Jon 4:7-20

⁷Udu, badih ari badu Samariya eme anya ka-us gwa tan. Jises eme asehek sahou i tan i buku doh, “Wa-ik se gwa.”

⁸Iy le ari udu. Oro lau tan badeh, ndra-au ndrala bolo kon tinan ndrasih noro nyamon.

⁹Eme iy badih badu Samariya asehek sahou i tan i buku doh: “Ou badu Juwis, jo badih badu Samariya. Buku sah handru ou ndremenya jo ta gwa?” (Iri Juwis badeh winiyan bala hawe iri Samariya bwe.)

¹⁰Jises eme asumon sahou tan ja i buku doh, “Buku ou tanam boto-on ta Kindrei, ma are lau nane ndremenya ou ta gwa, ou winiyan ndremenya iy, iy winiyan edeu wa-im gwa kohan handru udu aliy.”

¹¹Butuhu Samariya dah anya, “Ndramak tinan, ou akohok wa-im gwa kohan udu aliy badeh, badu heh handru? Gwa kede-eh munun lawe-en labai, ma ou tam ari kawau ta a-us wa-im gwa kede-eh bo-oh.

¹²Sebwe ou kabin are loken labai ja ta tama ahi Jekop nadeh? Iy atehei gwa kede-eh eme tahi. Iy amwenen a-un gwa badu aliy; nadun oro ma iri bulumakau tan hawe iri sipsip tan a-un gwa dah ale.”

¹³Jises tiye i tan ja i buku doh, “Lau marakon a-un gwa dah, bale iri kameh amar ja.

¹⁴Buku are lau a-un gwa, jo edeu i wa-in, balen kameh winiyan bamar ja bwe. Gwa nane jo edeu i wa-in doh kameh asahan i buku gwa mulin udu bolo odan eme loken ma edeu kohan handru ta winiyan bano bwe, kameh ta udu le buku doh.”

¹⁵Butuhu Samariya tiye i ta Jises ja i buku doh, “Ndramak tinan, wa-ik se gwa badeh. Ma balek kameh winiyan bamar ja bwe. Ma jo kameh winiyan bame hamon ba-us gwa dah ja bwai.”

¹⁶Jises tiye i ta butuhu Samariya ja i buku doh, “Ou ala aloh udum, ano ah ma la-uh kame dah.”

¹⁷Eme iy badih nane dah anya, “Jo ari uduk bo-oh!” Jises tiye i tan ja i buku doh, “Ou asehek handru, ou ari udum bwe.

¹⁸Handru, ou atasou a toro mwan ma limeh. Arile, iy mwan ou an hawen kede-eh badeh, udum handru bwe, ou asehek sahou handru.”

¹⁹Iy badih asehek, “Ndramak tinan, jo ndranyolom ai, ou badeh, propet.

²⁰Tama ahi iri badeh, atudun nyara Kindrei udu bwele-e mandrei kodo-on. Arile aha Juwis asehek Jerusalem badeh, kon ta atudun nyara Kindrei.”