ta le fanu ae rin la ma rik fangongos u isi in tapiek king, pesu i keskes tom ka la una nenge pungpung.

¹⁶Ka efef worwor mang ke berberat na fafausum kia ri ka puh fis una dan kawil.

¹⁷Ri ka wof na nenge mon ke ri ka sopaket dan kawil isi rik tapiek na Kapernaum. Ka kubunor mang ma Iesu biil biitom i tapiek sing ri.

¹⁸Ke tara na kif ka tapiek ma dan ka panaf.

¹⁹Aunbiing ri ka awes i fasih ini i lim le i won e kilomita, ke ri ka par Iesu ka la na olon dan isi mon, ke ri ka sokeh.

²⁰Isau le Iesu ka fas ri aragii, “Iau sau. Gong gam sokeh.”

²¹Pesu, ri ka laes isi rin siing u, ma fanpil ri ka tapiek na falifuh ae rin la ulo.

²²Na biing namih, gur na fanu ae ri kiis uf tah na nenge bulin dan kawil, ri ka wol tafe u le i tikii ta sau e mon aiwa. Ma Iesu biil biitom i wof turan berberat na fafausum kia. Ri keskes tom, ri la tah.

²³Namih, fal e mon tina Taiberias ri ka masah fatat isi falifuh ae ri ien ta beret ae Kumguui i fot rokap ta lo.

²⁴Ma aunbiing ri ka iliim u, le Iesu turan berberat na fafausum kia ri ka mangmangal tah tinaiwa, ke ri ka wof na foron mon isi im isi Iesu na Kapernaum.

²⁵Aunbiing ri ka tafe u na nenge bulin dan kawil, ri ka diik u aragii, “Tom fafausum, nangis o la tah uga?”

²⁶Iesu ka kiliis ri aragii, “Tekentu kanaka, ia fas gam, gam im isi iau, biil wara le gam par ta foron rakrakai na fakileng, ma i wara sau le gam ien ta beret ke gam ka mas.

²⁷Gong gam foim isi inen ae in laulau, isau le gamen foim isi inen ae in kiis ma in ta liu fitliu, ae Kalalik ken Kaltu in ta u sing gam. God Tata i finngas ta u le i somangat ini sanih ke Kalalik i tel u.

²⁸Pesu, ri ka diik u le, “Sanih tom kemen tel u, isi kemek tel foim ae God i ier isi?”

²⁹Iesu ka kiliis ri aragii, “Foim ae God i ier isi i aragii, le gamen unune lo seh ae God i wuun ufu tah uga.”

³⁰Pesu, ri ka diik u aragii, “Matngan rakrakai na fakileng arafah ae on fatapiek u, isi kemek par u ma kemek unune lo wo?

³¹Foron tubutamat kemem ri ien ta mana na falifuh foes, arae ri siit ta u na Buk na Gogoh le, ‘I fen ta ri ini beret tina kukulii una ien.’ Buk Song 78:24 Ma wo, sanih on tel u?”

³²Iesu ka fas ri le, “Tekentu kanaka, ia fas gam, biil e Moses ae i fen ta gam ini beret tina kukulii, isau le Tata tom ae i fen gam la ini beret tekentu tina kukulii.