Text copied!
CopyCompare
Buk Baibel long tokples Kandas - Jon - Jon 4

Jon 4:1-45

Help us?
Click on verse(s) to share them!
1A kum Parisi det longoro i lena o Iesu i ben pas a susut na taro na ususer, ra det susut taun a taro na ususer anun o Jon, ma i baptaiso det.
2Ikut o Iesu ut ke baptaiso taio, anun a kum nat na ususer kut det baptaiso.
3Ra o Iesu i sa tasmani lena a kum Parisi det sa longoro i, i wan tagitiro una papor Judia ra i milet melet utong una papor Galili.
4Una nun a inawan i wan potor tong una papor Samaria.
5Tiro una papor Samaria, i wanpat una tamon Sikar. I milau i kut a du piso ra, un ra bung ut, o Jekop i tabor tar o nutunu, o Josep nami.
6In nutung na danim, ra o Jekop i sa kil tari, kura tiro iai. O Iesu i taramo a pinino i tungulu una nun a walos na inawan, ra i kis mo tiro nisan in nutung na danim ra. Una du bung ra, in matanas i sa kis lekeleke.
7Ara ino Samaria i wanpat sur in itup, ra o Iesu i watungi tano lena, “Un tabor iau nam lako danim.”
8Anun a kum nat na ususer det sa wan taru utiro una tamon, sur det in kul utna na inangon.
9A ino Samaria i balu o Iesu lena, “Ui a te Juda, ma iau a ino Samaria. Sur asau ra u saring iau sur lako danim?” Uni a kum te Juda ka det emarom nama kum te Samaria.
10Ikut o Iesu i balu i lena, “Ra u tasman a etabor anun o God, ma u tasman osi kai ra i saring ui sur lako danim, un saringi, ma in tabor ui nama danim na nilaun.”
11A ino i watungi tano lena, “Labino, katu utna na ititup anum, sur un itup danim nami. In nutung na danim ri i dordorong doko. Ma tagai a danim na nilaun ra?
12U nuki lena u labo taun a tubundat o Jekop ra i tabor met namin nutung na danim ri? Det tomo nama kum nutnutunu ma anun a kum wewegua kai, det rop det ininum taguni.”
13O Iesu i balu i lena, “Det rop ra det inum a danim ri, det in muruk melet kut.
14Ikut det ra det in inum a danim ra an tabor det nami, ka det in muruk melet mo. A danim ra an tabor det nami, in elar nam ara matmatano danim una nundet a nilaun, ra in burburak pat ma in tabor det nama nilaun tukum.”
15A ino i watungi tano lena, “Labino, un tabor iau nama danim ra, sur gong melet mo a muruk, ma gong mo a wan liklik urin sur an itup.”
16Ra o Iesu i watungi tano lena, “Un nan ma un ben pas anum a musano, ra mur in milet melet urin.”
17A ino ra i balu i lena, “Katu musano anung.” O Iesu i watungi tano lena, “A lingmulus ut ra u watungi lena katu musano anum.
18U sa nolin pas nama limo na musano, ma ara, ra uniri u kis tomo nami, awu sur anum a musano. A lingmulus ut ra u watungi tang.”
19A ino i balu i lena, “Labino, uniri, a tasmani lena ui a poropet.
20A kum tumtubu met tagun numugu det ser lotu torom o God una tangai ri, ikut mot a taro Juda mot watungi lena, din lotu torom o God sapat kut o Jerusalem.”
21Ra o Iesu i watungi tano lena, “Tama i, a lingmulusino ri an watungi tam, a du bung in nanpat, ra ka mot in lotu mo torom o Tita una tangai ri, ma sapat kai o Jerusalem, awu.
22Mot a kum te Samaria ka mot tasman osi ra mot ser lotu toromi, ma met a taro Juda met tasmani ut osi ra met ser lotu toromi, uni a pinapam anun o God ra i ulaun a taro, i wanpat ut tagun a taro Juda.
23A du bung in nanpat ma iri i sa wanpat, ra a kum tene lotu mulus det in lotu torom o Tita una nion ma una lingmulus. A kum ngas na tene lotu lenra, o Tita i nem doko det.
24O God a nion. Det ra det ser lotu toromi, det in lotu ut una nion ma una lingmulus.”
25Ra a ino i watungi tano lena, “A tasmani lena a Mesaia ra di watungi nama Karisito, in nanpat, ma in upuaso a kum utna rop torom dat.”
26Ma o Iesu i balu i lena, “Iau ut ri, a wasiso torom ui.”
27Una du bung ut ra, a kum nat na ususer anun o Iesu det milet melet. Det tama o Iesu i wasiso tomo nam ara ino, ra det kisin. Ikut katutaio tagun det i iting lena, “U nem asau?” o lenri, “Sur asau ra u wasiso tomo nami?”
28A ino ra i wan pas gusun anun in nadanim, i milet melet utiro utamon, ra i inanos a taro tiro iai lena,
29“Ai, mot iap, sur mot in tama ara musano, i inanos iau una kum utna rop ra a sa pam tari numugu. Kutiro i a Mesaia?”
30Ra a taro ra, det wan pas gusun a tamon, ma det wan torom o Iesu.
31Ra a ino i sa wan taru, a kum nat na ususer det inanos dekdeki lena, “Tene Ususer, un nangon pas.”
32Ikut o Iesu i balu det lena, “Anga utna na inangon kuri ut, ka mot tasmani.”
33A kum nat na ususer det ting etetalai det lena, “Kutiro taio i sa tabor tari nam lako utna na inangon?”
34O Iesu i watungi tandet lena, “Anga utna na inangon iri i, an pam sot pas a nemnem anun o naro ra i tulu ru iau urin, ma an urop anun a pinapam.
35Mot ser watungi lenri, ‘A watnin kalang utmakai kura ra din pasong maragom.’ Ikut a watungi tamot lena: Mot in tamtama tokodos usa numugu, ma mot in tama a kum kinobot, det sa taka rop, ma i sa sot sur din pasong.
36Uniri a musano ra i pasong i los anun a ikul. Ma a win anun a pasong, a utna sur a nilaun tukum, sur osi ra i marmarut ma osi ra i pasong, der in gas tomo.
37A wasiso ra a taro det ser watungi, i lingmulus ut lenri, ‘Ara i marmarut, ma ara i pasong.’
38A tulu mot sur mot in pasong una kinobot ra mot ut ka mot marut tari. Ara taro gisen ut det pam tari, ma mot, mot los a tinibo mukut tagun anundet a pinapam.”
39A susut na te Samaria tagun a tamon ra, det nurnur un o Iesu. Det nurnur kibino una wasiso anun a ino, ra i watungi tandet lena, “I inanos iau una kum utna rop ra a sa pam tari numugu.”
40Ra a taro Samaria det wan torom o Iesu, det saringi sur in kis nisandet, ra i kis pas aru bung tiro iai.
41A susut melet det nurnur, kibino una nun a wasiso.
42Det watungi tan a ino ra lena, “Uniri met sa nurnur, awu sur una wasiso kut ra u watungi un o Iesu, awu. Met ut, met sa longoro i, ma met sa tasman mulusi lena, i a Tene Ulaun anun a rakrakon bual.”
43Ra aru bung i sa rop, o Iesu i wan utong o Galili.
44O Iesu ut i sa watung tar a wasiso lenri, “A poropet, a taro una nun a tamon ka det ser ru i.”
45A taro tagitong o Galili det sa wan pas una labino bung na lotu na Wanlakai sapat o Jerusalem, ma det sa tama tar a kum utna rop ra o Iesu i pami sapat iai. Ra o Iesu i wanpat tong o Galili, a taro det gas pasi.

Read Jon 4Jon 4
Compare Jon 4:1-45Jon 4:1-45