15Pen bi kun ak nuk andkind amiy, Jiwda biyomb gok kuyip a艐gak, 鈥淛iysis nep yip gamb su艐 ayip a艐gak.鈥
16Kun a艐gek ni艐iy, lotiw 帽in ak gek su艐 ayak a艐giy, Jiysis nup miluk ni艐yak.
17Nuk pen a艐gak, 鈥淏apiy yand ak wo艐g ginep mindip rek, yand kunep ginim a艐gak.鈥
18Kun a艐gek, Jiwda biyomb gok, nup nind 帽a艐gjun a艐giy gos ni艐yak ak, kilis yimb giy ni艐yak. 鈥淟otiw 帽in chinup low ar ak nep ma timbrikip; yand Gor 脩inuk a艐gip ak, Gor mindip rek mindpiyn a艐giy asap a艐gyak.鈥
19Jiysis pen kuyip a艐gak, 鈥淣imbip ni艐ind aspiyn: 脩i ak nuk key tap bap ginimu艐 rek ma ayip; Nop tap gini艐gamb gok nep ni艐iy gini艐gamb. Kun ak, Nop gini艐gamb rek, 脩inuk kunep gini艐gamb.
20Nop 脩inuk nup wasemb ay, tap nuk gip gip gok ma艐giysek yomimb. Gunap yomek mey, tap key yimb gok gek ni艐iy, nimb ma艐giysek wal a艐gni艐gambim.
21Pen Nop biynimb kumbay gok, gek tikjakpay rek, 脩inuk kunep, biynimb gunap gen tikjakya艐 a艐giy, gek tikjakni艐gambay.
22Biynimb yerer gipay; gos yerip yerip ni艐bay ak, Nop key kuyip ma bilokip; 脩inuk nup a艐gek bilokip.
23Kun ak mey, Nop yimb ak dand araniy, 脩inuk nup yimb ak dand araniy gini艐giy. Pen biynimb 脩inuk anup yimb ma dand aranimbay gok, Nop yokek owak anup yimb ak kunep, ma dand aranimbay.
24鈥淣imbip ni艐ind yimb aspiyn. Biynimb minim yip ak ni艐iy, Bi yip a艐gyokek winik anup, gosimb ni艐ni艐gambay gok, kumemb kind ak kirgiy, perper mindep kind ak mindpay. Kun ak mey, kor yomb ak ma ni艐ni艐gambay; perper mindeni艐gambay.
25Nimbip ni艐ind yimb aspiyn. 脩in kisen per kond mindpun ak mi帽iy wip biy, biynimb kumni艐giy rek mindpay gok, Gor 脩inuk minim ak ni艐ey, kuyip dek, biynimb nuk mindeni艐gambay.
26Nop tap okok ma艐giysek kim mindep ki帽i艐 ak mindip rek, 脩inuk kunep kim mindep ki帽i艐 ak mindip.
27Nuk Bi bap 脩inuk ak mey; Nop a艐gek biynimb gok kuyip bilokni艐gamb.
28Minim aspiyn kun ak ni艐iy wal ma a艐gnimimb; kisen nuk, biynimb kumey komyak gok a艐gek,
29ma艐giysek tikjakiy; biynimb mindrep giyi艐gipay gok, am Gor yip mindeni艐gambay; pen mindrep ma giyi艐gipay gok, miker yomb dini艐gambay.
30Yand yerip yerip gipiyn ak, key ni艐iy ma gipiyn; Bapiy nep yip a艐gamb gipiyn. Kun ak biynimb bilokpiyn ak, Bapiy a艐gip rek ni艐iy, yipund giy nep bilokpiyn. Key ni艐iy gen, bilokrep ma gip apkip ak pen; Bi yip a艐gek winik ak, gos nuk 帽imb rek ni艐iy gipiyn.
31鈥淵and nep Gor yip yokek winik apnip ak, yipund ma gipkop. Pen yand ni艐biyn: Bi yip yokek winik ak, minim nuk a艐gip ak, ni艐ind yimb nep a艐gip.
Jon 5
Jon 5:15-31