Jon 4:3-25

³Ra o Iesu i sa tasmani lena a kum Parisi det sa longoro i, i wan tagitiro una papor Judia ra i milet melet utong una papor Galili.

⁴Una nun a inawan i wan potor tong una papor Samaria.

⁵Tiro una papor Samaria, i wanpat una tamon Sikar. I milau i kut a du piso ra, un ra bung ut, o Jekop i tabor tar o nutunu, o Josep nami.

⁶In nutung na danim, ra o Jekop i sa kil tari, kura tiro iai. O Iesu i taramo a pinino i tungulu una nun a walos na inawan, ra i kis mo tiro nisan in nutung na danim ra. Una du bung ra, in matanas i sa kis lekeleke.

⁷Ara ino Samaria i wanpat sur in itup, ra o Iesu i watungi tano lena, “Un tabor iau nam lako danim.”

⁸Anun a kum nat na ususer det sa wan taru utiro una tamon, sur det in kul utna na inangon.

⁹A ino Samaria i balu o Iesu lena, “Ui a te Juda, ma iau a ino Samaria. Sur asau ra u saring iau sur lako danim?” Uni a kum te Juda ka det emarom nama kum te Samaria.

¹⁰Ikut o Iesu i balu i lena, “Ra u tasman a etabor anun o God, ma u tasman osi kai ra i saring ui sur lako danim, un saringi, ma in tabor ui nama danim na nilaun.”

¹¹A ino i watungi tano lena, “Labino, katu utna na ititup anum, sur un itup danim nami. In nutung na danim ri i dordorong doko. Ma tagai a danim na nilaun ra?

¹²U nuki lena u labo taun a tubundat o Jekop ra i tabor met namin nutung na danim ri? Det tomo nama kum nutnutunu ma anun a kum wewegua kai, det rop det ininum taguni.”

¹³O Iesu i balu i lena, “Det rop ra det inum a danim ri, det in muruk melet kut.

¹⁴Ikut det ra det in inum a danim ra an tabor det nami, ka det in muruk melet mo. A danim ra an tabor det nami, in elar nam ara matmatano danim una nundet a nilaun, ra in burburak pat ma in tabor det nama nilaun tukum.”

¹⁵A ino i watungi tano lena, “Labino, un tabor iau nama danim ra, sur gong melet mo a muruk, ma gong mo a wan liklik urin sur an itup.”

¹⁶Ra o Iesu i watungi tano lena, “Un nan ma un ben pas anum a musano, ra mur in milet melet urin.”

¹⁷A ino ra i balu i lena, “Katu musano anung.” O Iesu i watungi tano lena, “A lingmulus ut ra u watungi lena katu musano anum.

¹⁸U sa nolin pas nama limo na musano, ma ara, ra uniri u kis tomo nami, awu sur anum a musano. A lingmulus ut ra u watungi tang.”

¹⁹A ino i balu i lena, “Labino, uniri, a tasmani lena ui a poropet.

²⁰A kum tumtubu met tagun numugu det ser lotu torom o God una tangai ri, ikut mot a taro Juda mot watungi lena, din lotu torom o God sapat kut o Jerusalem.”

²¹Ra o Iesu i watungi tano lena, “Tama i, a lingmulusino ri an watungi tam, a du bung in nanpat, ra ka mot in lotu mo torom o Tita una tangai ri, ma sapat kai o Jerusalem, awu.

²²Mot a kum te Samaria ka mot tasman osi ra mot ser lotu toromi, ma met a taro Juda met tasmani ut osi ra met ser lotu toromi, uni a pinapam anun o God ra i ulaun a taro, i wanpat ut tagun a taro Juda.

²³A du bung in nanpat ma iri i sa wanpat, ra a kum tene lotu mulus det in lotu torom o Tita una nion ma una lingmulus. A kum ngas na tene lotu lenra, o Tita i nem doko det.

²⁴O God a nion. Det ra det ser lotu toromi, det in lotu ut una nion ma una lingmulus.”

²⁵Ra a ino i watungi tano lena, “A tasmani lena a Mesaia ra di watungi nama Karisito, in nanpat, ma in upuaso a kum utna rop torom dat.”