Jon 2:2-19

²Ndramak ta kati molak nane doh aso-ok Jises hawe oro lau tan kala ta molak tan.

³Iri ado, waen tiri ano. Tinen eme asehek i tan anya, “Waen tiri badeh ndrano.”

⁴Jises eme asehek i ta tinen anya, “Tine, jo bwalek ou ame tiye jo ta amekes lakou. Tasah len tek ta amekes lakou badeh, kahis le.”

⁵Tinen eme tiye toro lau ta atondrok waen, “Ado badeh, ka-en hamon ta sahou tan buku iy asehek ewek tado.”

⁶Udu loboho doh badeh, bwisi sabok ma onoh udu aliy. Iri Juwis badeh, a-us gwa ili bolon ta sikine iri lakou ta salom ma mine iri na aliy. Bwisi sabok ari ari gwa udu bolon i buku lita rinek (100).

⁷Jises tiye i toro bonyo-ou nane dah i buku doh, “Ado kasuni gwa kili bolo bwisi sabok ma onoh kede-eh.” Eme oro ala asuni bwisi sabok ma onoh ili irek madan.

⁸Iy eme tiye toro ja anya, “Abo, ado kasolowei se gwa keme len, ado kandrei kili mine ndramak ta atondrok molak dah.” Oro ame bwidiy i buku le bohon asehek oh.

⁹Oro ame bwese-ei gwa ili mine ndramak ta atondrok molak nane dah. Iy a-un, iy eme atona nyiminye gwa badeh, ndra buku waen ja. Iy bala tanan bwe, waen badu heh handru. Oro lau tan le badeh, tanan. Iy eme aloh i ta iy tasou ha-un eme len,

¹⁰ma iy asehek i tan i buku doh, “Iri lau ta atiye waen badeh, iri adeu waen mwasin ili mwena. Udu hamon ta iri lau ndra-un solo-an labai, iri ame adeu waen sowan bwisik ili tiri ja. Arile ou badeh, tawi waen sowan tinan labai udu hamon handru, na le nane barame len ai!”

¹¹Jises amekes lahou tinan hawe kalem ma bwena badeh, udu kon Kana udu loboho Galili. Ma iy leheya boto-on ma kandriyen tan, eme ma iri lau tan anyolom, ma iri atehei budon tiri handru in le tan.

¹²Ano le badeh, Jises hawe tinen, nadu tinen, ma hawe oro lau tan adek au ala andri ala Kapena-um. Oro ala ado doh luluwen sese.

¹³Ndrame mirihik labai ta len ndrabun tiri Juwis aloh Pasoba ma nyamon tinan anya kasahan, eme Jises iu ili Jerusalem.

¹⁴Jises edek ili isos le badeh, iy ili bolo asiu tinan ta Kindrei, ma iy anyolom iri lau amekes ba-en, tiri bulumakau, sipsip ma ban udu bolo asiu tinan ta Kindrei. Iy ale anyolom oro lau rayah tokoha luk ado bada koyeu toro.

¹⁵Jises eme andrei malou ranah, iy bawei i le se. Iy eme tikahei iri lau ma bulumakau, hawe sipsip tiri au ala manan. Iy eme bukudi iri sau tiri nane ondrek luk udu bwele-en, amou ili andri, ma luk marakon udu bwele-en atalan laleyah.

¹⁶Iy eme asehek sahou boto-on labai ili tiri lau nane amekes ba-en ta ban, “Aha kakohok lakou taha marakon ki-iu ki manan! Aha ka-iy amekes asiu ta tama ili asumwe ba-en taha.”

¹⁷Oro lau tan ame bwetenei ja sahou udu bolo buk ndrabun asehek: “Budon tek ewek asiu tam, O Kindrei, budon tek i buku jih sulumwi bolo odak mara-ei.”

¹⁸Iri Juwis ame asehek sahou boto-on labai i ta Jises, “Ou winiyan amekes saba kalem ma lahou tinan kameh keme tahi kanyolom, ma ahi katanan boto-on tam, ma ahi katanan ou are lau handru?”

¹⁹Jises eme asehek i toro anya, “Katohowei asiu tinan ta Kindrei kede-eh ki-iu, ano kameh jo tahiy na le bolo len ma taloh.”