Jon 3:16-36

¹⁶“E God i maris a rakrakan hanua, pa i saran tar e Natnalik takai sot ka, sur esining ir tortorot onoi, ir laun tikin, pa bel ir hirua.

¹⁷E God bel i sune e Natnalik ute ana rakrakan hanua sur ir warkurai a ginina taraila sur lar mat. I sune i sur ir alaun la.

¹⁸Esining i tortorot onoi, bel dir warkurai i sur ir mat. Ika, esining bel i tortorot, di ka warkurai tari sur ir mat, anasa bel i tortorot o e Nat e God takai sot ka.

¹⁹Ine a kamkama warkurai ning e God i sarani: A talapor ka hanot ana rakrakan hanua, ika a tarai la mang ka sur a mormorom pa a talapor bel, anasa anunla toltol i laulau kol.

²⁰La rop ning la sira tol a toltol laulaula, la nget ka a talapor, pa bel la han tetek a talapor, sakana dir oroi puasa pas anunla na toltol laulaula.

²¹Ika, esining i sira mur a momolna, i hanot ana talapor, sur dir oroi puasa i mang anuna titolla i kamkamna ot ta e God.”

²²Lamur, e Iesu taum ana anuna kakak a asaer la han misaot e Jerusalem sur ning a natar a hanua kaning ot ana papar Judia, pa la kes pas tingia, pa i baptais a taraila.

²³Pa e Jon otleng i baptais tumo e Ainon milau e Salim, anasa a galis a malumla tingia. A tarai la hanot amon teteki sur ir baptais la.

²⁴A titol ne i hanot ning belot di akas e Jon ana rumai a dodot.

²⁵Dingla na kakak a asaerla ane Jon la arlak na warwara taum ana ning a te Juda ona munmun ning a tarai Juda la sira toli sur lar toh ana matana e God.

²⁶La han tetek e Jon pa la atai i mange, “Tena Asaer, a barsan ning mu kes taum pas tumo na ris a malum Jodan, pa u warwara talapor tar ono, kanumo ma i baptais, pa a taraila rop la han teteki.”

²⁷E Jon i atai la mange, “Ning e God saot na langit bel i saran tar ta utna tetek tik, bel ir kibasi.

²⁸Mulo ot mulo ka longor tari ning a atongi manglarne, ‘Iau bel e Karisito. E God i sune iau sur ar nigo tana, pa i ir mur.’

²⁹A barsan ning i taulai ta hane, anunai ot a hane ning. A halin a barsan ning, ir harnanai pa ir longlongor suri. Ning ir longor a elngena barsan ning i taulai, ir gas kol. Onone anuka gasgas i arlar ana gasgas anuna halin a barsan ning i taulai, pa anuka gasgas i bot sot.

³⁰I ot ir leklek amon pa iau ar natarna amon.

³¹“Esining i han misaot na langit, i leklek kol tana taraila rop. A barsan ning mite lapiu, mitet lapiu, pa i warwara ka ana ututnala mite lapiu. Esining i han misaot na langit, i leklek kol tana taraila rop.

³²Pa i warwara talapor ana sa ning i oroi i pa i longori, ika bel tik i tortorot ana nuna warwara talapor.

³³Ika esining i tortorot ana nuna warwara talapor, i amomoli mang e God a momolna.

³⁴Esaning e God i sune i, i warwara ana warwara ane God, anasa e God i saran arop tar a Talngan Tabu teteki.

³⁵E Tamana i mang kol sur e Natnalik, pa i saran arop tar a ututnala uting nakuna.

³⁶Esining i tortorot ona Nat e God i kibas a lalaun tikin. Ika esining i pilak sen e Natnalik, bel ir kibas a lalaun, anasa a balanakut ane God ka kes tar onoi.”