Jon 4:14-35

¹⁴Buku are lau a-un gwa, jo edeu i wa-in, balen kameh winiyan bamar ja bwe. Gwa nane jo edeu i wa-in doh kameh asahan i buku gwa mulin udu bolo odan eme loken ma edeu kohan handru ta winiyan bano bwe, kameh ta udu le buku doh.”

¹⁵Butuhu Samariya tiye i ta Jises ja i buku doh, “Ndramak tinan, wa-ik se gwa badeh. Ma balek kameh winiyan bamar ja bwe. Ma jo kameh winiyan bame hamon ba-us gwa dah ja bwai.”

¹⁶Jises tiye i ta butuhu Samariya ja i buku doh, “Ou ala aloh udum, ano ah ma la-uh kame dah.”

¹⁷Eme iy badih nane dah anya, “Jo ari uduk bo-oh!” Jises tiye i tan ja i buku doh, “Ou asehek handru, ou ari udum bwe.

¹⁸Handru, ou atasou a toro mwan ma limeh. Arile, iy mwan ou an hawen kede-eh badeh, udum handru bwe, ou asehek sahou handru.”

¹⁹Iy badih asehek, “Ndramak tinan, jo ndranyolom ai, ou badeh, propet.

²⁰Tama ahi iri badeh, atudun nyara Kindrei udu bwele-e mandrei kodo-on. Arile aha Juwis asehek Jerusalem badeh, kon ta atudun nyara Kindrei.”

²¹Jises asehek i tan anya, “Ou badih kede-en, ou atehei budon tam marakon keme le tek. Len hamon eme kameh aha winiyan batudun tama taha Kindrei winiyan bado bwele-e mandrei dah bwe, ma iri Juwis ale winiyan batudun iy bado bolo Jerusalem bwe le.

²²Aha Samariya atudun lakou, aha bala tana aha iy bwe. Ahi atudun saba lakou ahi tanan. Tasah lahou ta Kindrei ta akohok taha ame len ta kandriyen ndra-in badeh, asahan tahi Juwis.

²³Len eme, ma ndrasahan ai. Idah kameh iri lau ta atudun iy handru, iri kameh atudun tama i san ta Malawin Ndrabun, ma ta kandriyen handru. Tama badeh, aso-ok iri lau marakon katudun iy le ari.

²⁴Kindrei badeh, iy Malawin Ndrabun. Are lau atudun iy badeh, ki-in hamon ta san ta Malawin Ndrabun, ma ki-in hamon ta sahou handru.”

²⁵Badih badu Samariya asehek i ta Jises ja i buku doh, “Jo tanan, idah kameh Mesaya eme, iri aloh iy Krais. Buku iy eme kameh iy barasehek lakou marakon barame tataha.”

²⁶Jises tiye i tan, “Jo le asah idah, iy ndramak nane ta udu le buku doh. Jo le adeh asehek sahou ewek tam dah.”

²⁷Iy udu, ano le badeh, oro lau tan are kon tinan ame hamon ame hawen. Eme ma mani oro atur ta atou iy asehek sahou hawe badih ari. Ma oro ame abudon solo-an. Arile, oro bandremenya Jises bala buku doh bwe, “Ou aso-ok saba lakou handru?” o, “Tasah handru ou asehek sahou hawe iy badih kede-eh?”

²⁸Butuhu Samariya eme ruwani bwisi gwa tan irek na gwa udu andri udu. Iy eme iu ili hamon ili kon, ma iy ili asehek nyala iri lau,

²⁹“Ei, aha kame katou iy ndramak ari kodo-oh. Iy eme asehek iri kandriyen tek mene jo amekes ndra bwena ndra-au on! Iy sala Krais?”

³⁰Ano iri ado bolo kon tinan adek ame len ame atou Jises.

³¹Iri lau adek kahis le, oro lau tan asehek sahou boto-on ili tan, “Ndramak ta leheya, ou aimon se nyamon.”

³²Iy eme asehek i toro i buku doh, “Nyamon tek in aliy. Ado tanan nyamon doh bwe.”

³³Eme oro lau tan suburuk i toro ari ari anya, “Kora-on ari ndramak ndrame ndratiye nan nyamon, nadeh.”

³⁴Jises asehek sahou ili toro lau tan i buku doh, “Nyamon tek badeh, ta jo ki-in hamon ta budon ta Kindrei. Iy nane suni jo eme ta amekes gok tan, ma iy aso-ok jo kabwidi marakon kano.

³⁵Ado asehek i buku doh: ‘winiya bun hahuw ja, nyamon badu bilin buruni.’ Jo katiye tado, mada ado kasak, ado kanyolom kili bolo bilin. Nyamon marakon ndruni.