Jon 5:10-37

¹⁰Miaŋgöra Juda yeŋön azi ölöwahöhi, yaŋgöra kewö jiget mörök, “Merak Sabat kendon akza. Miaŋgöra tumbulahöpki memba aŋgunöŋga qahö dop kölja.”

¹¹Mi möta kewö meleŋni mötket, “Möhamgöm niŋgizawaŋön mönö kewö jim teköm niŋgiza, ‘Gi mönö tumbulahöpki memba anöŋ’.”

¹²Mi möta kewö qesim waŋgiget, “Azi daŋön göhöra ‘Tumbulahöpki memba anöŋ,’ jiza?”

¹³Qesim waŋgigetmö, Jisösnöŋ mem ölöwahiga ambazip kambu ketaŋan ölökögetka yeŋgö sutŋineyök sömuniba anök. Miaŋgöra daŋön mi ak waŋgiyöhi, mi qahö möta tönpin kinök.

¹⁴Miaŋgö andöŋe jöwöwöl jike tohoŋ uruŋe öŋgöiga Jisösnöŋ miaŋgöreŋ miwikŋaim waŋgiba qambaŋ keu kewö jii mörök, “Mötnöŋ, gi lök ölöwakzan. Miaŋgöra ayuayuhu törösait bölöŋi kötökŋi kun asuhum gihibapuköra mönö siŋgisöndok kunbuk kude aka malman.”

¹⁵Azi ölöwahöhi, yaŋön Jisös ek kutuba anda Juda jitŋememe yeŋgöra kewö jii mötket, “Azi mem ölöwak niŋgiyöhi, yaŋgö qetŋi Jisös.”

¹⁶Mi möta Jisösnöŋ Sabat kendonöŋ nup mewöŋi meyöhi, Juda jitŋememe yeŋön miaŋgöra aka sesewerowero ak waŋgiba malget.

¹⁷Mewö malgetmö, Jisösnöŋ kewö meleŋ eŋgiyök, “Nöŋgö Iwinan sundan dop nup memakza aiga nöŋön mewöŋanök mi memakzal.”

¹⁸Mewö meleŋ eŋgiba ambazip Sabat kendongö keu tosatŋi toroqeba algetka Jisösnöŋ mi ahakmemeŋan qeapköba yeŋgö jeŋine siŋgisöndok ahök. Siŋgisöndok mi toroqeba Anutugöra ‘Iwini’ jiba Anutu tandök ewö maljawaŋgö dop aka nanŋi mem öŋgöyök. Juda ambazip yeŋön yuai yahöt miaŋgöra aka möt kömbuhiba kapaŋ köla Jisös qebingö jim köhöiget. Mewö.

¹⁹Mewö aketmö, Jisösnöŋ keu kewö jii mötket, “Nöŋön keu öl töhönŋi kun kewö jibi mötket: Nahönöŋ nanŋi uruŋaŋgö yuai kun qahö memakzapmö, Iwinöŋ yuai memakzawi, Nahönŋan mönö mewöŋanök memakza. Miaŋgöra Iwinöŋ yuai meiga ehakzawi, yaŋön mönö miyök memakza.

²⁰Iwinöŋ Nahönŋi urunöŋ jöpaköm waŋgiba mala nanŋak nup memakzawi, mi pakpak kondel waŋgimakza. Miaŋgöra aŋgöletot eka maljei, mi yuai eretŋi. Miaŋgö ölŋi mi könaŋgep kondel eŋgiiga eka nemböŋini teköi welipköba malme.

²¹“Kun kewögöra welipköme: Iwinöŋ ambazip kömukömuŋi eŋgömindiiga gulimakze. Nahönŋan mönö miaŋgö dop mewöŋanök ambazip köhömuŋi niŋia gulimegö mötzawi, mi eŋgömindiiga gulimakze.

²²Mewöŋanök Iwinöŋ kungö keuŋi qahö jim tekömakzapmö, jimtekötekö nupkö kukösumŋi pakpak mi kewögöra Nahönŋaŋgö böröŋe ali ahöza:

²³“Ambazip Iwi göda qem waŋgimakzei, miaŋgö dop körekŋan Nahönŋi göda qem waŋgimegöra mötza. Iwinöŋ Nahönŋi melaim waŋgiyök. Miaŋgöra kunŋan Nahön qahö göda qem waŋgizawi, yaŋön mönö Iwi mewöyök göda qahö qem waŋgiza.

²⁴“Miaŋgöra nöŋön keu öl töhönŋi kun kewö jibi mötket: Kunŋan nöŋgöreŋ Buŋa keu möta mötmöriba ni melaim niŋgiyöhi, i möt narim waŋgiza ewö, yaŋön mönö malmal köhöikŋaŋgö buŋaya akza. Nöŋön keuŋi jim teköbiga könöp siagö buŋaya qahö akŋa. Kömup köhöikŋaŋgö likepŋi mosöta jabö kutuba malmal köhöikŋaŋgö likepŋe aŋgota mal öŋgöma.

²⁵“Nöŋön keu öl töhönŋi kun kewö jibi mötket: Nalö kun kama aka nöŋgöra aka lök kam kuŋguza. Nalö miaŋgöreŋ siŋgisöndok aka uru köhömuŋi akzei, yeŋön Anutugö Nahönŋan keu qeri mötme. Mi möta tem kölmeaŋön mönö guliba köhöiba malme.

²⁶Mi kewögöra: Iwinöŋ nanŋak malmal köhöikŋi kondorakzawi, miaŋgö dop malmal gulim köhöimapkö kukösumŋi mi Nahönŋi waŋgii yaŋön mewöyök ambazip mem gulim eŋgimakza.

²⁷Yaŋön Suep gölmegö Azi Ölŋi maljawaŋgöra aka Iwinöŋ ambazip keuŋini jim tekömapkö kukösumŋi mewöyök yaŋgö böröŋe ali buŋaŋi ahök.

²⁸“Nöŋön keu kötŋi jizali, miaŋgöra mönö kude aurume. Nalö kun kam kuŋgumawi, miaŋgöreŋ körek pakpak qaksirinöŋ ahözei, yeŋön mewöyök qet qetmawi, mi mötme.

²⁹Qetŋi mi möta wahöta aukŋe asuhugetka ahakmeme ölöpŋi aka malgeraŋön malmal köhöikŋe öŋgömemö, ahakmeme bölöŋi aka malgeri, nöŋön yeŋgö keuŋini jim teköbiga kömup köhöikŋaŋgö buŋaya akŋe.

³⁰Nöŋön nani urunaŋgö yuai kun nanak aka memamgö osizal. Ni Iwigö jitŋe mörakzali, mönö miaŋgö dop ambazip keuŋini jim teköm eŋgimakzal. Nani imbinaŋgö dop laŋ qahö memakzalmö, melaim niŋgiyöhi, mönö yaŋgö keuŋi wuataŋgömakzal. Miaŋgöra jimtekötekö keuni jimakzali, mi mönö dopŋeyök asuhumakza.” Mewö.

³¹“Nöŋön nani könaŋamni naŋgöba jibileŋak ewö, keuni miaŋön ölöp qahö köhöibawak.

³²Alani kunöŋ nöŋgö könaŋamni naŋgöba jimakza. Yaŋön nöŋgöra keu jimakzawi, miaŋön mönö köhöiba ölŋambuk akza, mi mötzal.

³³Iŋini jitŋememe melaim eŋgigetka Jongöreŋ kagetka keu ölŋaŋgö dop nöŋgö könaŋamni indela jiba naŋgöyök.

³⁴“Jiba naŋgöyökmö, nöŋön gölme azigö naŋgönaŋgö keuŋi mi möta qahö mötpi öŋgöza. Qahö öŋgözapmö, Jongö naŋgönaŋgö keugöra jimakzali, mi mönö iŋini nalö kewöŋe letotketka Anutunöŋ bohonŋini jöhömapköra aka jimakzal.

³⁵Jonöŋ kiwa ketaŋi aka ölöpŋanök jeba asariyökmö, iŋini nalö köröpŋi qahöpmö, töröptökŋanök yaŋgö asakŋe laŋ söŋgaibingö sihimŋi mötket.

³⁶“Jonöŋ könani töröptökŋanök jiiga mötketmö, kunöŋ mi naŋgöba jimakzawi, yaŋgö keuŋan mönö Jongöreŋ naŋgönaŋgö keu oŋgitza. Nani Iwinan nupŋi al niŋgii membiga ölŋi asuhumakza. Ölŋi miaŋön mönö könaŋamni kewö naŋgöba indelakza: Iwinöŋ mönö melaim niŋgii jitŋe memeŋi akzal.

³⁷Iwinöŋ melaim niŋgii erali, yaŋön könaŋamni naŋgöba jiba malök. Iŋini nalö kunöŋ yaŋgö keu kourukŋi qahö mötket aka kaisoŋgolomŋi qahö eket.