Jon 3:1-21

¹Bidi me deli bidai, te bidi nogi Nikodemus. Te bidi Farisi bidi hani dao. Tama te bidi Juda bage augwaligo tobolu bidi deli dao.

²Te bidi Jisas bidibo digi hulide aselama, te po wai, “Po ola mabo bidi, dago koneai, Godigo nage e tǫba po ola mabo bidi nigilama, tagala palai. Tibaso da, Godigo bidi me deli dali bidisiąyu da, agai te sę Jisas nago ebo bomai sę tiwai me egobeo,” te bidigo Jisas dali te po wai.

³Jisasgo Nikodemusbolo po wei ponoyu, te po wai, “Mu tama, eno nagebolo obao, bidi me te ma ame nabo tiwai eyu, gesi ma pedalisiąyu da, te bidi agai Godigo we bidi tonalubo sę me sugobeo,” Jisasgo te po wai.

⁴Nikodemusgo Jisasbolo te po wai, “Magi ilama, monu dabe yai bidi ma ame nabo tiwai eyu, gesi bidi ma pedalaibawe? Teyu da, aga idago haligaba ma bula selama, tama idago ma ame naibawe?” Nikodemusgo Jisasbolo te po hanalu wai.

⁵Jisasgo te po wei ponoyu, te po wai, “Mu tama eno nagebolo obao, bidi ąįde baptais sabo ąį dali Godigo Mobo Bidi dali gesi ma gagasiąyu da, te bidi God bidibo digi tomoba pogobeo.

⁶Tigigo ame nabo nai, te tigi dao. Tama te nai God agai Mobo Bidigo ame nabo nai da, te mobo bidi dao.

⁷Eno ‘Dage gesi ma pedelao,’ te po wabo pode nage noma sigio.

⁸Te wali asobo da, te aga homu kolesagago te wali gasaba gasaba pabo dao. Nago te wali asobo po naga odobo dao, tialima nago mena badu pedalama, tama ma mena badu ma paliwe, te po wabo dao. Tigidali bidi gesi noma pedalobo augwaligo te tiwai egibi naga ebo dao,” Jisasgo te po wai.

⁹Nikodemusgo Jisasbolo te po wei ponai, “Te nai mena tama pedalaibawe?” te po wai.

¹⁰Jisasgo Nikodemusbolo te po wei ponoyu, te po wai, “Magi yaliwe? Nage te Israel bidi dabe te bomai po page ola mabo bidi dao. Tama magi baso nago te nai konebewe?

¹¹Eno mu po nagebolo obao, dago e wabo po da te dago koneani po obao, tama dago po pusali da, te dago suali sę po dao. Tiali goli dagego dago wali po te dagego tudiba muanio.

¹²Eno dagebolo eno e tǫde nai po obao, tama dagego me ‘Te mu tama dao’ homu ebeo. Tibaso da, eno dagebolo dagalude nai po obaso da, te dagego mena tama te poba duga homu mugowe?

¹³Gasa bidi me te Godigo bidibo madigiba me holobeo. Ena da Godigo Bidi Mu da, tama ena naga te dagalu tagalama, e tǫba dulai, enaduba deli digio.

¹⁴Polobadu Mosesgo te kapago nigai tibo hasamani te bidi meni yai bulude ni donogo ugwaba sai. Te tiwai yali gilama, tama augwaligo te Godigo Bidi Mu ugwaba sela mueibao.

¹⁵Magi basowe? Tigidali bidi enaba homu mubaso da, augwali tigidaligo dwagi yai bidibo bomo selama, bidada peyu, mu bidada paibao,” Jisasgo te po wai.

¹⁶God aga Ogwa deli digi mu bidibao. Tialima Godigo e tǫde bidibo we bidi godolo mu eyu, tama augwali tau somainogo eyu, God agai Ogwa te e tǫba tagala palali. Tama tiali da, tǫde we bidi augwa homu agaba mubaso da, augwali hagaidali weyu, augwali dwagi yai bidabo bomo selama, bidada peyu, bidada pomainogo, Godigo te sę yai.

¹⁷Godigo aga Ogwa e tǫba tagala palali te e tǫde we bidi po tų dodolomainogo me tagala palobeo. Te menio. God aga Ogwa tagala palali da, te da tǫde we bidi ma dobola sagasomainogo yai.

¹⁸Niwai bidigo God aga Ogwaba homu mubaso da, teda te bidi da aga po tų menio, Godigo agabolo dene magobeo. Tiali ma, niwai bidi aga Godigo Ogwaba homu musiąwani bidi da, Godigo te bidibolo po tų dodolama, dene mawaibao. Magi basowe? Te bidi agai God agai ogwa teba homu mubeo.

¹⁹Tama te po tų yabo page tama telalubo. Ula yali e tǫde polo pedalai dao. Tialima, bidi dabe augwaligo homugo hulia sabo augwaligo godola pai. Augwaligo ula te godolo ebeo. Magi basowe? Augwaligo kolesaga te dwalio.

²⁰Dwai kolesaga ebo bidi agai te ulade boi bidi ebo dao. Agai dwai kolesaga yali hania ugwaba sela muidali weyu, aga te ulaba asobo menio.

²¹Tialima, te dwagi yai kolesaga mu ebo bidi, te bidi aga da te ulaba pedalobo dao. Tama bidi dabe augwaligo te bidi agai sę yali te Godigo bomode te sę yai bugagia sumainogo, te bidi ulaba asobo dao.