Jon 2:5-25

⁵Tana e Iesu i atai a tarai a titol mange, “Mulor tol asaning ir atai mulo sur mulor toli.”

⁶Diono na tatatnan koto na hat la tur tingia sur na gosgos kundi, i arlar ot ana titol ana lotu anuna tarai Juda ning la sira toli sur lar toh ana matana e God. Taktakai a koto ne, di sira abukusi ana naur a bonot o natol a bonot a galan na malum.

⁷E Iesu i atai a tarai a titol mange, “Mulor tere bukus a kotola ana malum.” Pa la tere abukus la.

⁸Lamur, e Iesu i atai la mange, “Mulor ituh pas al malum miting na kotola, pa mulor losi tetek esaning i ningnigo ana ngasa.” Pa la toli larning.

⁹Pa a ningnigo ana ngasa i gang tumusnan a malum ning ka wain rop. Bel i tasmani mang a wain ne i han mitaha, a tarai a titol ka la tasmani. I kabah maskan pas a barsan ning i taulai ana pukakiar ning,

¹⁰pa i atai i mange, “A taraila rop la sira tabar nigon a taraila ana wakak a wain. Ning la ka gang kol, io, la tabar kama a taraila ana wain ning bel i wakak kol. Ika u, u bot artabar ana wain ning i wakak kol.”

¹¹Ine a ningnigo na akinalang ning e Iesu i toli. I toli tumo e Kana ana papar Galili. A akinalang ne i asangan ot anuna matatar, pa anuna kakak a asaer la tortorot ono.

¹²Lamur ana ngasa, i han utumo e Kapernaum taum o e tana pa na tastasnala pa anuna kakak a asaerla. La kes pas dingla na pukakiar ot tingia.

¹³Ning a lotu na Han Lakai anuna tarai Juda i milau, e Iesu i han usaot e Jerusalem.

¹⁴Ning i kas uting ana ning a pukna ting na rumai a artabar, i oroi a tarai la siuran a bulumakaula, a sipsipla, pa tabunla, pa i oroi otleng a tena keles manila, la kes ana nunla na logola.

¹⁵I iris pas a inaula sur a inau na harum, pa i kepsen purum la rop ono. I kepsen purum a bulumakaula pa sipsipla, pa i minggen sarara a mani anuna tena keles manila, pa i minggen lingir anunla na logola.

¹⁶Pa i atai la ning la siuran a tabun la mange, “Mulor los purum la mite! Pa gong mulo keles pas a rumai ane Tata sur a rumai a sisiurai!”

¹⁷Anuna kakak a asaer la nuk pas a warwara ting na Buk Tabu mange, “A tnan nuknukik sur anuma rumai i arlar ana iah ning i ien iau.”

¹⁸A tarai Juda la hanot ulak tetek e Iesu pa la dekeni mange, “Esi na akinalang ur asangan mila ono, sur milar tasmani mang e God i sune u sur ur tol a ututnala ne?”

¹⁹E Iesu i keles la mange, “Mulor regen sen a rumai ne ane God pa ar atur ulak pasi ana natol a pukakiar ka.”

²⁰La keles e Iesu mange, “Di tol tar a rumai ne ana diat a bonot pa pisir diono na rau, pa u, ur tol ulak pasi ana natol a pukakiar ka?”

²¹Ning e Iesu i warwara ana rumai ane God, i warwara larlar ot ana palaona.

²²Lamur ning e Iesu ka laun ulak kusun a minat, anuna kakak a asaerla la nuk pas a warwara ne. Pa la bot tortorot ana Buk Tabu, pa ana warwara ning e Iesu ka atong tari.

²³Ning e Iesu i kes saot e Jerusalem ana lotu na Han Lakai, a galis a tarai la oroi a akinalangla ning i toli, pa la tortorot ana risana.

²⁴Ika e Iesu bel i tortorot ana tik, anasa i tasman a taraila rop.

²⁵Bel i kapan sur tik ir atai i ana toltol anuna taraila, anasa i ot i tasman asaning kaning na balanla.