Jon 3:2-9

²Yaŋön suŋgem kunöŋ Jisösgöreŋ kaŋgota kewö jii mörök, “Ketaŋamni, gi aŋgöletot memakzani, mi azi kunŋan Anutu yambuk qahö kiniga nanŋök memamgö osimakza. Miaŋgöra gi Anutunöŋ nam köl gihiiga böhi akzan, mewö mötzin.”

³Mewö jiiga kewö jiba meleŋ waŋgiyök, “Nöŋön keu öl töhönŋi kun kewö jibi mötnöŋ: Kunŋan Anutugöreŋök ahuahu dölökŋi qahö ahuma ewö, yaŋön mönö Anutugö bemtohoŋe aŋgota ekŋamgö osima.”

⁴Meleŋ waŋgiiga kewö jiyök, “Kunŋan lök ahuba ambazip namŋi aka malagun ahuahu dölökŋi mönö denöwö ahubawak? Yaŋön mönö nam körö uruŋe aŋgori kunbuk gölöm ala memamgö osima.”

⁵Mewö jiiga kewö meleŋnök, “Nöŋön keu öl töhönŋi kun kewö jibi mötnöŋ: Kunŋan o melun mem waŋgigetka Uŋa Töröŋan uruŋe geiga mewöŋi miaŋön ahuahu dölökŋe qahö ahuza ewö, mewöŋi miaŋön mönö Anutugö bemtohoŋ uruŋe aŋgotmamgö osima.

⁶Gölmegö iwinam eŋgöreŋök morö ahuzawi, mi gölme moröya. Uŋa Töröŋan inahöba nam köliga morö asuhumakzawi, mi mönö Suepkö moröya.

⁷“Mewögöra iŋini ahuahu dölökŋi Anutugöreŋök qahö ahume, miaŋön mönö qahö dop kölja. Keu mi jibiga miaŋgöra mönö kude auruman.

⁸Luhutnöŋ nanŋi imbi-imbi laŋ giliga ötöŋi mörakzanmö, mi denikeyök kaba gilakza aka denike gila anakzawi, gi miaŋgö könaŋi qahö möt asarizan. Uŋa Töröŋan ambazip nam köl eŋgiiga ahuahu dölökŋe ahugeri, körek yeŋgö könaŋinan mönö luhut miaŋgö dop akza.”

⁹Mewö meleŋniga Nikodemusnöŋ köŋkuŋ aka kewö jiyök, “Mi ahakö dop qahö.”