Jon 3:17-33

¹⁷Kindrei atehei nadun eme andri bolo kon munyak ta edeu ndramak ari, ari ala ta mada sahou, bwe; iy eme ta akohok taha ado ta bolo kandriyen ndra-in ame hamon ja.

¹⁸Are lau iy atehei budon tan handru in ta nadun, iy kameh winiyan bado ta mada sahou bwe. Arile, are lau iy batehei budon tan bala ta nadun bwe, iy ndrandra-i ta mada Kindrei; iy kameh ales udu ta mada sahou, tasah iy batehei budon tan handru bala ta Nadu Kindrei ari le bwe.

¹⁹Kati sahou ta Kindrei i buku doh: Sun anya ndra bwena ndrame bolo kon munyak. Arile, iri lau aso-ok lulik tinan labai, iri baso-ok sun bwe, tasah iri badeh, aso-ok labai ta amekes kandriyen ndra-in.

²⁰Lau marakon amekes kandriyen ndra-in, iri baso-ok sun bwe, ma iri winiyan bame mirihik ta sun bwe. Tasah iri anoh, kora-on kandriyen tiri ndra-in kasahan keme lewan.

²¹Arile, are lau iy in hamon ta kandriyen mwasin, badeh iy ndrala mirihik ta sun, ma sun kameh anya i lomadan, ma leheyani gok nane iy amekes, in hamon ta boto-on ta Kindrei.”

²²Ano le badeh, Jises hawe oro lau tan adek au ala lokei loboho Judiya. Iy udu loboho doh luluwen sese hawe oro lau tan, ma iy tiye oro lau tan ta anyu iri lau.

²³Jon badeh, inyu iri lau ale udu Enon udu mirihik ta Salim, tasah loboho doh badeh, iri gwa solo-an udu aliy. Eme iri lau solo-an labai ala le hawen, ta anyu iri. (

²⁴Udu bolo len doh, kabin Herot batehei Jon bala bolo kou bwe le ai.)

²⁵Eme losen sese asahan ndrokowa oro lau ta Jon ma hawe ndramak ari badu Juwis, ta kandriyen ta sikine iri lakou ta salom.

²⁶Ano badeh, oro lau ta Jon ala asehek i tan, “Ndramak ta leheya, iy ndramak mene udu hawem, udu kapa gwa Jodan bilisiu loboho rai, ou mene asehek iy; na len dah badeh, iy inyu iri lau, idah iri lau alih le hawen ai.”

²⁷Jon anuhun, eme iy asehek i toro, “Ndramak winiyan ateu lahou, buku Kindrei badu kandrah amwenen edeu.

²⁸Aha ndranuhun jo ndrasehek taha. Jo Krais bwe. Jo badeh, Kindrei suni jo eme bwena ta lowosa le san tan ta iy eme.

²⁹Aha kabudon sahou tek doh: Ndramak mwan ari sudi badih, iy badih doh kameh ili udun. Kawas ta iy mwan ili ales ereu le ai, iy atehei ndranyen, ma iy sekesek labai ta anuhun boho ndramak nane asoh badih. I buku nane dah, sekesek ndratuhi jo mara-ei.

³⁰Krais kameh kasahan kabin, ma iri lau marakon ka-en hamon tan. Jo kameh kudu le bahandran.

³¹“Iy udu kandrah eme andri, iy kabin udu bwele-en labai. Are lau badu kon munyak, iy badu kon munyak, ma iy kameh asehek nyala iri lakou badu kon munyak amwenen. Iy nane badu kandrah eme andri, iy kameh udu bwele-en labai ja ta lau marakon.

³²Iy asehek saba lakou iy ndranyolom, ma iy ndranuhun, arile ari ndramak baso-ok ta atehei budon ba-en ta sahou tan bwe.

³³Are lau iy andrei sahou tan, ma iy tawiy ihis udu ndrinen, iy lau le doh badeh, tanan sahou ta Kindrei, handru.