Jon 3:8-26

⁸Luhutnöŋ nanŋi imbi-imbi laŋ giliga ötöŋi mörakzanmö, mi denikeyök kaba gilakza aka denike gila anakzawi, gi miaŋgö könaŋi qahö möt asarizan. Uŋa Töröŋan ambazip nam köl eŋgiiga ahuahu dölökŋe ahugeri, körek yeŋgö könaŋinan mönö luhut miaŋgö dop akza.”

⁹Mewö meleŋniga Nikodemusnöŋ köŋkuŋ aka kewö jiyök, “Mi ahakö dop qahö.”

¹⁰Mewö jiiga Jisösnöŋ jiyök, “Gi Israel könagesö kusum neŋgimakzan aka töndup keu miaŋgö könaŋi qahö möt asarizan. Mi kude dop kölja.

¹¹Nöŋön keu öl töhönŋi kun kewö jibi mötnöŋ: Neŋön wania möt kutuzini, mi jiba indelakzin aka wania jeninan eka mötzini, mi naŋgöba jimakzin. Mewö ahakzinmö, eŋön töndup Buŋa keunini mi qahö möt aŋgön kölakze.

¹²“Gölmegö yuaiŋi jenöŋ ehekŋi miaŋgö keuŋi jibiga möta qahö möt narim niŋgize ewö, nöŋön Suepkö yuaiŋi qahö ehekŋi miaŋgö könaŋi jibiga mötmei, mi mönö denöwö möt naribeak?

¹³Gölmegö azi kunŋan Suepnöŋ qahö öŋgöyökmö, Suep gölmegö Azi ölŋan Suep mire mala eta asuhuyöhi, yaŋön mönö liliŋgöba Suepnöŋ öŋgöma.

¹⁴“Anutunöŋ Moses gölme qararaŋkölkölŋe jim kutui kopö ainöŋ mokoleŋ imutŋi memba tohotnöŋ kösököi kinöhi, miaŋgö dop Suep gölmegö Azi Ölŋi mi kösökögetka öŋgöba kinma.

¹⁵Ambazip i möt narim waŋgizei, yeŋön körek pakpak malmal köhöikŋi miwikŋaiba malmegöra aka eu öŋgöma.

¹⁶“Miaŋgö könaŋi kewö: Ambazip i möt narim waŋgizei, yeŋgöreŋök kunŋan ayuhubapuköra Anutunöŋ gölme dop önöŋi qahö jöpaköm neŋgiyök. Neŋön körek letota malmal köhöikŋaŋgö buŋaya akingöra mönö Nahönŋi mohotsirik mi neŋgiyök.

¹⁷Ambazip gölme dop mal anjini, Anutunöŋ Nahönŋi neŋgö keunini jim tekömapköra aka qahöpmö, Nahönŋan amöt neŋguiga kantri dop letota oyaeŋkoyaeŋ akingöra aka melaiiga gölmenöŋ erök.

¹⁸“Ambazip kunŋan Nahönŋi möt narizawi, Anutunöŋ yaŋgö keuŋi jim teköiga qahö ayuhumapmö, kunŋan Jisös qahö möt narim waŋgizawi, Anutunöŋ yaŋgö keuŋi lök jim teköiga malja. Anutugö Nahönŋi mohotsirikö qetŋi qahö möt narizawaŋgöra aka könöp siagö buŋaya akŋa.

¹⁹Anutunöŋ gölme ambazip keunini jim tekömakzawi, miaŋgö könaŋi kewö: Asakŋan lök gölmenöŋ eta asuhuyökmö, ambazipnöŋ ahakmeme bölöŋi bölöŋi aka memba malget. Mewö mala Anutugö asakŋi tököba uruŋini söŋaupkö ahakmemenöŋ laŋ jöhöba mala kotket.

²⁰“Körek pakpak ahakmeme bölöŋi ahakzei, yeŋön Anutugö asakŋi tököba andö qemakze. Anutunöŋ ahakmemeŋini bölöŋi bölöŋi mi indela jim eŋgiiga gamuŋini mötpepuköra keŋgötŋini mörakze. Mi möta asakŋaŋgö uruŋe qahö aŋgorakze.

²¹Qahö aŋgorakzemö, kunŋan kun keu ölŋi wuataŋgöba maljawi, yaŋön ölöp asakŋaŋgö uruŋe kaŋgotma. Anutunöŋ sölölöhöm waŋgiiga ahakmemeŋi aka memba malöhi, miaŋgöra ahakmemeŋi miaŋön aukŋe asuhumapköra mötza.” Mewö.

²²Jisösnöŋ mewö jim teköba kinda gwarekurupŋi eŋguaŋgita Jerusalem siti mosöta Judia prowinsgö miri andöŋe anget. Miaŋgöreŋ anda gwarekurupŋi yembuk sonda tosatŋi toroqeba yembuk mala ambazip o melun mem eŋgiba malök.

²³Jisösnöŋ mewö malökmö, Jonöŋ mewöyök miri qetŋi Salim miaŋgö kösutŋe malök. Miri qetŋi Ainon miaŋgöreŋ o jök ahöyök aka ambazipnöŋ Jongöreŋ kaŋgota o melun mem eŋgimapkö qesigetka amqeba mem eŋgiba malök.

²⁴Nalö miaŋgöreŋ Jon mi kösö mire qahö algetka tarök.

²⁵Juda yeŋön amöt qem aŋgubingöra böröŋini saŋgoŋmaljema. Mewögöra Jongö gwarekurupŋi yeŋön Juda azi kunbuk keu miaŋgö goranora aka könahiba jitnakölik jiget.

²⁶Mewö jigetka lömböriiga Jongöreŋ kaba kewö jiget mörök, “Ketaŋamnini mötnöŋ, azi Jordan o likepŋe göbuk maliga nangak könaŋamŋi naŋgöba jinöŋi, yaŋön ambazip o melun mem eŋgiiga jesöŋgöŋan mönö yaŋgöreŋ anakze.”