Jon 6:19-69

¹⁹Ning la ka ulusu bakbak, arlar ana dilima na kilomita, la oroi pas e Iesu i han saot na palai a puka tasi tetek la. Pa la matmataut kol.

²⁰Ika e Iesu i atai la mange, “Gong mulo matmataut, iau ka ne.”

²¹La gasgas pasi pa la akasi ana mon. Pa la sot kakat ana pukna ning la han suri.

²²Ana ning a pukakiar lamur, a kunum a taraila ning la kes tumo na ris a puka tasi, la tasmani mang ning a mon ka i kes tingia. Pa la tasmani mang a kakak a asaerla ka la han, e Iesu bel i kas taum onla.

²³Lamur dingla na mon mitimo e Tiberias la sot milau ana pukna ning a Leklek i atong wakak ana bret pa a kunum a tarai la hangan ano.

²⁴Ning a kunum a tarai la oroi mang e Iesu taum ana nuna kakak a asaerla bel la kes tingia, la kas ana monla, pa la han utumo e Kapernaum sur lar tai sur e Iesu.

²⁵Pa ning a tarai la pastetek pas e Iesu tumo na ris a puka tasi, la dekeni mange, “Tena Asaer, nangse u han tar ute?”

²⁶E Iesu i keles la mange, “A atong momoli ta mulo, bel mulo tai sur iau anasa mulo oroi a akinalangla ning a toli, belal. Mulo tai ka sur iau anasa mulo ien a bret pa mulo masur ono.

²⁷Gong mulo rakrakai ka sur a utna na hangan ning i sira marase. Mulor rakrakai sur a utna ning ir kes sur a lalaun tikin, ning a Nat a Barsan ir tabar mulo ono. Anasa e God e Tata ka saran tar a rakrakai tak sur ar toli larne.”

²⁸La dekeni mange, “Asa ning milar toli sur milar tol a titolla ning e God i mang suri?”

²⁹E Iesu i keles la mange, “A titolla ne, ning e God i mang suri, mulor tortorot o esaning i sune i ute.”

³⁰Pa la dekeni mange, “Ur tol esi na akinalang sur milar oroi pa milar tortorot hom onoi? Asa ning ur toli?

³¹A tumtubumila la ien a mana ana hanua bel, larotning di ka tumus tari ting na Buk Tabu mange, ‘I tabar la ana bret misaot na langit pa la ieni.’”

³²E Iesu i atai la mange, “A atong momoli ta mulo, bel e Moses ning i tabar la ana bret misaot na langit, e Tata i tabar la. Pa ine i tabar mulo ana bret momol misaot na langit.

³³Esaning i han purum misaot na langit, i ot a bret ane God, ning i saran a lalaun tetek a taraila rop te na rakrakan hanua.”

³⁴La atai i mange, “Leklek, ur tabar mila ana bret ning, ana pukakiarla rop.”

³⁵E Iesu i atai la mange, “Iau a bret na lalaun. Esila ning lar han tetek iau, bel lar murak, pa esila ning lar tortorot hok, bel lar mos ulak.

³⁶Ia ka atai tar mulo mang mulo ka oroi tar iau, ika bel mulo tortorot.

³⁷La rop ning e Tata i saran tar la tak, lar han tetek iau, pa esining ir han tetek iau, bel ar kepseni, belal.

³⁸Anasa a han purum misaot na langit, bel sur ar mur a nuknukik, ika sur ar mur ot a nuknukna esaning i sune iau ute.

³⁹A nuknukna esaning i sune iau ute ine, gong tik ta halinla ning i saran tar la tak ir hirua. Ar akamtur ulak la rop kusun a minat ana ararop a pukakiar.

⁴⁰A nuknuk ane Tata i mange, la rop ning la tai tetek e Natnalik pa la tortorot onoi, lar laun tikin, pa iau ar akamtur la kusun a minat ana ararop a pukakiar.”

⁴¹Dingla na Juda la ururai o e Iesu, anasa i atongi mange, “Iau a bret ning i han purum misaot na langit.”

⁴²Pa la atongi mange, “E Iesu a nat e Josep ka. Dala tasman ot e tamana pa e tana. Pa sur asa ning i atongi mang i han purum misaot na langit?”

⁴³E Iesu i keles la mange, “Gong mulo abereng wara.

⁴⁴Bel tik ir han lar pasi tetek iau. Ika e Tata ot ning i sune iau, ir ben tari tetek iau, pa ar akamturi kusun a minat ana ararop a pukakiar.

⁴⁵A propetla la ka tumus tari mange, ‘E God ir asaer la rop.’ Pa la rop ning la longor e Tata pa la asaer tana, lar han tetek iau.

⁴⁶Bel tik i oroi e Tata. Esan kaning i han pas tagun e God, i oroi tar e Tamana.

⁴⁷A atong momoli ta mulo, esining i tortorot hok, ka kibas a lalaun tikin.

⁴⁸“Iau a bret a lalaun.

⁴⁹Nating a tumtubumulo la ien a mana ting na hanua bel, ika la ka mat.

⁵⁰Ika a bret ne i han misaot na langit, ning tik ir ieni, bel ir mat.

⁵¹Iau a bret a lalauna, ning i han purum misaot na langit. Tik ning ir hangan tagun a bret ne, ir laun tikin. A bret ning ar artabar ono, a palaok. A sarani sur a taraila ana rakrakan hanua lar kibas lalaun onoi.”

⁵²Dingla na Juda, la arlak artalaila, pa la atongi mange, “A barsan ne ir tabar mangmangasa dala ana palaona sur dalar ieni?”

⁵³Pa e Iesu i atai la mange, “A atong momoli ta mulo, ning bel mulor ien a palaona Nat a Barsan pa bel mulor gang a sulukna, belal lalaun momol ir kes o mulo.

⁵⁴Esining ir ien a palaok pa ir gang a sulukik, ka kibas a lalaun tikin, pa iau ar akamturi kusun a minat ana ararop a pukakiar.

⁵⁵Anasa a palaok a utna na hangan momol, pa a sulukik a malum a gang momol.

⁵⁶Esining ir ien a palaok pa ir gang a sulukik, ir laun hok, pa iau ar laun onoi.

⁵⁷E Tata ning a lalauna i sune iau, pa a laun anasa o e Tata. Mangotleng larning tetek esining ir ien a palaok, ir laun anasa hok.

⁵⁸A bret ning i han misaot na langit ine. Bel i arlar ana mana ning a tumtubumulola nating la ieni, pa la ka mat. Ika esining ir hangan tagun a bret ne, ir laun tikin.”

⁵⁹E Iesu i atong a warwarala ne, ning i asaer a taraila ting na rumai lotu tumo e Kapernaum.

⁶⁰A galis tagun anuna tarai a asasaerla ning la longor a warwarala ne la atongi mange, “A asasaer ne i ngangaten kol, esi ir malmaling pasi?”

⁶¹E Iesu i tasmani mang anuna na tarai a asasaer la ururai onoi. I deken la mange, “Mangmangasa, a warwara ne i alaulau mulo?

⁶²Ir mangmangasa tetek mulo ning mulor oroi a Nat a Barsan ir ulak usaot sur a hanua ning nating ka kes pas ano?

⁶³A Talngan Tabu i saran a lalaun. A rakrakai ana palaona tik bel i to pas ta utna. A warwarala ning a atongi ta mulo, i hanot tagun a Talngan Tabu, pa i saran a lalaun.

⁶⁴Ika dingla o mulo bel la tortorot.” Ning ot e Iesu ka tasman la ning bel lar tortorot onoi, pa i otleng ning ir tuami.

⁶⁵Pa i atongi otleng mange, “Ine a kamkamna ning a atai mulo mang bel tik ir han lar pasi tetek iau. Ika, ning ot e Tata ir sarani tetek iau, io, ir han tetek iau.”

⁶⁶Pa a galis tagun anuna tarai a asasaer la ulak kusuni, pa bel ma la muri.

⁶⁷E Iesu i deken ning a bonot pa pisir naur a kakak a asaer anunai mange, “Mangmangasa, mulo otleng, mulo mang sur mulor ulak kusun iau?”

⁶⁸E Saimon Pita i kelesi mange, “Leklek, milar han tetek esi? Anasa a warwarala na lalaun tikin anumi ka.

⁶⁹Mila ka tortorot pa mila tasmani mang u a Tena Totoh ane God.”