Jon 5:8-24

⁸Jises eme tiye i tan i buku doh, “Ou suri ou, ou andrei nyahan tam ma ou adek.”

⁹Udu se luwen bwe, iy ndramak nane dah ndramwenen ja. Iy eme bwese-ei nyahan tan, ma iy edek iu. Idoh badeh, udu bolo len ta amunyau.

¹⁰Iri tinan tiri Juwis ame asehek sahou i ta iy ndramak nane ndrabwidi iy ndramwenen dah, “Ya idah len ta amunyau. Idah ba-en hamon ta kandriyen malen tahi mene Moses batanau bwe. Ou sabwese nyahan tam sado bolo len ta amunyau.”

¹¹Ano iy asehek i toro, “Iy ndramak nane bwidi jo amwenen dah badeh, tiye jo ta bwese nyahan tek, ma iy tiye jo ta edek.”

¹²Oro ndremenya iy ja, “Are lau handru tiye tam ta bwese nyahan tam, ma ou adek?”

¹³Iy ndramak nane ndramwenen dah bala tanan are lau handru Jises. Lau ale solo-an labai ado loboho doh, eme bwidi Jises ndramai ndrala bolo iri lau.

¹⁴Ano Jises ndruni iy udu asiu tinan ta Kindrei, ma iy tiye i tan, “Ou anyolom, ou ndramwenen kede-eh, ou ka-iy abudon lomondra ndra-in. Bwe kameh lakou ndra-in labai ja asahan tam.”

¹⁵Iy eme ili asehek tiri Juwis, “Nane badeh, Jises bwidi jo amwenen.”

¹⁶Jises amekes iri lakou doh udu bolo len ta amunyau tiri Juwis. Eme ma iri Juwis asilah madasan ta adi iy.

¹⁷Jises asehek ili toro i buku doh, “Tama badeh, iy ta amunyau bwe, iy ibo gok ili le ai. Jo ibo gok i buku le iy.”

¹⁸Idoh le badeh, bwidi iri Juwis abadok ta adai iy. Iri anya, “Ma bwena handru iy ba-en hamon ta len ta amunyau bwe, ano ja, iy anya, taman handru badeh, Kindrei. Iy amekes iy ja i buku le Kindrei.”

¹⁹Arile, Jises asehek i toro i buku doh, “Handru labai jo tiye tado, Nadu Kindrei winiyan bamekes lakou laleyah bwe. Iy winiyan amekes, buku iy atou taman amekes. Tasah, saba lakou taman amekes, nadun ale amekes.

²⁰Tama aso-ok nadun labai ma iy leheyani iy ta iri lakou iy amekes. Handru, tama winiyan leheya nadun ta lakou laba tinan ja, ma mani ado kameh atur ta aliy.

²¹Tama mete-ei iri lau ndramak ma iy atehei kohan ili tiri. Nadun kameh amekes i buku le budon ta taman, iy ale edeu kohan ili tiri lau na le budon tan.

²²Tama batehei ari ndramak bare ta mada sahou bwe. Tasah, gok marakon badeh, iy ndratehei ndrala mine nadun.

²³Kindrei amekes i buku doh ta iri lau marakon kamasiye nadun, i buku le iri lau marakon masiye taman. Are lau bamasiye nadun bwe, iy ale bamasiye taman bwe le. Tasah, tama suni nadun ta eme.

²⁴“Handru labai, jo katiye tado: Are lau iy anuhun sahou tek ma iy atehei budon in ta iy nane suni jo eme, kohan handru kameh winiyan bano bwe, iy kameh ta udu le buku doh. Iy winiyan bala ta mada sahou bwe. Iy ndrasakalawi imek, ma iy akohok kohan handru.