Jon 3:9-31

⁹De ma Nikodimas ka ruqun na qa ma’, “Maikka quasik nguat drlem pe liina i angera rleng.”

¹⁰De ma Iesus ka ruqun ma’, “Ngu lu nanaa be quasik ngia drlem liirang iara? Dap ngua tu gua qevep ai ngi dai ama barlka i ai de ngi su ama qaqet pet ma Isrel.

¹¹Maikka ngul sil ba ngi ne ama revan. I uut taqen sevet liirang aa i sa uut drlem iirang. De uurel sil sevet liirang aa i sa uut lu iirang. Be uurel sil ba ngen ne lungera dap katikka quasik ngen derer a nget.

¹²De sa ngua sil ba ngen sever ama tekmeriirang nanari never ama aivetki. Dap kuasik ngen dru a ngen a qevep sever iirang. Dai ariq aip ngua sil ba ngen sever ama tekmeriirang manarevuk, dai ngu lu nanaa, kua diip ngen dru a ngen a qevep sever iirang dav ani quasik?

¹³De qatikka ai de quasiq a qek nanari qa mit be qa lu maravuk dama uusepka aa rlan. Dap katikka ngua naik dai ngut lu. I ngua men manarevuk, i ngua i ama qaqet araa Rarlimka na ngua.

¹⁴Katikka murl ma Moses ka mu ama qemki men ama mengiit de qa maarl na iit se qi, mer ama ausaqi.

¹⁵Taqurla dai saqikka diiv ama qaqet tem ngim piit sagel ngua i ama qaqet araa Rarlimka na ngua ip lura i ra tu araa qevep sever a ngua, dai diip te iames masmas.

¹⁶I raquarli ama Ngemumaqa dai maikka qe rarliq ama qaqet mai ver ama aivetki. Taqurla be qatikka aa Uimka ama quanaska dai qa nem ka. I qa rekmet taqurla ip lura i rlas tem ta men a qa, dai quasik mager ip lenges na ra, dap mager ip te iames masmas.

¹⁷I quasiq ai ama Ngemumaqa qa nem aa Uimka ip ka taarl ne ama qaqet se araa viirang. Dap ka nem aa uimka ip ke iames ne ama qaqet naver araa viirang.

¹⁸I lura i rlas tem ta men ama Ngemumaqa aa uimka dai diip kuasiq ai ama Ngemumaqa qa raarl na ra. Dap lura i quasik ta tu araa qevep sever ama Ngemumaqa aa Uimka, dai qasa qurli ra naa ne ma Slurlka aa tuvetki. I raqurli quasiq ai rlas tem ta men ama Ngemumaqa aa Uimka.

¹⁹I liina i ama qaqet i qurli ra naa ne ama tuvetki dai raqurliani, “Ama Nirlaqa dai sa qa men saver ama aivetki, dav ama qaqet per ama aivetki te rarliq ama viirang. Dap kuasik te narliip se ama Nirlaqa, (i ama nirlaqa i ne ama tekmeriirang ama atliirang). I qatikka raquarli ra mugelnas sa tekmet ne ama viirang.

²⁰I raquarli lura mai i rat drlem sa tekmet ne ama viirang, dai rem ngim temanau ne ama Nirlaqa. Be lura dai quasik mager ip ta ren sagel ama Nirlaqa. I ariq aip ta men sagel ama Nirlaqa dai diiv ama Nirlaqa ke reqerl ne araa viirang.

²¹Dav aiv iak i qat drlem sa tekmet ne ama tekmeriirang ama seserl iirang, dai qat den sagel ama Nirlaqa. Be diiv ama Nirlaqa ke teqerl ai luqa qe tekmet ne ama tekmeriirang ama atliirang, ne ama Ngemumaqa aa dlek.

²²Baip maget de ma Iesus ke ne aa risura ra mit savet ma Judia. Be vet luqia ama qerlingki dai ma Iesus ke ne aa risura te qukmes te ama qaqet.

²³De qerlka ama qaqet ta men sagel ma Jon pet ma Enon. I ma Enon dai gelna ne ma Salim. I ma Jon ke qukmes te ama qaqet pet luqia ama qerlingki i raquarli ama kainaqi ver a qi dai ama baam met ki. De ama qaqet dai qatikka ra tit be qe qukmes tem ta vet luqia ama qerlingki.

²⁴I ma Jon ke tekmet ne liirang aa i as kuasiq ai ra mu qa ve ama karabus.

²⁵Baiv aa de iari nevet ma Jon aa risura te ne ama Judaqa ta taarl metna. I ra taarl metna se ama gamansena i ama Lautu-vem-ta te quknas.

²⁶De ra men sagel ma Jon de ra ruqun na qa ma’, “Auura Tiksiqa, luqa ama Barlka i medu qurl uut tuarl ne ama kainaqi ma Jodan de ngil sil ba uut sever a qa, dai maikka qe qukmes te ama qaqet i buup. De maikka ama buurlem ne ama qaqet ta tit sagel ka.

²⁷De ma Jon ka virliit ma’, “Ariq aip kuasiq ama Ngemumaqa qe sem madlek ne a qeq ip ke tekmet ne ama rleriirang ama dlek-pem-iirang, dai katikka quasik mager ip ke tekmet ne ama rleriirang ama dlek pemiirang.

²⁸I sa mekai ngene narli gua lengi i ngua sil ba ngen ma’, ‘Ai ngua dai quasiq ai ama qaqet araa Iameska na ngua.’ Dap ngua dai qatikka ama Ngemumaqa ka nem ngua ip ngu ruirl nanaik ka.”

²⁹De ma Jon ke rluses de aa lengi ne ama qasiquatka ma’, “Nemka ama lugutka i diip ke ngerlvet ne aa lugutki dai diiv ama nanki ara ak dap quasiq a qek. Dav ama lugutka aa rluaqa dai qurli qa gelna ne iam i ama arlias per a qa never aa rluaqa i diip ke ngerlvet. Kua aip lua de ama arlenki aris, i diiv ama luqupki re tekmet ne ama berlim, dai luqa ama lugutka aa rluaqa i diip ke narli aa qenem de diip ma arlias per a qa never a qa.” Katikka ngua dai raquarl ama lugutka aa rluaqa. I ngua dai ama arlias per a ngua ip ngurl kuarl te ma Iesus barek lura i ama Ngemumaqa aa uis na ra.

³⁰I diip ma Iesus aa rletki ki riirl, dap ngua dai gua rletki dai dingding a qi.

³¹Luqa i qa men manarevuk dai maikka qa veviit daleng ama tekmeriirang mai. Dap luqa i qa naver ama aivetki, dai naqatikka qa naver ama aivetki, be luqa dai qatikka qel sil sever ama tekmeriirang naver ama aivetki. Dap ma Iesus i qa men manarevuk, dai maikka qa veviit daleng ama qaqet mai naver ama aivetki.