Jon 3:23-33

²³O Jon kai i baptaiso tong o Ainon milau o Saleim, uni a susut na danim kura iai. A taro det wanan toromi sur in baptaiso det.

²⁴A utna ri i wanpat, ra kabaut di uruk o Jon una karabus.

²⁵A ramano kum nat na ususer anun o Jon det wasiso na engaras tomo nama ara te Juda una nirurus keles, elar nama petutna una lotu Juda.

²⁶Det wan torom o Jon ra det watungi tano lena, “Tene ususer, a musano ra mur kis tomo pas nami tong un ara papor danim Jodan, i ra u inanos taru uni, uniri kurong mo kai i baptaiso. Ra a taro rop det wan mukut toromi.”

²⁷O Jon i watungi tandet lena, “Kataio in pam pas tu utna ra o God ke pitar tari tano.

²⁸Mot ut mot sa longoro tari ra a watungi lenri, ‘Awu sur iau a Karisito. O God i tulu ru iau kut sur an mugu tano.’

²⁹Tu musano ra i nolin nam tu ino, anun a ino ut ra. A pasan a musano ra i nolin, in tur ma in longoro suri. Ra in longoro in nalngano, in gas doko. Uniri, anung a gasgas i elar nam anun a gasgas, ra anung a gasgas i sot maragom.

³⁰O Iesu ut in labo nanan ma iau an natino nanan.

³¹“O naro ra i wan pirso tagisapat una langit, i labo sakit taun a taro rop. A musano ra taginin upiso, taginin ut upiso, ma i wasiso kut una kum utna taginin upiso. I ra i wan tagisapat una langit, i labo sakit taun a taro rop.

³²Ma i wasiso talapor una kum utna ra i tama tari ma i longoro tari, ikut kataio i nurnur una nun a wasiso.

³³Ikut det ra det nurnur una nun a wasiso, det mulaot lena o God i a lingmulus.