Jon 3:1-22

¹Ndramak ari nyaran Nikodemus, iy badu Parasi, iy lau tinan ari ta atondrok kandriyen tiri Juwis. Iy badu hawe iri kansol ta atondrok kandriyen tiri Juwis.

²Na ben ari Nikodemus ili anya kasehek sahou hawe Jises, eme ma iy asehek anya, “Ndramak ta leheya, ahi tanan, ou badeh, Kindrei suni ou ame ta leheya ahi. Ou badeh, ado hawe Kindrei ame. Ari ndramak winiyan bamekes kalem hawe lahou tinan buku ou amekes kede-eh bwe, tasah Kindrei badeh, udu hawen.”

³Jises eme asumon bohon anya, “Jo tiye tam handru. Ari ndramak winiyan batou tondrok ta Kindrei bwe. Buku kato-ou iy san rasan ja, san ari le doh badeh, iy kameh winiyan anyolom tondrok ta Kindrei.”

⁴Nikodemus eme ndremenya ja i buku doh, “Barala buku sah handru ndramak ndrasahan alon labai, ya iy kili hamon kili ndrine tinen ma kato-ou iy san rasan ja, kasahan buku nah nyandren ja?”

⁵Jises asehek i tan ja, “Jo tiye tam handru, ndramak winiyan bala bolo tondrok ta Kindrei bwe, buku badeu iy na gwa ma na Malawin Ndrabun, bwe.

⁶Saba lakou oda taha edeu, badeh ta oda taha. Ya saba lakou Malawin Ndrabun edeu, badeh ta Malawin Ndrabun.

⁷Manim satur tiri sahou nane jo asehek tam, kato-ou aha san rasan ja.

⁸Siyer badeh, atohou salan labai, ou anuhun kurun, arile ou winiyan batiye buku iy atohou udu loboho heh handru eme, o iy atohou ili loboho heh bwe. Taha kameh a buku aliy. Taha lau marakon badeh, kasahan ha-un ja na Malawin Ndrabun.”

⁹Nikodemus eme ndremenya ja, “Moson ta aliy i buku sah?”

¹⁰Jises tiye i ta Nikodemus ja anya, “Adeh, ou badeh, ndramak tinan ari ta leheya udu bolo iri Isra-el. Buku sah handru ou bakohok bolo sahou dah bala mwasin bwe?

¹¹Jo tiye tam handru, ahi asehek nyala lakou ahi tanan. Ma ahi asehek nyala lakou ahi ndranyolom. Arile, aha badeh, bakohok sahou mwasin nane ahi akeh ewek taha, bwe.

¹²Jo mene ndrasehek nyala iri lakou badu kon munyak ndrawek tam, arile ou batehei budon tam bala ta aliy bwe. Ya ou atehei budon tam keme tek kameh, kili buku sah handru? Buku jo kasehek tam ta nyala iri lakou badu kandrah ja.

¹³Ya ari ndramak bala loken bolo kandrah bwe le. Jo Nadu Ndramak Awas le ari badeh, udu bolo kandrah eme andri.

¹⁴Buku bwena mene Moses atehei mwak udu bada kei, iy eme tutuniy ili loken udu bolo kon lomale an, iri kameh tutuni Nadu Ndramak Awas ili loken i le buku aliy.

¹⁵Buku are lau iy atehei budon tan handru in ta Nadu Ndramak Awas, idah kameh kohan handru winiyan bano bwe, iy kameh ta udu le buku doh.

¹⁶“Sahou doh handru, tasah Kindrei aso-ok taha lau marakon badu kon munyak tinan labai. Iy eme tikisi taha, ma iy atehei nadun mwan ari le eme tataha. Buku are lau iy atehei budon handru in tan, iy kameh winiyan bamak bwe, ma kohan handru kameh ta udu le buku doh.

¹⁷Kindrei atehei nadun eme andri bolo kon munyak ta edeu ndramak ari, ari ala ta mada sahou, bwe; iy eme ta akohok taha ado ta bolo kandriyen ndra-in ame hamon ja.

¹⁸Are lau iy atehei budon tan handru in ta nadun, iy kameh winiyan bado ta mada sahou bwe. Arile, are lau iy batehei budon tan bala ta nadun bwe, iy ndrandra-i ta mada Kindrei; iy kameh ales udu ta mada sahou, tasah iy batehei budon tan handru bala ta Nadu Kindrei ari le bwe.

¹⁹Kati sahou ta Kindrei i buku doh: Sun anya ndra bwena ndrame bolo kon munyak. Arile, iri lau aso-ok lulik tinan labai, iri baso-ok sun bwe, tasah iri badeh, aso-ok labai ta amekes kandriyen ndra-in.

²⁰Lau marakon amekes kandriyen ndra-in, iri baso-ok sun bwe, ma iri winiyan bame mirihik ta sun bwe. Tasah iri anoh, kora-on kandriyen tiri ndra-in kasahan keme lewan.

²¹Arile, are lau iy in hamon ta kandriyen mwasin, badeh iy ndrala mirihik ta sun, ma sun kameh anya i lomadan, ma leheyani gok nane iy amekes, in hamon ta boto-on ta Kindrei.”

²²Ano le badeh, Jises hawe oro lau tan adek au ala lokei loboho Judiya. Iy udu loboho doh luluwen sese hawe oro lau tan, ma iy tiye oro lau tan ta anyu iri lau.