Jon 5:38-46

³⁸Ke orek kia biil i kiis na liu kimi, wara le, biil gam unune lo seh ae i wuun ta u.

³⁹Gam famam parpar tole foron sun orek na Buk na Gogoh, i wara gam wol le na foron orek ae in ta liu fitliu sing gam. Foron orek tom ae ri famalal sanih i tekentu ulo iau.

⁴⁰Isau le biil gam ier isi la una aisang, isi gamek kep liu.

⁴¹“Biil ia somangat pes ususefages sing fanu.

⁴²Isau le, ia usum lo gam foron matngan fanu arafah. Ia usum le, biil gam ier isi God na balmi.

⁴³Ia la tah ugapiek, wara le Tata i wuun ta iau, ke biil gam somangat pes iau. Isau le, male tikas in la tom ini wolwol kia, ke gamek somangat pes u.

⁴⁴Biil i fasih gamen unune lo iau, male gam somangat pes ususefages sing temtem tikii lo gam tom, ma biil gam totof isi kep ususefages tinbae sau sing God.

⁴⁵“Isau le gong gam wol le, ian ususe ami sing Tata. Biil. Ier ae in ususe ami, i e Moses, ae gam luun unune kimi lo le in lupes gam.

⁴⁶Male gamen unune ta lo Moses, ke gamen unune sabin lo iau, wara le ka siit ta orek an famalal ulo iau.