Jon 3:22-33

²²Jisösnöŋ mewö jim teköba kinda gwarekurupŋi eŋguaŋgita Jerusalem siti mosöta Judia prowinsgö miri andöŋe anget. Miaŋgöreŋ anda gwarekurupŋi yembuk sonda tosatŋi toroqeba yembuk mala ambazip o melun mem eŋgiba malök.

²³Jisösnöŋ mewö malökmö, Jonöŋ mewöyök miri qetŋi Salim miaŋgö kösutŋe malök. Miri qetŋi Ainon miaŋgöreŋ o jök ahöyök aka ambazipnöŋ Jongöreŋ kaŋgota o melun mem eŋgimapkö qesigetka amqeba mem eŋgiba malök.

²⁴Nalö miaŋgöreŋ Jon mi kösö mire qahö algetka tarök.

²⁵Juda yeŋön amöt qem aŋgubingöra böröŋini saŋgoŋmaljema. Mewögöra Jongö gwarekurupŋi yeŋön Juda azi kunbuk keu miaŋgö goranora aka könahiba jitnakölik jiget.

²⁶Mewö jigetka lömböriiga Jongöreŋ kaba kewö jiget mörök, “Ketaŋamnini mötnöŋ, azi Jordan o likepŋe göbuk maliga nangak könaŋamŋi naŋgöba jinöŋi, yaŋön ambazip o melun mem eŋgiiga jesöŋgöŋan mönö yaŋgöreŋ anakze.”

²⁷Jonöŋ mi möta kewö meleŋnök, “Anutunöŋ azi kungöra yuai kun Suepnöhök qahö al waŋgibawak ewö, yaŋön mönö mi buŋa qem aŋgumamgö osiza.

²⁸Yambuk mala kewö jial, ‘Ni Amötqeqe Toŋi Kraist qahö akzalmö, Anutunöŋ melaim niŋgiiga mutuk kazala yaŋön andöne kama.’ Nöŋön keu mi jiali, iŋini mi ölöp nanŋinak naŋgöba jiba malbeahaŋgö dop akze.

²⁹Miaŋgö keuŋi dop ala kewö jimam: Azi kunŋan ambi buŋaŋambuk aka ambi memamgöra sösöŋgai keu jim sehiba malja. Mewö maliga azi alaŋan kösutŋe kinda sösöŋgai keuŋaŋgö jölŋi möta yaŋgöra önöŋi qahö söŋgaimakza. Miaŋgö dop nöŋön Jisösgö alaŋi aka yaŋgöra söŋgaibiga sösöŋgai miaŋön dölki uruni kokolak qeiga maljal.

³⁰Jisösgö qetbuŋaŋan qarim sehiiga nöŋgöreŋan mönö waziiga dop kölma.” Mewö.

³¹“Daŋön euyaŋgöreŋök eröhi, yaŋön ambazip körek pakpak eŋgoŋgita öŋgöŋgöŋi akza. Kunŋan gölmenöŋ asuhuba gölmegö buŋaya akza aka gölmenöŋ malmalgö keuŋi jimakza. Suepnöhök eta kayöhaŋön mönö körek pakpak eŋgoŋgita öŋgöŋgöŋi akza.

³²Yaŋön yuai eka möt kutuba malöhi, miaŋgö könaŋi jiba naŋgöba dangunu ewö kinja. Mewö kinjapmö, naŋgönaŋgö keuŋi mi ambazip kunŋan kun qahö möt aŋgön kölja.

³³“Ambazip kunŋan naŋgönaŋgö keuŋi möt aŋgön köljawi, yaŋön Anutu ölbölŋi akzawaŋgö keuŋi mem köhöiiga pöwöwömŋi akŋa.