Jon 6:16-32

¹⁶Ning ka rahmorom, a kakak a asaerla ane Iesu la han utumo na puka tasi.

¹⁷La kas ana mon, pa la turpas a lakai a puka tasi sur e Kapernaum. Ka morom, pa e Iesu belot i hanot tetek la.

¹⁸A tnan wuwu i ragati pa a tatatnan top i kamtur.

¹⁹Ning la ka ulusu bakbak, arlar ana dilima na kilomita, la oroi pas e Iesu i han saot na palai a puka tasi tetek la. Pa la matmataut kol.

²⁰Ika e Iesu i atai la mange, “Gong mulo matmataut, iau ka ne.”

²¹La gasgas pasi pa la akasi ana mon. Pa la sot kakat ana pukna ning la han suri.

²²Ana ning a pukakiar lamur, a kunum a taraila ning la kes tumo na ris a puka tasi, la tasmani mang ning a mon ka i kes tingia. Pa la tasmani mang a kakak a asaerla ka la han, e Iesu bel i kas taum onla.

²³Lamur dingla na mon mitimo e Tiberias la sot milau ana pukna ning a Leklek i atong wakak ana bret pa a kunum a tarai la hangan ano.

²⁴Ning a kunum a tarai la oroi mang e Iesu taum ana nuna kakak a asaerla bel la kes tingia, la kas ana monla, pa la han utumo e Kapernaum sur lar tai sur e Iesu.

²⁵Pa ning a tarai la pastetek pas e Iesu tumo na ris a puka tasi, la dekeni mange, “Tena Asaer, nangse u han tar ute?”

²⁶E Iesu i keles la mange, “A atong momoli ta mulo, bel mulo tai sur iau anasa mulo oroi a akinalangla ning a toli, belal. Mulo tai ka sur iau anasa mulo ien a bret pa mulo masur ono.

²⁷Gong mulo rakrakai ka sur a utna na hangan ning i sira marase. Mulor rakrakai sur a utna ning ir kes sur a lalaun tikin, ning a Nat a Barsan ir tabar mulo ono. Anasa e God e Tata ka saran tar a rakrakai tak sur ar toli larne.”

²⁸La dekeni mange, “Asa ning milar toli sur milar tol a titolla ning e God i mang suri?”

²⁹E Iesu i keles la mange, “A titolla ne, ning e God i mang suri, mulor tortorot o esaning i sune i ute.”

³⁰Pa la dekeni mange, “Ur tol esi na akinalang sur milar oroi pa milar tortorot hom onoi? Asa ning ur toli?

³¹A tumtubumila la ien a mana ana hanua bel, larotning di ka tumus tari ting na Buk Tabu mange, ‘I tabar la ana bret misaot na langit pa la ieni.’”

³²E Iesu i atai la mange, “A atong momoli ta mulo, bel e Moses ning i tabar la ana bret misaot na langit, e Tata i tabar la. Pa ine i tabar mulo ana bret momol misaot na langit.