Jon 5:13-37

¹³Tialima, te sana pali bidi agai Jisasgo nogi konebeo. Magi basowe? Te bulude we bidi hauwa mu elalubao, tama Jisas pai.

¹⁴Nosali Jisasgo te bidi te Moni Lotu Be tempel tomode ma sulama, te po wai, “Odaliwe? Megi da nage usu yali dao. Nago dwai sę dabe ebo tagalao. Tiyu moni sęgę nageba pedalabuo,” Jisasgo te bidibolo te po wai.

¹⁵Tama te bidi pelama, Juda genuai bidi dabebolo wagi pai, “Ena geselai bidi te Jisas yalio,” te bidigo Juda dabego tobolu bidi dabebolo te po wagi pai.

¹⁶Tama tibaso, Juda dabe genuai bidi augwaligo Jisas dali boi bidi homu ebo gagalali. Magi basowe? Jisasgo te bidi geselali te Juda bage augwaligo olo bidibo side te sę yali.

¹⁷Tialima, Jisasgo po wei ponoyu, te po wai, “Eno Aya agai sę polobadu yali sę megi tama te ela asobao. Tama eno me ena sę ebao,” Juda dabe genuai bidi dali Jisasgo te po wai dao.

¹⁸Tama tialima, Juda genuai bidi augwaligo bomo eyu, Jisas mu elabo homu yai. Magi basowe? Augwaligo e homu yali, Jisas agai Juda bagego olo bidibo Sabat sogo bomo yai po te bolobaso naga menio. Jisas agai te po wabo, ‘God da, te ena Aya mu da’ wabo dao. Te wabo po da, Jisas aga digi aga te God tiwai pedalainogo wabuo Tama tibaso me augwaligo aga mu elabo homu yai.

¹⁹Te Jisasgo po wei ponoyu, te po wai, “Eno dagebolo mu po tama obao, Godigo Ogwago agaduba homugo magi sę me ebo menio. Agai Ayago ebo sę naga sulama, agai ebo dao. Tigidali sę Ayago ebo, te aga Ogwago tama ebo dao.

²⁰Aya Godigo homugo aga Ogwa mu godola pabo, tama God agai ebo sę tigidali aga Ogwabolo ola mabo dao. Aya agai bomai sę me nosali aga Ogwabolo ola mawaibao. Tama te sęgo eno hasia yali sę aiyaba elaluaibao. Tama tibaso, dage noma siyu, homu hauwa yaibao.

²¹God Ayago isai bidi ma hodolama, bidabo bomo mabo dao. Tama tibo gilama, Ogwago me aga homugo we bidibolo bidabo bomo mabo dao.

²²God agai digi agai bidi me deli agai po tų dodolobo menio. Tigidali po tų ebo sę agai aga Ogwago nogoba mawai dao.

²³Magi baso meni. Tigidali bidigo Godigo Ogwa nogi ugwaba samainogo, te Godigo nogi ugwaba sabo gilamao. God Ayago aga Ogwa e tǫba tagala palobaso, tama bidi te Godigo ogwago nogi ugwaba sisąbo bidi da, agai Godigo nogi me ugwaba sisąbo bidi da,” Jisasgo te po wai.

²⁴“Te eno mu po dagebolo obao, niwai bidigo eno po odama, tama te po wali pelama, tama ena tagala palali bidibolo te bidi agai bomo yai homu agabolo muyu da, te aga bidada peyu, bidada pabo bomo selama, bidaibao. Te bidi aga po tų aga dali me egobeo. Te agai isibo tagalama, tama megi aga bidabo bomode bidibao.

²⁵Eno mu po dagebolo obao, te sogo pedalaibao, tama te megi polo pedalalio, tama isai bidi augwaligo Godigo ogwago po odaibao. Tama te po odama wali pabo we bidi dabe da, augwali mu bidaibao.

²⁶Eno Aya aga bidabo bomo aga digi elalubo. Tama agai bidabo bomo aga Ogwabolo mawai. Enabolo. Tama te tiwai te bidabo bomo te aga Ogwago me elalubo.

²⁷Aga te Godigo Bidi Mu dao, tigidali we bidi augwaligo abagi hasi bidi dao. Tama tibaso, Ayago agabolo te we bidi po tų yabo sę mawai.

²⁸Dagego noma selama, tama homu hauwa egimio. Nosali me sogo pedalobo side da, gų pagede bidali bidi augwaligo te Godigo Bidi Mugo wabo po odaibao.

²⁹Tama augwaligo te po odobaso, tama augwali gų page tagalama, buluba dią asaibao. Me badu we bidi augwaligo dwagi yai kolesaga yali da, augwali hodaluama, bidabo bomo selama, bidaibao. Me badu we bidi augwaligo dwai kolesaga yali da, augwali hodaluama, tama po tųde sęgę saibao.

³⁰Eno homugo digi eno te sę ebo usu egobeo. Eno Godigo wali po naga wali pelama, tama eno po tų ebo dao. Tama tibaso, eno po tų ebo sę te dolo mu ebo dao. Magi basowe? Eno sę ena homugo me ebo menio. Te ena tagala palali bidigo homu eno wali pabo dao,” Jisasgo te po wai.

³¹Te Jisasgo po ma weyu, te po wai, “Enaduba naga ena te Godigo Ogwa da weyu da, te po usu egobeo.

³²Tialima, gasa bidi me bidibo. Tama eno Aya God agai ena tau sabo po te we bidibolo pusubo dao, augwaligo eno wabo po mu po dao konemainogo ebo dao. Tama eno koneai, agai te wali po enade wabo da, te po mu po wabo da.

³³Polobadu dagego te bidi Jonbolo dagego hanalu wali po tagala palai. Tama agai po pusuyu, eno po mu po dao wai.

³⁴Bidi mego eno wabo po tau sabo bidi elaluyu da, te usu da. Me ma, te tobage bidi meni baso da, te me usu da. Tialima, eno homugo Godigo dage ma somainogo. Tama teyu, eno Jon badi dagebolo me eno e po obao.

³⁵Jon da, te sole ula ebo gilama, agai ula we bidi dabebolo mawai dao. Tama dagego pęwadage side te ulade dagego dwagi yai homu osogo yai dao.

³⁶Tialima eno wabo po tau sabo nai me elalubao, te moni bage mu dao. Eno Ayago enabolo sę mani, ena te sę tigidali elama, silimainogo ebao. Te sę dabe eno ebo dao. Tama te ebo sęgo me te we bidi ola menama, augwaligo konebo dao, Ayago ena tagala palobaso, ena asai dao,” Jisasgo te po wai.

³⁷“Tama Aya Godigo ena tagala palobaso ena asai, aga digi eno wabo po tau sabo dao. Dagego agai pedauwalidu wali po me odai menio. Tama dagego agai gesabi me munu me subeo, tama agai po me dagego homude bidibeo.