Jon 2:7-25

⁷Jisösnöŋ mi eka kewö jii mötket, “Iŋini mönö o uba kaba mokogetka köuraŋen ki kokolak qeget.” Mewö jii möta jiyöhaŋgö dop aket.

⁸Köuraŋen mi kokolak qegetka kewö jim kutum eŋgiyök, “Mönö o qakŋi tosatŋi uba anda lömbuaŋ galöm waŋgime.” Jim kutum eŋgiiga memba anget.

⁹Uba angetmö, galömnöŋ o letota wain ahöhi, mi nemba möta denikeyök memba kageri, mi qahö möt asariba auruyök. Auruyökmö, welenqeqenöŋ o ugeri, yeŋön mi möta jigetka galömnöŋ maren toŋi oholi kayök.

¹⁰Kaiga kewö jii mörök, “Maren nalöŋe körek pakpak yeŋön wain o ölöpŋi mi mutuk memba kaba eŋgimakze aka mi nemba eŋololoŋ aketkun wain o nahömŋi qahö mi könaŋgep eŋgimakze. Göŋön wain o ölöpŋi mi mutuk aŋgön köla qahö eŋgiba dölki nalö oŋgita memba kazan. Mi silik murutŋi kun akzan.”

¹¹Jisösnöŋ aŋgöletot mutukŋi ki mi Galili prowinsgö miri qetŋi Kana miaŋgöreŋ meyök. Mi memba mewö miaŋön kukösumŋi indeliga asuhuyök. Mi asuhuiga gwarekurupŋan möt narim waŋgiget.

¹²Közölömbuaŋnöŋ malget teköiga Jisös, yaŋgö nam-munŋi aka gwarekurupŋi yeŋön miriŋine Kaperneam anget. Miaŋgöreŋ anda sömaŋ tosatŋi toroqeba malget. Mewö.

¹³Nalö miaŋgöreŋ Juda neŋgöreŋ ak-kömukömu kendon nalöŋan dopdowiyök. Anutunöŋ mönöwök neŋgehoriba neŋgoŋgiröhi, miaŋgöra söŋgaibingö aketka Jisösnöŋ mewöyök miriŋi mosöta Jerusalem sitinöŋ öŋgöyök.

¹⁴Sitinöŋ öŋgöba jöwöwöl jikegö tohoŋ uruŋe anda yuai kewö miwikŋaiyök: Ambazip bulmakau aziŋi, lama aka kembö nei mi bohonŋi memegöra alget aka tosatŋan moneŋ utekutek albingöra tatkeri, mi eŋgehök.

¹⁵Mi eŋgeka kösönöŋ tapep (muŋgamuŋga) mönjöŋda miaŋön eŋgohotiriba eŋguyök. Eŋguba ambazip mi körek közöl eŋgiba lama bulmakauŋinambuk jöwöwöl jikenöhök eŋguataŋgöyök. Utekutek ambazip yeŋgö souje kötŋini metaliga mokoba eriga tebolŋini metali anget.

¹⁶Kembö bohonŋini memegöra algeri, ambazip mi kewö jim eŋgiyök, “Yuai mi mönö memba kesala yaigep anget. Iŋini nöŋgö Iwinaŋgö jöwöwöl jikeŋi ki mönö wuanöŋgöra utekögetka kölköl-örörö miri ewö akza?”

¹⁷Mewö jiiga Buŋa keu kun gwarek yeŋgö mötmötŋine kaŋgoriga mötmöriget. Keu mi kewö ohoget ahöza, “Nöŋgö urunan göhöreŋ jike mi kömbukŋi ahömapköra kapaŋ kölbiga miaŋön urune newaŋ könöp ewö jeiga waimanjat miaŋön kawöl miwikŋaimakzal.”

¹⁸Mi közöl eŋgiiga Juda jitŋememe yeŋön tembula wahöta Jisösgöreŋ kaŋgota kewö qesim waŋgiget, “Gi mönö wani aŋgöletot kun aknöŋga kukösumgi ehinga dop köl neŋgiigun kimbi mewöŋi akanak?”

¹⁹Mewö qesim waŋgigetka kewö meleŋ eŋgiyök, “Iŋini jöwöwöl jike ki köndeŋgetka gölmenöŋ eriga nöŋön mi wehön karöbutkö uruŋe memba wahöta kuŋgumam.”

²⁰Meleŋ eŋgiiga kewö jiget, “Yambu (yara) 46:gö uruŋe jöwöwöl jike ki memba mala mem tekögetka asuhuba kinja aiga göŋön mi wehön karöbutkö uruŋe mönö denöwö aka memba wahöta kuŋgubanak?”

²¹Mewö jigetmö, Jisösnöŋ jikegö keu mi nanŋi sileŋaŋgö söpsöpŋa ala jiyök.

²²Jisösnöŋ könaŋgep kömupnöhök wahöriga söpsöp keu jiyöhi, mi nalö miaŋgöreŋ gwarekurupŋi yeŋgö mötmötŋine kaŋgori ölöp möt asariget. Mi mötmöriba Jisösnöŋ keu jiyöhi, mi aka Buŋa keu ohogeri, mi pakpak möt nariget. Mewö.

²³Jisösnöŋ Jerusalem sitinöŋ ak-kömukömu kendongö nalöŋe mala aŋgöletot kukösumŋambuk meyöhi, mi ambazip gwötpukŋan eka qetŋi möt nariba yaŋgöreŋ lapingöget.

²⁴Lapingögetmö, Jisösnöŋ ambazip pakpak yeŋgö könaŋamŋini möt kutum teköyök. Mewögöra ambazip pakpak qahö möt narim teköm eŋgiba keuŋinaŋgö bapŋe qahö anda malök.

²⁵Ambazip uruŋine keu yuai ahöyöhi, Jisösnöŋ kunŋan ambazip uruŋinaŋgö könaŋi mi indela kondel waŋgimawaŋgö dop qahö ahök. Mönö nanŋak mi ölöp möt kutum teköyök. Mewö