Jon 5:5-47

⁵Iikanoŋ eja moŋ gbani 38:waa so ji kiro eŋkero.

⁶Iikanoŋ ero Jiisasnoŋ kouma iima kambaŋ koriga totooŋ ji kiro eŋ laligoroti, ii moma kokaeŋ qisiŋ muro, “Gii qeaŋgomambaajoŋ mojaŋ me qaago?”

⁷Qisiŋ muro kokaeŋ meleeno, “Oo Poŋ, apunoŋ oroŋ otoŋ aoro alana moronoŋ mono aŋgoŋ terunoŋ noma noonaga? Alana kaaŋa moŋ mende laligoja. Neeno kemambaajoŋ moma batogoŋ laligoweti, kambaŋ iikanondeeŋ tosaaŋa yoŋoonoŋga moŋnoŋ nii nuuguŋ kemeŋkeju.”

⁸Meleema muro Jiisasnoŋ ijoro, “Gii mono waama tambomaeega meŋ kemba.”

⁹Kaeŋ ijoro moma iikanondeeŋ qeaŋgoŋ tambomaeeya meŋ keno. Kenoto, iwoi ii Sabat kendonoŋ kolooro.

¹⁰Iikawaajoŋ Juuda yoŋonoŋ eja qeaŋgoroti, ii kokaeŋ ijogi, “Kete Sabat kendoŋ kolooja. Kawaajoŋ tambomaeega meŋ aŋgoŋ kana mende sokonja.”

¹¹Ijogi kokaeŋ meleeno mogi, “Meagoŋ nonji, iinoŋ kokaeŋ jeŋ tegoŋ nonja, ‘Gii mono waama tambomaeega meŋ kemba’.”

¹²Ii moma kokaeŋ qisiŋ mugi, “Eja moronoŋ goojoŋ ‘Tambomaeega meŋ kemba,’ jejaa?”

¹³Qisiŋ mugito, Jiisasnoŋ meŋ qeaŋgoro ejemba tuuŋ somatanoŋ ologogi yoŋoo batugianoŋga iliŋoloŋ koma keno. Kawaajoŋ moronoŋ ii ama muroti, ii mende moma tompiririŋ qeŋ nano.

¹⁴Iikawaa gematanoŋ jiwowoŋ jigo totoŋ uutanoŋ uro Jiisasnoŋ iikanoŋ mokolooŋ muŋ qambaŋmambaŋ qaa kokaeŋ ijoro, “Moba, gii qeaŋgojaŋa. Kawaajoŋ tiwitiwilaa seiyawo bologa moŋ kolooŋ gombabotiwaajoŋ mono siŋgisoŋgo mombo mende toroqeŋ ama laligowa.”

¹⁵Eja qeaŋgoroti, iinoŋ Jiisas iima kotoŋ kema Juuda jotamemeya ii kokaeŋ iŋijoro, “Eja meŋ qeaŋgoŋ nonoti, iwaa qata Jiisas.”

¹⁶Ii moma Jiisasnoŋ Sabat kendonoŋ gawoŋ kaaŋa meroti, Juuda jotamemeya yoŋonoŋ iikawaajoŋ ama sisiwerowero ama muŋ laligogi.

¹⁷Kaeŋ laligogito, Jiisasnoŋ kokaeŋ meleema oŋono, “Noo Amananoŋ suulaŋ gawoŋ meŋkeja ano niinoŋ kaaŋiadeeŋ ii meŋkejeŋ.”

¹⁸Kaeŋ meleema oŋoma ejemba Sabat kendombaa qaa tosaaŋa toroqeŋ aŋgi Jiisasnoŋ ii nanamemeŋanoŋ qewagoŋ yoŋoo jaagianoŋ siŋgisoŋgo ano. Siŋgisoŋgo ii toroqeŋ Anutuwaajoŋ ‘Amana!’ jeŋ Anutu tani kaaŋa laligojiwaa so kolooŋ iyaŋa meŋ uma aoro. Juuda ejemba yoŋonoŋ iwoi woi iikawaajoŋ ama moma kobooŋ kaparaŋ koma Jiisas qewombaajoŋ jeŋ kotiigi. Kiaŋ.

¹⁹Kaeŋ aŋgito, Jiisasnoŋ qaa kokaeŋ iŋijoro, “Niinoŋ qaa hoŋa tooŋ moŋ kokaeŋ iŋijowe mobu: Meranoŋ iyaŋaa uutaajoŋ iwoi moŋ mende meŋkejato, Maŋanoŋ iwoi meŋkeji, Merianoŋ mono ii kaaŋiadeeŋ meŋkeja. Kawaajoŋ Maŋanoŋ iwoi mero iimakeji, iinoŋ mono iikayadeeŋ meŋkeja.

²⁰Maŋanoŋ Meria uunoŋ jopagoŋ muŋ laligoŋ aŋo gawoŋ meŋkeji, ii kuuya qendeema muŋkeja. Kawaajoŋ aŋgoleto iima laligojuti, ii iwoi kamaaŋqeqeta. Iikawaa hoŋa ii kanageŋ qendeema oŋono iima newogia tegoro waliŋgoŋ laligowuya.

²¹“Moŋ kokaembaajoŋ waliŋgowu: Amanoŋ ejemba koomuya oŋomindiiro gbiliŋkeju. Merianoŋ mono iikawaa so kaaŋiadeeŋ ejemba koomuya moroga gbiliwutiwaa moji, ii mono oŋomindiiro gbiliŋkeju.

²²Kaaŋiadeeŋ Amanoŋ mombaa qaaya mende jeŋ tegoŋkejato, jenteego gawombaa ku-usuŋa kuuya ii kokaembaajoŋ Meriaa borianoŋ anota eja:

²³“Ejemba Ama goda qeŋ muŋkejuti, iikawaa so kuuyanoŋ Meria goda qeŋ mubutiwaajoŋ moja. Amanoŋ Meria wasiŋ muro. Kawaajoŋ moŋnoŋ Meria mende goda qeŋ muji, iinoŋ mono Ama kaaŋagadeeŋ goda mende qeŋ muja.

²⁴Kawaajoŋ niinoŋ qaa hoŋa tooŋ moŋ kokaeŋ iŋijowe mobu: Moŋnoŋ noo Buŋa qaana moma nii wasiŋ nonoti, ii moma laariŋ muji eeŋ, iinoŋ mono laaligo kotigaa buŋa kolooja. Niinoŋ qaaya jeŋ tegowe gere siawaa buŋa mende koloowaa. Koomu kotigaa leeya mesaoŋ jawo waleema laaligo kotigaa leegeŋ keuma laligoŋ ubaa.

²⁵“Niinoŋ qaa hoŋa tooŋ moŋ kokaeŋ iŋijowe mobu: Kambaŋ qaita moŋ kawaati, ii mono noojoŋ ama kaŋ kuudaboroja. Kambaŋ iikanoŋ siŋgisoŋgo ama uunoŋ koomuya koloojuti, iyoŋonoŋ Anutuwaa Merianoŋ qaro qaa aroya mobu. Ii moma teŋ kombuyati, iyoŋonoŋ mono gbiliŋ kotiiŋ laligowu.

²⁶Ii kokaembaajoŋ: Ama aŋo laaligo kombombaŋa kondooŋkeji, iikawaa so laaligo gbiliŋ kotiiwaatiwaa ku-usuŋa ii Meria muro iinoŋ kaaŋagadeeŋ ejemba meŋ gbiliŋ oŋomakeja.

²⁷Iinoŋ Siwe gomambaa Eja Hoŋa laligojiwaajoŋ ama Amanoŋ ejemba qaagia jeŋ tegowaatiwaa ku-usuŋa kaaŋagadeeŋ iwaa boronoŋ ano iwaa buŋa kolooro.

²⁸“Niinoŋ qaa kota jejeŋi, iikawaajoŋ mono mende aaruwu. Kambaŋ moŋ kaŋ kuuwaati, iikanoŋ kuuya qasirinoŋ ejuti, yoŋonoŋ kaaŋagadeeŋ qa qabaati, ii mobuya.

²⁹Qata ii moma waama asuganoŋ asugigi nanamemeŋ awaa ama laligogiti, iyoŋonoŋ laaligo kotiganoŋ keubuto, nanamemeŋ bologa ama laligogiti, niinoŋ iyoŋoo qaagia jeŋ tegowe koomu kotigaa buŋa koloowuya.

³⁰Niinoŋ neenaa uunaajoŋ iwoi moŋ neeno ama memambaajoŋ amamaaŋkejeŋ. Nii Amawaa jetanoŋga qaa momakejeŋi, mono iikawaa so ejemba qaagia jeŋ tegoŋ oŋomakejeŋ. Neenaa uunaajoŋ tondu mende meŋkejento, wasiŋ nonoti, mono iwaa qaaya otaaŋkejeŋ. Kawaajoŋ jenteego qaana jeŋkejeŋi, ii mono soyanoŋgadeeŋ kolooŋkeja.” Kiaŋ.

³¹“Niinoŋ neenaa kaniana naŋgoŋ jewenagati eeŋ, qaana iikanoŋ saanoŋ mende kotiinaga.

³²Alana moŋnoŋ noo kaniana naŋgoŋ jeŋkeja. Iinoŋ noojoŋ qaa jeŋkeji, iikanoŋ mono kotiiŋ hoŋawo kolooja, ii mojeŋ.

³³Oŋo jotamemeya wasiŋ oŋoŋgi Jombaanoŋ kagi qaa hoŋaa so noo kaniana iŋisaama jeŋ naŋgoro.

³⁴“Jeŋ naŋgoroto, niinoŋ namo ejawaa naŋgonaŋgo qaaya ii moma mende mobe uja. Mende ujato, Jombaa naŋgonaŋgo qaawaajoŋ jeŋkejeŋi, ii mono oŋo kambaŋ kokaamba letoŋgi Anutunoŋ waŋgia somoŋgowaatiwaajoŋ ama jeŋkejeŋ.

³⁵Jonoŋ kiwa somata kolooŋ awaagadeeŋ jeŋ asariroto, oŋo kambaŋ koriga qaagoto, kambaŋ torodaamoŋ iwaa asasaganoŋ tondu aisoowombaajoŋ siiŋa mogi.

³⁶“Jonoŋ noo kaniana torodaamoŋ iŋijoro mogito, moŋnoŋ ii naŋgoŋ jeŋkeji, iwaa qaayanoŋ mono Jombaanoŋ naŋgonaŋgo qaa uuguja. Neenaa Amananoŋ gawoŋa nono mewe hoŋa kolooŋkeja. Hoŋa iikanoŋ mono kaniana kokaeŋ naŋgoŋ iŋisaamakeja: Amanoŋ wasiŋ nono iwaa jeta memeya koloojeŋ.

³⁷Amanoŋ wasiŋ nono kamaaweti, iinoŋ kaniana naŋgoŋ jeŋ laligoro. Oŋo kambaŋ moŋnoŋ iwaa qaa aroya mende mogi ano kaitania mende iigi.

³⁸Iinoŋ moroga wasiro kamaaroti, oŋo ii mende moma laariŋ muju. Kawaajoŋ iwaa qaayanoŋ mono oŋoo uugianoŋ mende eja.

³⁹“Oŋo laaligo kotigaa kania ii Buŋa Terenoŋ eŋ oŋonja, iikaeŋ romoŋgoŋ ii weeŋgoŋ uu konoŋgianoŋ ama Siwewaa buŋa koloowombaajoŋ moju. Kaeŋ mojuto, tereya tereya kuuya yoŋonoŋ mono noo kaniana naŋgoŋ iŋisaamakeju. Ii moma yagoju me qaago?

⁴⁰Naŋgonaŋgo qaa mamaga ejato, oŋo laaligo kombombaŋa buŋa qeŋ aowombaajoŋ noonoŋ kawombaajoŋ togoŋkeju.

⁴¹Balonoŋ ejemba yoŋonoŋ qabuŋa noŋgi somariiwaatiwaajoŋ mende mambonjeŋ. Ii noŋgi mobe mende uro laligojeŋ.

⁴²Kaeŋ laligojento, oŋoo kaniagia ii kokaeŋ eji, ii mojeŋ: Oŋo uugia Anutuwaanoŋ qaago totooŋ somoŋgoŋ uujopa mende ama muŋ laligoju.

⁴³Niinoŋ Amanaa qata qama kawe oŋo gema nuŋkejuto, moŋnoŋ iyaŋaa qata qama kawaati, oŋo mono ii saanoŋ moma aŋgoŋ koma horoŋ mubu.

⁴⁴“Oo oŋo oŋoaŋgia mepeseeŋ aoŋ qabuŋagia somariiwaatiwaa mogi umakeja. Umakejato, beŋ motooŋgonoŋ Anutu hoŋa kolooji, iinoŋ qabuŋa oŋombaatiwaajoŋ kaparaŋ mende komakeju. Kaeŋ ama akadamugiawo koloowutiwaajoŋ mende janjariŋ riiŋ nanju. Kawaajoŋ nomaeŋ nii moma laariŋ nombuyaga? Ii mono amamaawuyaga.

⁴⁵“Niinoŋ oŋo ‘Amawaa jaasewaŋanoŋ qaa jakeyanoŋ ama oŋomaŋa,’ kaeŋ mobubo. Oŋo Mooseswaa qaawaa jejeromoŋromoŋ ama Siwe gomanoŋ ubombaajoŋ mamboma laligojuto, Anutuwaa jaanoŋ keugi Mooses aŋo Anutuwaa qaa jakeyanoŋ oŋooma qaa selegianoŋ kuuŋ oŋono gamugia mobuya.

⁴⁶“Ii kokaembaajoŋ: Moosesnoŋ noo kaniana jeŋ asariŋ Buŋa Terenoŋ oorota eja. Kawaajoŋ Mooses moma laariŋ mubuyagati eeŋ, mono nii moma laariŋ nombuyaga.

⁴⁷Kaanto, Mooseswaanoŋ tere ii mende moma laariŋ teŋ konjutiwaajoŋ mono noonoŋ qaa ii nomaeŋ moma laariwuyaga? Ii kupukapayawo koloowabo.” Kiaŋ.