Jon 4:14-35

¹⁴Pen binɨb an ñɨg yad ñen ñɨŋɨnɨmuŋ ak, tepayaŋ ñɨg nen ma yɨbɨl gɨnɨgab agak. Pen ñɨg yad ñen ñɨb nab ne ayaŋ lɨnɨgab anɨb ak, ñɨg kɨlam tek julɨg, nop gek pel pelnep yenɨgab agak.

¹⁵Anɨb agek, bin anɨb ak agak, Bɨawl, yɨp ñɨg anɨb ak ñɨmɨmin agak. Ñe ñɨben, kɨdek yɨp ñɨg nen ma gɨnɨmuŋ agak. Pen ap ñɨg awl ma malɨnɨm agak.

¹⁶Agek Jisas agak, Am nɨgɨmɨl nop poŋɨd owan agak.

¹⁷Agek pen agak, Yad bɨ sek mel agak. Agek Jisas agak, Takaw anɨb apan, Yad bɨ sek mel apan ak, nɨŋɨd apan agak.

¹⁸Bɨ anep mamɨd ak dɨnak ak pen, bɨ mɨñɨl ayɨp mɨdebil ak, nɨgɨmɨl mel agak. Anɨb ak nɨŋɨd yɨbɨl apan agak.

¹⁹Anɨb agek bin ak agak, Bɨawl, mɨñɨl yad nepin, nad bɨ God gos ñek agñeb olap agak.

²⁰Based yes chɨn bɨlel okok, dum awl kɨgom yɨmɨl God nop agnɨgelɨgɨpal agak. Pen nɨbi Juda kay, binɨb okok kɨli Jelusalem nep amɨl kɨgom yɨmɨl God nop agnɨgɨnɨgel apɨm agak.

²¹Agek agak, Bin, takaw yɨp gos nɨgɨnɨmɨn agak. Ñɨn anɨb ak ownɨgeb ak, dum anɨb awl akaŋ Jelusalem nep, kɨgom yɨmɨl Bapi nop ma agnɨgɨnɨgabɨm agak.

²²Nɨbi Samaliya binɨb, bɨ kɨgom yɨmɨl agnepɨm ak nop ma nepɨm agak. Chɨn Juda binɨb, bɨ kɨgom yɨmɨl agnopun ak nop nopun agak. Chɨn nopun, bɨ binɨb tɨg asɨk dep anɨb ak, ne Juda nɨb agak.

²³Ñɨn anɨb ak ownɨgab ak pen mɨñɨl owup agak. Binɨb kɨgom yɨmɨl, nɨŋɨd yɨbɨl agɨl Bapi nop agnepal okok, Kawnan ne ak kɨlop gos ñaknɨŋ, kɨli kɨgom yɨmɨl nɨŋɨd yɨbɨl agɨl nop agnɨgɨnɨgabal agak. Anɨgenɨgabal ak, Bapi ne kɨlop nɨgek tep gɨnɨgab agak.

²⁴God ne kawnan mɨdeb agak. Ak nɨm, binɨb kɨgom yɨmɨl nop agnepal okok, Kawnan ne ak kɨlop gos ñaknɨŋ, kɨli kɨgom yɨmɨl nɨŋɨd yɨbɨl agɨl agnɨgɨnɨgel agak.

²⁵Anɨb agek, bin ak Jisas nop agak, Yad nepin, Mesaya nɨm ak, ne Bɨ God nop aglup ak, binɨb okok kɨlop dɨl kod yenɨgab ak apal ak, ne ownɨgeb agak. Ñɨn anɨb ownɨgab ak, chɨnop tap okok mɨdupsek agñɨtep gɨnɨgab agak.

²⁶Agek Jisas agak, Bɨ anɨb ak nɨm yad, nad ayɨp takaw agobul awl agak.

²⁷Anɨb agaknɨŋ, bɨne okok kɨli apjakɨl, Jisas bin ak ayɨp takaw ag yelek nɨŋɨd gos palawl lɨlak. Pen kɨli olap tɨkjakɨl, bin anop tap tay dɨnɨg opan agɨl ma agnɨgɨlak. Jisas nop abe, taynen bin anɨb awl ayɨp takaw agebil agɨl ma agnɨgɨlak.

²⁸Pen bin anɨb ak, ñɨg akɨl ak kelɨgɨl, tepayaŋ adɨkɨd man ne amɨl, binɨb yelak anɨb okok kɨlop agak,

²⁹Tap okok mɨdupsek gɨpin tek agñub bɨ ak, nɨbi apɨl nɨgɨm agak. Ne Bɨ God nop aglup ak, binɨb okok kɨlop dɨl kod yenɨgab ak nep tek lup akaŋ agak?

³⁰Anɨb agek, binɨb anɨb okok Jisas nop nɨgɨnɨg man ak kelɨgɨl, saŋɨdɨlak.

³¹Ma owlak won ak, Jisas bɨne okok nop nebneb gɨl agɨlak, Tisa, tap ñɨŋan agɨlak.

³²Agel ne pen agak, Tap mɨdup yad mɨdeb ak, nɨb ma nepɨm agak.

³³Anɨb agek, bɨne okok kɨli ke nep agnɨg agnɨg gɨl agɨlak, Binɨb ogɨnap nop tap mɨdup dap ñesɨpal akaŋ agɨlak?

³⁴Pen Jisas kɨlop agak, Tap mɨdup yad ak anɨb nep agak. God yɨp agyokek apɨl, gos ne nɨgup anep kɨdek gɨl, wog agup anɨb ak gɨ junɨm agak.

³⁵Takaw olap apɨm, Tap yɨŋ yɨbun ak takan omɨŋal omɨŋal mɨdɨl, tap mɨdup ñɨŋeb tek mɨdeb yɨg dad ownɨgabun apɨm agak. Pen yad nɨbop agebin agak. Wɨdɨn nɨbi ak nɨg dad padɨkɨl nɨgɨm agak. Wog okok tap mɨdup ñɨŋeb tek mɨdɨl, tɨk dad owep tek mɨdeb agak.