Jon 4:33-50

³³A kum nat na ususer det ting etetalai det lena, “Kutiro taio i sa tabor tari nam lako utna na inangon?”

³⁴O Iesu i watungi tandet lena, “Anga utna na inangon iri i, an pam sot pas a nemnem anun o naro ra i tulu ru iau urin, ma an urop anun a pinapam.

³⁵Mot ser watungi lenri, ‘A watnin kalang utmakai kura ra din pasong maragom.’ Ikut a watungi tamot lena: Mot in tamtama tokodos usa numugu, ma mot in tama a kum kinobot, det sa taka rop, ma i sa sot sur din pasong.

³⁶Uniri a musano ra i pasong i los anun a ikul. Ma a win anun a pasong, a utna sur a nilaun tukum, sur osi ra i marmarut ma osi ra i pasong, der in gas tomo.

³⁷A wasiso ra a taro det ser watungi, i lingmulus ut lenri, ‘Ara i marmarut, ma ara i pasong.’

³⁸A tulu mot sur mot in pasong una kinobot ra mot ut ka mot marut tari. Ara taro gisen ut det pam tari, ma mot, mot los a tinibo mukut tagun anundet a pinapam.”

³⁹A susut na te Samaria tagun a tamon ra, det nurnur un o Iesu. Det nurnur kibino una wasiso anun a ino, ra i watungi tandet lena, “I inanos iau una kum utna rop ra a sa pam tari numugu.”

⁴⁰Ra a taro Samaria det wan torom o Iesu, det saringi sur in kis nisandet, ra i kis pas aru bung tiro iai.

⁴¹A susut melet det nurnur, kibino una nun a wasiso.

⁴²Det watungi tan a ino ra lena, “Uniri met sa nurnur, awu sur una wasiso kut ra u watungi un o Iesu, awu. Met ut, met sa longoro i, ma met sa tasman mulusi lena, i a Tene Ulaun anun a rakrakon bual.”

⁴³Ra aru bung i sa rop, o Iesu i wan utong o Galili.

⁴⁴O Iesu ut i sa watung tar a wasiso lenri, “A poropet, a taro una nun a tamon ka det ser ru i.”

⁴⁵A taro tagitong o Galili det sa wan pas una labino bung na lotu na Wanlakai sapat o Jerusalem, ma det sa tama tar a kum utna rop ra o Iesu i pami sapat iai. Ra o Iesu i wanpat tong o Galili, a taro det gas pasi.

⁴⁶O Iesu i wan melet utong o Kana una papor Galili, a tamon ra i pukus tar a danim sur a wain iai. Ara mugumugu tagun a gapman, ra i papam utuntudu ina king, o nutunulik a musano i misait tong o Kapernaum.

⁴⁷I longoro i lena o Iesu i wan tagisapat o Judia utong o Galili, ra i wan toromi, ma i saringi sur in nan utong o Kapernaum sur in ulangolango pas o nutunu a musano, i milau mo sur in mat.

⁴⁸O Iesu i watungi tano lena, “Ra ka mot tama a kum utna na ukisin ma lako kum ukinalong, ka mot in nurnur ut.”

⁴⁹Ra a mugumugu anun a gapman i watungi lena, “Labino, dar in nan lakit sako o nutunglik in mat.”

⁵⁰O Iesu i watungi tano lena, “Un nan kut, o nutumlik in laun.” A musano ra i nurnur una wasiso anun o Iesu, ra i wan.