Jon 3:16-32

¹⁶“God i ier kanaka isi fanu tikii na piklinbat, pesu ka ta ufu i tikii sau e Kalalik kia, isi seh sau i unune lo, biil in to fiu, biil. In liu fitliu.

¹⁷God biil i wuun ufu ta ke Kalalik uga na piklinbat isi nagogon fanu, biil. I wuun ufu ke Kalalik isi faliu pes ri.

¹⁸Seh i unune lo, biil in kiis na nagogon. Isau le seh ae biil i unune lo, ka kiis tah na nagogon. Wara le biil i unune na asa i tikii sau e Kalalik ke God.

¹⁹Kamtinan nagogon kiri i aragii: Malal ka tapiek tah aga na piklinbat, isau le fanu biil ri ier isi malal, biil. Ri lala ier tom isi kubunor, wara le sinangu ri i laulau.

²⁰Foron tom tel sinang laulau, ri ememse malal, ma biil rin la una malal wara le ri sokeh, tarama sinang laulau kiri ka tapiek malal.

²¹Isau le seh sau i liu ini tekentu in la una malal, isi sanih i tel ta u ini rakrakai ke God, ik tapiek malal.”

²²Namih, Iesu turan berberat na fafausum kia, ri ka la una falifuh na Iudaia, ke Iesu ka kiis pes fal e biing tura ri, isi ka baptais fanu aiwa.

²³Jon sabin i famam tel bapitaiso na Ainon fatat isi Salim, wara le i fuun e dan lo e falifuh ae, ma fanu fuun ri ka la usuf i, isi ik baptais ri.

²⁴Tier igii i tapiek famu, namih Jon ka kiis na kamkabet.

²⁵Fale berberat na fafausum ke Jon ri ka fakep ini orek turan nenge Iudaia kunan matngan susuh una tapiek kalkaluu na mata God.

²⁶Ke ri ka la usuf Jon ke ri ka fas u aragii, “Rabi, kaltu ae kamu tah tina nenge bulin dan na Ioridan, ae o fafas ta ini, ka tel bapitaiso mang. Ma fanu tikii ri ka famam la usuf i.”

²⁷Jon ka kiliis ri aragii, “Neng e kaltu i fasih sau in kep sanih ae God i ta u sing i tina kukulii.

²⁸Gam tom, gam ka ongen ta u e orek kiak, ae ia fas ta gam le, ‘Ia biil e Mesaia, isau le God i wuun ta iau, isi ian famu sau lo.’

²⁹Fifin ae in fakekel, i ken kaltu tom ae in telpes u. Ke talan kaltu ae in fakekel, i nene ma ka wongwong isi. Ma i fuun ini laes aunbiing i ongen kinen kaltu ae. Laes ae kiak, ma laes ae ka kuruung tikii liu kiak.

³⁰In laumet lalala ma iak fabiro lalala.

³¹“Seh i la tina mawe, i laumet lon fanu tikii. Ma seh i la tina piklinbat, i tina piklinbat tom, ma i orek la tom aragii kaltu tina piklinbat. Seh i la tina kukulii i laumet lon fanu tikii.

³²I famalal sanih i par ta u ma ka ongen ta u, isau le biil tikas i somangat pes orek an famalal kia.